Azərbaycanı sevən və sevdirən

Layihənin istiqaməti: Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği

Bu gün dünyanın müxtəlif ölkələrində yaşayan azərbaycanlılar mədəni irsimizin təbliği, milli-mənəvi dəyərlərimizin qorunması məsələlərinə xüsusi diqqət göstərir, bu istiqamətdə müxtəlif layihələr, maraqlı tədbirlər keçirirlər. Təsadüfi deyil ki, diaspor fəallarının Azərbaycan mədəniyyətinin təbliği istiqamətində gördüyü işlərin nəticəsində dünyanın əksər dövlətlərində görkəmli elm xadimlərimiz, mədəniyyət nümayəndələrimiz barədə dolğun və ətraflı fikir formalaşmaqdadır. Tanınmış yazıçılarımızın əsərləri, qələmə aldıqları kitablar xaricdə geniş təbliğ edilir, məşhur rəssamlarımızın sərgiləri böyük maraqla qarşılanır.

Azərbaycan həqiqətlərinin dünyaya tanıdılmasında, qədim və zəngin mədəniyyətimizin təbliğində xarici ölkələrdəki səfirliklərimizin də danılmaz əməyi var. Ölkəmizin Amerika Birləşmiş Ştatlarındakı səfirliyi bu sahədə xüsusi fərqlənir.

Bilsin bütün ştatlar...

Bu il Azərbaycanla Amerika Birləşmiş Ştatları arasında diplomatik münasibətlərin yaradılmasının 25 ili tamam olur. Ötən bu illər ərzində ölkəmizin uzaq Amerikada daha yaxından tanıdılması üçün səfirlik əməkdaşları mühüm işlər görməyə nail olublar. Azərbaycan həqiqətlərinin Birləşmiş Ştatlarda yayılması, zəngin mədəniyyətimizin və incəsənətimizin Amerika ictimaiyyətinə çatdırılması istiqamətində diplomatik korpusun fəaliyyəti təqdirəlayiqdir. Təcrübəli diplomat Elin Süleymanov Azərbaycanın Amerika Birləşmiş Ştatlarında fövqəladə və səlahiyyətli səfiri vəzifəsinə təyin olunduqdan sonra bu sahədə daha böyük irəliləyiş müşahidə olunmaqdadır. Təsadüfi deyil ki, ABŞ-ın 15-dən çox ştatı Xocalıda baş verən erməni vəhşiliyini soyqırımı kimi rəsmən tanıyıb. Dövlət bayramlarımız, digər tarixi günlərlə bağlı son illər səfirliyin təşkil etdiyi müxtəlif tədbirlərdə qonaqlara ölkəmizlə bağlı dolğun məlumat verilir, mədəniyyətimiz və incəsənətimiz yüksək səviyyədə təbliğ edilir.

Amerikanın müxtəlif ştatlarındakı Azərbaycan icmaları mədəniyyət festivallarında da fəal iştirak edir, xalqımızın zəngin mədəni irsini tanıtmağa çalışırlar. Birləşmiş Ştatların Hyuston şəhərində türkdilli xalqların festivalı keçirilir. Hyuston-Bakı Qardaşlaşmış Şəhərlər Assosiasiyasının üzvləri Azərbaycandan gətirilən və milli ənənələrə uyğun müxtəlif suvenirlər, əl işləri ilə bəzədilən guşə də yaradıblar. Tədbir iştirakçılarına Azərbaycan haqqında sənədli film nümayiş etdirilib. Birləşmiş Ştatların Kaliforniya ştatının İrvin şəhər rəhbərliyinin təşəbbüsü və təşkilatçılığı ilə keçirilən "İrvine Global Village" festivalında ilk dəfə olaraq soydaşlarımız da iştirak ediblər. Amerika Azərbaycanlıları Şurasının nümayəndələri festival çərçivəsində Azərbaycan guşəsi yaradıblar. Burada Azərbaycanın qədim və zəngin tarixi, ədəbiyyatı, mədəniyyəti, coğrafiyası, həmçinin turizm imkanları barədə qonaqlara ətraflı məlumat verilib.

