GÖYÇAY: YENİ UĞURLAR SORAĞINDA

Respublikamızın hər yerində olduğu kimi Göyçay rayonunda da tikinti-quruculuq və təsərrüfat işləri uğurla davam etməkdədir. İqtisadiyyatın bir çox sahələri öz inkişaf stabilliyi ilə gələcəyin daha böyük uğurları üçün stimul yaradır. Bu səbəbdəndir ki, rayon mərkəzində və əksər kəndlərdə bir çox sosial amillərlə yanaşı, müasirləşmənin yeni çalarları diqqət çəkir, rayon sakinlərinə sevinc bəxş edir. Göyçaylılar bütün bunlara və göstərilən digər qayğı və diqqətə görə Azərbaycan Respublikasının Prezidenti İlham Əliyevə daim minnətdar olduqlarını bildirirlər. Onlar bu minnətdarlığı və sevgini 11 aprel prezident seçkiləri günü bir daha nümayiş etdirdilər.

Bu işgüzarlığın, birliyin və təntənənin daha da yüksəlməsində, daha geniş miqyas almasında rayon rəhbərliyinin zəhməti danılmazdır. Prezidentin yüksək etimadını görülən işlərlə doğruldan Göyçay Rayon İcra Hakimiyyətinin başçısı Mehdi Səlimzadə gündəlik iş rejimində rayon həyatının bütün sahələrinə nüfuz etməyi bacaran, yenilikçi, həm də ziyalı şəxsdir. Sakinlərlə gündəlik təmaslar, görüş və söhbətlər icra başçısına hörmət və inam qazandıran amillərdir. M.Səlimzadə Göyçayın daha da inkişaf etməsi və şöhrətlənməsi üçün bütün zəruri qüvvələri səfərbər edərək rayon əhalisinə bu barədə hesabat verməyi, eyni zamanda onları dinləməyi də əsas vəzifələrindən biri hesab edir. Belədə rayon həyatının yaşanan hər günü, əvvəlki günlərin uğurlu davamı kimi yaddaşlara köçür, ümidləri artırır. Bu motiv keçirilən bütün tədbirlərin, görüş və yığıncaqların əsasını təşkil edir. Rayonda birinci rübün yekunları və qarşıda duran vəzifələr müzakirə olunarkən Mehdi Səlimzadə ölkə prezidentinin Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına həsr olunmuş iclasındakı çıxışından irəli gələn vəzifələr haqqında danışaraq demişdir:

- Azərbaycan Respublikasının Prezidenti cənab İlham Əliyev çıxışında qeyd etmişdir ki, 2018-ci ilin birinci rübündə ölkə iqtisadiyyatı 2,3 % artmışdır ki, bu da dünya miqyasında mövcud olan artımdan daha yüksək göstəricidir. İqtisadiyyatın şaxələndirilməsi istiqamətində aparılan siyasətin nəticəsidir ki, qeyri-neft sektoru 3 % artmışdır. Bu ilin birinci rübündə Azərbaycan iqtisadiyyatına 3,5 milyard dollar sərmayə qoyulmuşdur ki, bunun da böyük əksəriyyəti xarici sərmayədir. Hesabat dövründə sənaye istehsalı 2%, qeyri-neft sənayesi isə 10%, kənd təsərrüfatı 4,2 % artmışdır. Təkcə birinci rübdə valyuta ehtiyatları 2,2 milyard dollar artaraq hazırda 44,2 milyard dollar təşkil edir. Hesabat dövründə xarici ticarət dövriyyəsi 31 %, ixrac isə 37 % artmışdır. Birinci rübdə 31 min daimi iş yeri açılmış, inflasiya 4% təşkil etmişdir. İclasda Azərbaycan Prezidenti qarşıdakı dövr üçün mühim vəzifələr müəyyənləşdirmiş, biznes mühitinin yaxşılaşdırılması, maliyyə sisteminin tam şəffaflaşdırılması, iqtisadiyyatın rəqabətqabiliyyətliliyinin artırılması, yol, elektrik enerjisi, içməli su, qaz xətləri infrastrukturlarının daha da inkişaf etdirilməsi, qeyri-neft sektorunun inkişafı, sənaye istehsalının artırılması, sənaye zonaları və parklarının yaradılması istiqamətində işlərin davam etdirilməsi, kənd təsərrüfatının inkişaf etdirilməsi, aqroparkların yaradılması ilə bağlı konkret tapşırıqlarını vermişdir...

