"ANADANGƏLMƏ VƏ İNKİŞAF QÜSURLARI VƏ ONLARIN RİSK AMİLLƏRİ"

Öncədən müəllif barəsində: Könül Qalib qızı Qarayeva Bakı şəhərində doğulub. ATU-nu fərqlənmə diplomu ilə bitirərək Elmi-Tədqiqat "Mamalıq və ginekologiya" İnstitutuna klinik ordinaturaya daxil olubdu. 2004-cü ildən tibb üzrə fəlsəfə doktorudur. 2006-cı ildən isə dosent elmi adını alıb. 57 elmi məqalənin müəllifidi.

Bunlar Könül xanımın gördüyü işlərin yığcam bir siyahısıdı. Amma bu günlərdə o daha bir mükəmməl işə imza atıb. Sizə təqdim etdiyimiz monoqrafiyanı yüksək səviyyədə işləməklə ortaya sanballı bir elmi əsər qoyub.

Onu da xatırladaq ki, bu kitabın, yəni elmi monoqrafiyanın rəyçiləri tibb elmləri doktorları professor N.F.Bağırova və professor L.M.Rzaquliyevadır. Bu elmi monoqrafiya dölün bətndaxili inkişafı zamanı baş verə biləcək qüsurlar və onları törədə biləcək amillər haqqında məlumat verir.

5 fəsildən ibarət olan bu monoqrafiyada demək olar ki, dünyaya gələcək insanın ilk anından doğum evinə qədər keçdiyi yol bütün elmi mənbələrə söykənməklə, elmi nailiyyətlərə güvənməklə araşdırılmış və baş verə biləcək fəsadların qarşısının alınması üçün zəruri olan təkliflər ortaya qoyulmuşdur.

Düşünürük ki, Könül xanım Qarayevanın yenicə işıq üzü görmüş bu elmi monoqrafiyası təkcə elmi ictimaiyyətin, xüsusilə ginekologiya sahəsi üzrə çalışanların deyil, həm də anaların və ana olmaq istəyənlərin hər birinin köməyinə çata bilər. Biz isə öz növbəmizdə gənc alim xanıma yeni uğurlar diləyirik.

Əbülfət

Ədalət.-2017.-18 noyabr.-S.12.