O Azərbaycanı ucaltdı və həmişə bizimlədir

İslam İslamov

Sumqayıt Dövlət Universitetinin Elektro-mexanika kafedrasının dosenti. Prezident təqaüdçüsü. Azərbaycanın Əməkdar mühəndisi

Məlum olduğu kimi, 60-cı illərin ortalarında Azərbaycan keçmiş ittifaq respublikaları içərisində bütün göstəricilər üzrə çox geridə qalır və axırıncı yerdə dururdu. Ona görə də respublikamız daim məzəmmət olunurdu. Bu isə xalqın şərəfinə, ləyaqətinə mənfi təsir göstərirdi. Belə bir anda, 1969-cu ildə Heydər Əliyevin Azərbaycan rəhbəri seçilməsi ilə vəziyyət dəyişdi. 14 il ərzində H.Əliyev Azərbaycanın şöhrətini göylərə qaldırdı. Xalqımıza, Azərbaycana olan münasibət dəyişdi. Azərbaycan yüksək tərəqqi yoluna qədəm qoydu. Cəmiyyət həyatının bütün sahələrində əsaslı dəyişikliklər baş verdi. Xalqı ilə yanaşı o özü də yüksəldi. Heydər Əliyevin şöhrəti hər yerə yayıldı. İkinci ağır dövr isə 1990-cı illərin əvvəllərində yarandı. Xalqımız başına gələn böyük müsibətlər, bəlalar içərisində çaşıb qalmışdı. Azərbaycan vətəndaş müharibəsi, qardaş qırğını astanasına gəlib çatmışdı. Azərbaycan parçalanmaq, böyük fəlakət ərəfəsində idi.

1993-cü ilin iyun hadisələri zamanı Heydər Əliyev ona qarşı edilən haqsızlıqları əsas gətirib ən çətin anlarda ona edilmiş təklifləri qəbul etməyə də bilərdi. O, həyatından, canından, vəzifəsindən qorxsaydı, rahat, sakit, bir həyat keçirmək istəsəydi, hakimiyyətdə olub, lakin çətin gündə hakimiyyəti qoyub qaçan bir çoxları kimi xalqı, vətəni yalnız vəzifə ilə ölçsəydi, insanların faciəsini düşünməsəydi, duymasaydı, bu ağrılarla gecə və gündüz alovlanmasaydı, əlbəttə ki, çox riskli, qorxulu, həm də sərfəli bir mübarizəyə atılmazdı.

Ancaq Heydər Əliyev kimi bir müdrik şəxsiyyət buna heç vaxt yol verməzdi. Azərbaycanı daim yüksəkdə, azərbaycanlıları həmişə həmrəy, xoşbəxt görmək istəyən dövlət xadimi, həyatını qurban verə bilərdi, ancaq Azərbaycanı əyilən, parçalanan görmək istəməzdi. O, sinəsini yağı gülləsinə sipər edərdi, lakin torpaqların separatçılar, daxili və xarici düşmənlər tərəfindən parçalanmasına, satılmasına dözə bilməzdi. O, xalqının qurtuluş mübarizəsində şəhid ola bilərdi, fəqət Azərbaycanı yad əllərdə qoymazdı.

1993-cü ilin iyun hadisələri ərəfəsində ölkədə ağır vəziyyət yaranmışdı: bir tərəfdən erməni işğalçıları Azərbaycan torpaqlarını işğal edir, hər gün cəbhədə yüzlərlə azərbaycanlı qətlə yetirildi. Digər tərəfdə sadvalçılar, üçüncü tərəfdən Əlikram Hümbətovun silahlı qruplaşmaları ölkəni parçalayırdılar. Bunlardan başqa hakimiyyətdə olanlarla Sürət Hüseynovun silahlı dəstələri arasında döyüş gedirdi. Azərbaycan demək olar ki, beynəlxalq aləmdən tədric olunmuş və iqtidarda olanların cılız, yarıtmaz siyasəti sayəsində dünya dövlətləri Azərbaycandan üz çevirmişdilər.

Belə bir vaxtda insanları fəlakətdən qurtarmaq, ölkəni təhlükədən xilas etmək hadisələri məcraya salmaq çox çətin, həm də müdriklik, cəsarət tələb edən bir vəzifə idi.

Ağıllı, gələcəyi görən, hadisələri, düzgün qiymətləndirən insanlar bu vəzifənin çətinliyini çox yaxşı bilirdilər, həm də bu vəzifəni yerinə yetirə biləcək, bu ağırlığı öz çiyinlərində daşıyacaq, xalqı, Vətəni bəlalardan qurtaracaq bir insanı da onlar düzgün seçmişdilər. Xalq yalnız və yalnız bu fəlakətlərin qarşısını ala biləcək bir şəxsiyyətin-Heydər Əliyevin tərəfində idi, ona inanırdı, ona ümid edirdi.