Sonra rayonun sosial-iqtisadi və mədəni inkişafını müəyyənləşdirən bir sıra məqamlar diqqətə çatdırılmışdır. Qeyd olunmuşdur ki, 2018-ci ilin birinci rübündə rayon üzrə əsas iqtisadi göstəricilər artıqlaması ilə yerinə yetirilmiş, iqtisadiyyatın əsas sahələri üzrə istehsal olunmuş məhsul və xidmətlərin ümumi həcmi 2017-ci ilin müvafiq dövrünə nisbətən 3,8 % və ya 849,5 min manat artaraq 53 milyon manat olmuşdur.

Rayonun sənaye müəssisələri və bu sahədə fəaliyyət göstərən fiziki şəxslər tərəfindən 4,2 milyon manatlıq sənaye məhsulu istehsal olunmuş və xidmətlər göstərilmişdir.

Cari ilin birinci rübündə aqrar sahədə də müəyyən uğurlar əldə edilmiş, 1461,5 hektar sahədə yazlıq əkinlər aparılmışdır ki, bu da ötən ilin müvafiq dövrünə nisbətən 53,5 hektar və ya 3,8 % çoxdur. Bu dövürdə 851 hektar sahədə çoxillik otlar, 139 hektar sahədə kartof, 3 hehtar sahədə dən üçün qarğıdalı əkilmişdir. Əkin sahələrinin suvarma suyu ilə yaxşılaşdırılması, torpaqların münbitliyinin artırılması istiqamətində bir sıra tədbirlər həyata keçirilmiş, rayon Suvarma Sistemləri İdarəsi tərəfindən Şəhadət, Hacalıkənd, Şəkər, Mall-şıxlı, Qarabaqqal, Alxasava, Potu, Bəydövül, Alpout, Aşağı Qaraməryəm və Qarayazı kəndlərində bütövlükdə 84,5 km məsafədə lildən təmizlənmə işləri aparılmış, 15 hidrotexniki qurğu təmir edilmişdir. Baş Şirvan Kollektorunun İstismarı İdarəsi tərəfindən rayonun Kürdşaban, Mallı-şıxlı və Çərəkə kəndləri ərazisində təsərrüfatlararası və təsərrüfatdaxili kollektorlarda 8,2 km məsafədə lildən təmizləmə işləri aparılmışdır.

Faraş tərəvəz istehsalının artırılması məqsədilə birinci rüb ərzində ümumi sahəsi 249 hektar olan 6700 istixana quraşdırılmış və artıq bazarlara faraş məhsulların göndərilməsinə başlanılmışdır.

2018-ci ilin birinci rübündə rayonun iqtisadi və sosial sahələrinin inkişafı üçün əsas kapitala bütün maliyyə mənbələrindən 3,6 milyon manat vəsait yönəldilmiş, tikinti təşkilatları tərəfindən 2,4 milyon manatlıq inşaat işləri görülmüşdür ki, bu da ötən dövrlə müqayisədə 2,2 dəfə çoxdur.