Xalqımızın ən qədim və əziz bayramlarından sayılan Novruz bayramı Azərbaycanın ABŞ-dakı səfirliyində xüsusi təntənə ilə qeyd olunur. Builki bayramda da coşqu yaşanıb. Vaşinqtondakı tədbirin iştirakçısı, tanınmış qarmon ifaçısı Əlihüseyn Cəfərov təəssüratlarını belə bölüşür: "Novruz hər bir azərbaycanlının həyatında önəmli yeri olan bir bayramdır. Ölkəmizin ABŞ-dakı səfirliyi bu bayramı təntənə ilə qeyd edir. Azərbaycanın Amerika Birləşmiş Ştatlarındakı fövqəladə və səlahiyyətli səfiri Elin Süleymanov belə əlamətdar günlərin yüksək səviyyədə keçirilməsinə böyük önəm verir. Çünki o, Azərbaycanı sevən və sevdirməyi bacaran insandır. Məhz Elin müəllimin təşəbbüsü və təşkilatçılığı ilə təkcə Vaşinqtonda deyil, ayrı-ayrı ştatlarda yaşayan soydaşlarımız bir araya gəlir, xalqımızın qədim adət-ənənələrini, mədəniyyətini nümayiş etdirmək üçün növbəti imkan qazanırlar. Bu dəfə də maraqlı tədbir keçirildi. Dəvət olunan nüfuzlu qonaqlar - diplomatlar, alimlər, Amerika ictimaiyyətinin nümayəndələri Azərbaycanın tarixi, bugünkü nailiyyətləri, zəngin musiqisi və mətbəxi haqqında dolğun məlumat aldılar. Qonaqların ölkəmiz, xalqımız haqqında səsləndirdikləri xoş sözləri dinləmək, musiqimizə heyranlıqla qulaq asmalarını görmək qürurvericidir. Belə mərasimlərdən sonra hər bir əcnəbi qonağın qəlbində Azərbaycana sevgi oyanır".

Azərbaycana səyahətə

çağıran kitab

Novruz bayramına həsr olunan silsilə tədbirlər çərçivəsində Vaşinqtonun ən tanınmış məkanlarından sayılan Konqresin Tomas Cefferson adına kitabxanasında ABŞ-dakı səfirliyimizin və kitabxananın regional bölməsinin dəstəyi ilə həmvətənimiz Fəridə Buyuranın "Nar və zəfəran: Azərbaycana kulinariya səyahəti" kitabının rəsmi təqdimat mərasimi də keçirilib. Tədbirdə xarici ölkələri təmsil edən diplomatlar, kitabxananın ziyarətçiləri, həmçinin Amerikada yaşayan həmvətənlərimiz iştirak ediblər.

Beş böyük beynəlxalq mükafata layiq görülmüş 317 səhifədən ibarət kitabda oxuculara milli yeməklərimizin Qərb ölkələri şəraitində hazırlanması üçün uyğunlaşdırılmış reseptləri təklif olunur. Bundan başqa, nəşrdə Azərbaycan mədəniyyəti haqqında hekayələr, ölkəmizin mətbəxinin tarixi, milli bayramlar barədə məlumatlar da yer alıb. Azərbaycanın ABŞ-dakı səfiri Elin Süleymanov tədbirdə çıxış edərək Fəridə Buyuranın müəllifi olduğu kitabın ölkəmizin qədim tarixini, zəngin mədəniyyətini və ən əsası ləziz mətbəxini əks etdirdiyini qeyd edib. Novruz bayramının qədim tarixi barədə məlumat verərək, bayramın böyük coğrafi məkanda müxtəlif xalqları birləşdirən qədim ənənə olduğunu bildirib.

Daha sonra kitab müəllifi tərəfindən qonaqlara Azərbaycan milli mətbəxinin tarixi barədə ətraflı məlumat verilib.

Ölkəmizin ayrı-ayrı bölgələrinin özünəməxsus mətbəxlərinin xüsusiyyətləri barədə danışan F.Buyuran Azərbaycanın müxtəlif ənənələri bir araya gətirən zəngin mədəniyyətə sahib olduğunu qeyd edib.

Sonda qonaqlara Azərbaycan milli mətbəxinin yemək və şirniyyatlarından ibarət müxtəlif təamlar təqdim olunub.

Turan İSMAYILZADƏ

Ədalət.-2017.-5 may.-S.3.