Aprel şəhidinə həsr olunmuş kitab təqdim olundu

Cəmşid Naxçıvanski adına hərbi liseyin təlim tədris mərkəzində 2016-cı ilin aprelində Azərbaycanın ərazi bütövlüyü uğrunda gedən döyüşlərdə qəhrəmancasına şəhid olmuş, ölümündən sonra " Azərbaycan bayrağı" ordeninə layiq görülmüş Mİ-24 hərbi helikopterinin ekipaj üzvü, baş leytenant Əbu Bəkr Vüqar oğlu İsmayılovun doğum günü şərəfinə AMEA N.Gəncəvi adına Azərbaycan ədəbiyyatı muzeyinin Aran regional şöbəsinin müdiri, filologiya üzrə fəlsəfə doktoru Yaqut Bahadurqızının şəhidin qısa, lakin şərəfli həyatından bəhs edən "Hay ver mənə, cənab leytenant" kitabının təqdimat mərasimi keçirilib.

Tədbirdən öncə liseyin kursantları müəllim və komandir heyəti, şəhidin ailə üzvləri və yaxın dostları II Fəxri xiyabanda Əbu Bəkr İsmayılovun məzarı önünə əklil və tər çiçəklər qoyaraq xatirəsini yad ediblər.

Mərasim Azərbaycanın suverenliyi və torpaqlarımızın düşmən həmləsindən qorunması uğrunda şəhid olanların xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlanıb.

Tədbiri giriş sözü ilə C.Naxçıvanski adına hərbi liseyin şəxsi heyətlə iş üzrə şöbə rəisinin müavini, mayor Natiq Rəhimov açaraq hərbi liseyin məzunlarının qəhrəmanlıq ənənələrindən danışıb və vurğulayıb ki, Əbu Bəkr İsmayılov bu ənənənin layiqli davamçısı olaraq kursantlara nümunədir. O, "Hay ver mənə, cənab leytenant" kitabını şəhid pilotun şərəfli ömrünü işıqlandıran dəyərli yaradıcılıq nümunəsi kimi qiymətləndirib.

Liseyin kimya müəllimi Flora Hüseynova sevimli şagirdi ilə bağlı kövrək xatirələrini bölüşüb. Tədbirə qonaq qismində dəvət olunan Xalq artisti, qocaman diktor Eldost Bayram çıxışında hər bir şəhidin həyatının ədəbi əsərlərdə işıqlandırılmasının vacib olduğunu qeyd edərək kitabdan bir parçanı tamaşaçılara oxuması ilə hər kəsi kövrəldib.

Tədbirdə Milli Mədəniyyətin Təbliği İctimai Birliyinin Rəhbəri Jalə Cəfərova, şəhidin qardaşı Əkbər İsmayılov da şəhidlərimizin xatirəsinin anılmasının, onların ədəbi əsərlərdə yaşadılmasının gənc nəsil üçün yaxşı örnək ola biləcəyini vurğulayıblar.

Şəhidin anası Rəna İsmayılovanın çıxışında bütün şəhid analarını dözümlü olmağa, şəhid övladları il öyünməyə, kursantları şəhidlərimizin qanını almağa, Vətəni işğaldan azad etməyə səsləməsi kursantların, hərbiçilərin onu ayaq üstə sürəkli alqışlaması tədbir iştirakçılarına təsirli anlar yaşadıb.

Lisey kitabxasının müdiri Zemfira İsmayılova, kitabxananın əməkdaşı Vahid Məhərrəmli və Ədəbiyyat müəllimi Gülsəda Amanqızının rəhbərliyi ilə kursantların hazırldığı bədii proqram tədbirə xüsusi ahəng verdi.

Sonda "Hay ver mənə, cənab leytenant" kitabının müəllifi Yaqut Bahadurqızı çıxış edərək vətən qarşısında borcunu şərəflə ödəyən şəhid Əbu Bəkr İsmayılovun ruhu qarşısında bir ziyalı kimi qəlb rahatlığı tapdığını bildirdi və lisey rəhbərliyinə xüsusilə rəis müavini Kamran Nəsibova tədbirin keçirilməsinə göstərdiyi dəstəyə görə minnətdarlığını bildirdi.

Tədbir yığıncaq iştirakçılarının ayaq üstə alqışları ilə marş sədaları altında Azərbaycan bayrağının kursantlar tərəfindən səhnəyə gətirilməsi ilə başa çatdı.

Ədalət.-2018.-16 vefral.-S.6.