Hesabat dövründə əhalinin həyat səviyyəsi xeyli yaxşılaşmış, pərakəndə əmtəə dövriyyəsinin həcmi 1,3 %, əhaliyə göstərilən pullu xidmətlərin həcmi 1,8 % artmışdır. 2018-ci ilin birinci rübündə əhaliyə 248,9 min manatlıq rabitə və poçt xidmətləri göstərilmişdir ki, bu da ötən ilin müvafiq dövrünə nisbətən 11,2 % çoxdur. Rayon əhalisinə göstərilən rabitə və poçt xidmətinin səviyyəsi xeyli yüksəlmiş, daha müasir rabitə texnologiyalarının tətbiqi ilə əlaqədar internet istifadəçilərinin sayı əsaslı şəkildə artmışdır.

Cari ilin birinci rübündə şəhərdə, Qaraməryəm, Ləkçıplaq, Qızılağac kəndlərində 128 portluq, Qarayazı kəndində 24 portluq avadanlıq quraşdırılmış, Kürdəmiş kəndində 60 ailəyə telefon xətti çəkilmişdir. Şəhərin N.Nərimanov, Bakı, Atatürk, S.Vurğun, Vaqif, Xətai küçələrində hava rabitə xətləri kabel kanalizasiya quyularına köçürülməklə texniki normalara uyğunlaşdırılmışdır.

Rayon əhalisinin içməli su, elektrik enerjisi və təbii qazla təchizatının yaxşılaşdırılması sahəsində işlər davam etdirilmişdir.

Azərbaycan Respublikası Prezidentinin "Əhalinin içməli su ilə təminatının yaxşılaşdırılmasına dair əlavə tədbirlər haqqında" 17 mart 2017-ci il tarixli Sərəncamına əsasən "Azərsu" ASC tərəfindən rayonun 15 kənd yaşayış məntəqəsinə içməli suyun verilməsi üçün tədbirlər görülmüş, kəndlərin ərazisində 148 bulaq quraşdırılaraq bütövlükdə 28656 nəfər əhalinin içməli su ilə təminatı yaxşılaşdırılmışdır.

Həmçinin Azərbaycan Respublikası Prezidentinin "Əhalinin ekoloji cəhətdən təmiz su ilə təminatının yaxşılaşdırılmasına dair əlavə tədbirlər haqqında" 24 fevral 2017-ci il tarixli Sərəncamına müvafiq olaraq Ekologiya və Təbii Sərvətlər Nazirliyi tərəfindən rayonun 6 kənd yaşayış məntəqəsində modul tipli sutəmizləyici qurğular o cümlədən, 101 ədəd bulaq quraşdırılaraq istifadəyə verilmiş, həmin kəndlərdə yaşayan 5132 nəfər əhalinin içməli su ilə təminatını yaxşılaşmışdır.

Rayonun Aşağı Qaraməryəm, Qarabaqqal, Kürdşaban, Cəyirli, Çaxırlı, Qaraməryəm, Çərəkə, Alpout, Hacalıkənd və Ləkçıplaq kəndlərində istifadəyə yararsız güc transformatorları yeniləri ilə əvəz olunmuş, 740 ədəd 04 kvluq, 102 ədəd 10 kv-luq qəzalı vəziyyətdə olan dayaqlar yeniləri ilə əvəz edilmişdir, 22,6 km uzunluğunda yükünü özü daşıyan naqillər çəkilmişdir.

Hesabat dövründə rayonun Çaxırlı kəndinə təbii qaz verilişi bərpa edilərək təbii qazla təmin olunan rayon yaşayış məntəqələrinin sayı 45-ə çatdırılmışdır. Hazırda Ləkçılpaq və Çərəkə kəndlərinin təbii qazla təminatının bərpa edilməsi işləri başa çatdırılmaq üzrədir. Azərbaycan Respublikası Prezidentinin "Yaşayış məntəqələrinin qazlaşdırılması ilə bağlı tədbirlər haqqında" 05 mart 2018-ci il tarixli sərəncamına əsasən cari ildə Kürdşaban və Şəkili kəndlərinin də qazlaşdırılması nəzərdə tutulur.

(ardı gələn sayımızda)

İmza: Məzahir ƏHMƏDZADƏ

Ədalət.-2018.-26 aprel.-S.4.