"Ömrün mətbuatda keçən 50 ili"

Tərtər Rayon Gənclər Mərkəzində "Yeni Tərtər" qəzetinin redaktor müavini, "Qızıl qələm" mükafatı laureatı Svetlana Bağırovanın əmək fəaliyyətinin 50 illiyinə həsr olunmuş "Ömrün mətbuatda keçən 50 ili" adlı tədbir keçirilib.

Tədbirdə rayon ictimaiyyətinin nümayəndələri ilə birgə rayon icra hakimiyyətinin başçısı Müstəqim Məmmədov, Azərbaycan Mətbuat Şurasının İdarə Heyətinin üzvü, Avrasia Mətbuat Fondunun sədri Umud Mirzəyev, Respublika Mətbuat Şurasının Ahıl Jurnalistlər Məclisinin Qarabağ bürosunun sədri Ziyəddin Sultanov, "Yeni Tərtər" qəzetinin kollektivi, jurnalistin keçmiş iş yoldaşları və ailə üzvləri iştirak ediblər.

Tədbiri giriş sözü ilə rayon icra hakimiyyətinin başçısı Müstəqim Məmmədov açaraq Svetlana Bağırovanı təbrik edib və sözü məruzə etmək üçün "Yeni Tərtər" qəzetinin redaktoru Tofiq Yusifə verib. Tofiq Yusif Svetlana Bağırovanın həyat və fəaliyyəti barədə danışaraq bildirib ki, o, 1968-ci ildə 17 yaşında "Yeni Tərtər" qəzetində əmək fəaliyyətinə başlayıb, rayonumuzun ilk ali təhsilli qadın jurnalistidir. 50 il rayon qəzetində çalışmaq və buna baxmayaraq respublikada istedadlı qələmi tanımaq hər kəsə qismət olmur. Svetlana Bağırovanın özünün dediyi kimi qəzet artıq onun həyatının bir parçasına çevrilib.

Dəfələrlə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun xətti ilə keçirilən fərdi jurnalist yazılarının müsabiqəsində iştirak edərək, I, II, III yerləri tutub, fəxri fərman və pul mükafatları ilə təltif olunub.

O, istedadlı jurnalist, gözəl ana, sədaqətli ömür-gün yoldaşıdır.

Sonra Azərbaycan Mətbuat Şurasının İdarə Heyətinin üzvü Umud Mirzəyev, Mətbuat Şurasının Ahıl Jurnalistlər Məclisinin Qarabağ bürosunun sədri Ziyəddin Sultanov Svetlana Bağırovanın həmkarları Həmid İbrahimov, Elfuzə Vəliyeva, Svetlana Əzizova, qəzetin ictimai müxbirləri Zabil Zeynalov, Səbuhi Kərimov, Fitat Əliyeva, Vəsilə Mehdiyeva, Azad Abbasov, rayon Təhsil şöbəsinin müdiri Surxay Mirzəyev, Aprel şəhidi Nicat İsgəndərovun anası Maya İsgəndərova və başqaları çıxış edərək jurnalisti əmək fəaliyyətinin 50 illiyi və "Mətbuatda keçən ömrün 50 ili" adlı kitabın çapdan çıxması münasibətilə təbrik edib, ona yaradıcılıq uğurları arzulayıblar.

Sonra Svetlana Bağırova çıxış edərək göstərilən diqqət və qayğıya görə tədbir iştirakçılarına minnətdarlıqlarını bildiriblər.

Jurnalist Svetlana Bağırova respublika Mətbuat Şurası və rayon icra hakimiyyəti tərəfindən fəxri fərman və qiymətli hədiyyələrlə təltif olunub.

Tədbirin sonunda xatirə şəkli çəkilib.

Elçin ABBASOV

Ədalət 2018.- 2 may.- S.6.