Heydər Əliyev yenidən, ikinci dəfə xalqının köməyinə gəldi, Azərbaycanı, xalqımızı böyük fəlakətdən, qurtardı və xalqının əsil xilaskarı oldu. Əgər həmin gün xalqın istəyi və tələbi ilə dövrümüzün müdrik tarixi şəxsiyyəti, təcrübəli və iradəli dövlət xadimi, ümummilli liderimiz Heydər Əliyevin hakimiyyətə qayıdışı gerçəkləşməsəydi, indi biz müstəqil, qüdrətli hər zaman tərəqqi edən, yeniləşən və demokratikləşən Azərbaycan dövlətindən danışa bilməzdik. Bu qayıdış Azərbaycanın müstəqilliyini dünya müstəvisində reallığa çevirdi. Bu əsrlərin sınağından keçə-keçə min bir əziyyətlə, amma dönmədən məqsədinə doğru addımlayan bir millətin özünə qayıdışı idi. Bu, dilimizin, milli-mənəvi dəyərlərimizin, yaddan çıxmış bir çox həqiqətlərin, eyni zamanda bizə öz real gücümüzü, mənəvi bütövlüyümüzü dərk etməyimizin qayıdışı idi və bununla Azərbaycan özünün müstəqillik tarixinin daha şərəfli, daha əzəmətli bir mərhələsinə qədəm qoydu. H.Əliyev bu gəlişlə Azərbaycanı ucaltdı, eyni zamanda da Azərbaycan da onu ucaltdı.

Heydər. Əliyevin yenidən hakimiyyətə qayıdışı ilk növbədə Azərbaycanın varlığını və müstəqilliyini, dövlətçiliyini qoruyub saxladı. Ölkəni parçalanmaqdan, vətəndaş müharibəsindən, xalqımızı qul vəziyyətinə düşməkdən xilas etdi.

Azərbaycanın qarşısında duran çətin problemlərin böyük bir qismi həll edildi. Digər problemlərin həlli üçün əsaslı zəmin yaradıldı. Bütün bunlara görə Heydər Əliyevin adı Azərbaycanın müasir siyasi tarixində əbədi olaraq qalacaqdır.

Xarici ölkələrlə iqtisadi, siyasi əlaqələr yaradıldı, beynəlxalq münasibətlər yaxmlaşdırıldı. Azərbaycan həqiqətləri dəstəkləndi və bir çox yüksək dairələrdə müdafiə olundu. Dünya Azərbaycan adlı bir dövlətin rəhbərinə-Heydər Əliyevə bir daha inandı və Azərbaycanın müstəqilliyinin dönməz, əbədi olacağını yəqin etdi: Ümummilli liderimiz Azərbaycanın müstəqillik tarixinə nəzər salarkən bu müstəqilliyin qorunub saxlanılmasını, həm də dövlətçiliyimizin məhvinə yönəldilən səyləri təhlil edib qiymətləndirərkən çox düzgün olaraq qeyd edirdi ki, "Müstəqilliyin əldə olunması nə qədər çətindirsə, onun qorunub daimi, əbədi olması ondan daha çətindir". Heydər Əliyev öz zəngin təcrübəsinə, dərin düşüncəsinə, böyük dünyagörüşünə, xalqının və dövlətinin keşməkeşli tarixinə əsaslanıb bu fikirləri söyləyir və həmişə də Azərbaycanın müstəqilliyini əbədi etmək, dövlətçiliyini möhkəmləndirmək üçün həyatını qurban verməyə belə hazır olduğunu bildirirdi.

Xalqımızın öz rəhbərinə sonsuz sədaqəti məhəbbəti və Heydər Əliyev müdrikliyi cəsarət müstəqilliyimizin əbədiliyinə, dönməzliyin və gələcəyinə uğurlu yol açdı, ona əbədi zəmanət verdi Bu yol, bu siyasət Azərbaycan Respublikasının Prezidenti Cənab İlham Əliyev tərəfindən bu gün uğurla davam etdirilir.

Azərbaycan iqtisadi inkişafına görə bu gün dünyada öncül yerlərdən birini tutur. Demokratik inkişaf, dövlət quruculuğu, mədəniyyət, təhsil, səhiyyə, ordu quruculuğu sahəsində mühüm nailiyyətlər əldə edilmişdir. Beynəlxalq aləmdə ölkəmizin rolu və nüfuzu durmadan artır və möhkəmlənir. Azərbaycanın ərazi bütövlüyünün təmin edilməsi, Ermənistan-Azərbaycan, Dağlıq Qarabağ münaqişəsinin beynəlxalq hüquq normaları əsasında həll edilməsi üçün ölkə Prezidentini tutduğu mövqe, yeritdiyi siyasət xalqımız tərəfindən yüksək qiymətləndirilir.

Bu gün doğurdan da, Azərbaycan sabaha ümidlə, inamla addımlayır. Bu ümidi, inam xalqımızda ümummilli liderimiz Heydər Əliyevin siyasi kursunun uğurla davam etdirilməsi yaradır. Cənab Prezidentimiz İlham Əliyevin dediyi sözlər deyilən fikirləri təsdiqləyir: "Qarşıda duran bütün vəzifələri yerinə yetirmək üçün Heydər Əliyevin siyasəti davam etdirilməlidi. Bu siyasət bu gün də Azərbaycana lazımdır, sabah da lazım olacadır. Mən seçkilərdən əvvəl bu siyasətə sadiq olacağımı və ondan dönməyəcəyimi demişdim, indi siz görürsünüz ki, mən həqiqətən bu siyasətə sadiqəm və bir addım da geri çəkilməyəcəm. Biz yalnız irəliyə və yeni qələbələrə doğru addımlayacağıq"

Müasir Azərbaycanı yaradan, yaşadan və onun əbədiliyini təmin edən Heydər Əliyev siyasi kursunun ən layiqli və etibarlı davamçısı möhtərəm Prezidentimiz İlham Əliyevin bu kursa sədaqəti hər bir azərbaycanlıda iftixar hissi doğurur. Bu inam xalqımızın işıqlı gələcəyinə təminat yaradır və Heydər Əliyev adı ürəklərdə yaşayır və həmişə bizimlədir.

Ədalət 2018.- 4 dekabr.- S.5.