Avtoportretvari

Sabir Cümşüd

İki yol tutmuşam

Kamil yaşımdan,

Qoşa yola salıb

məni bu həyat.

Nə qəlbimdən çıxır,

nə də başımdan,

Şeir vurğunluğu,-

Iqtisadiyyat.

Biri nə müddətdi çörək ağacım,

Süfrəmin bəzəyi neməti, varı.

Misra çələnglərdən o biri tacım,

Arzumdu qış-bahar solmasın barı.

İlhamdan qəlbə toy, düyün düşəndə,

Fidan misralarım qol-budaq atır,

Beynimdə rəqəmlər düyün düşəndə,

Şerimin yaşılı dadıma çatır.

Ömürdən gündən

Yurdu sevib məkan kimi,

Qəlbi verib təkan kimi,

Baş işlədib sükan kimi.

Çətin həyat yollarında,

Ömrü sürmək istəyirəm.

Dünya ömrü, dağ yaşları,

Keçilməz dağ-daşları,

Bayraq yeri dağ başları,-

Orda arzu yollarıyla,

Zəfər görmək istəyirəm.

Musiqi bir muraz atım,

Onsuz ruhum atım-atım,

Bir aləmdir muğamatım,-

Ora-kaman qollarıyla,

Bir yol hörmək istəyirəm.

Uşaqlığım bir şəhərdə,

Cavanlığım bar bəhərdə,

Qocalığım pir şəhərdə,

Axarımın lallarıyla,

Nəfəs dərmək istəyirəm.

Astara buludları

Sellənəndə qış qarı,

Yer çimib yazlanardı.

Astara buludları,

Səpinə sazlanardı.

Başbaşa gələrdilər,

İldırım doğulardı.

Atəş

Su, ələrdilər,

Sükunət boğulardı.

Toxum tək səpilərdi,

Gül-çiçək yağışları.

Ləklərə təpilərdi,

Çiyələk yağışları.

Torpağı təpələrdi,

Göbələk yağışları.

Güllərdən, çiçəklərdən,

Arılar ballanardı.

Allı çiyələklərdən,

Dodaqlar allanardı,

Xallı göbələklərdən,

Ağızlar sulanardı.

Astara buludları,

Bulud köhləni çapın,

Şəhərdə məni tapın.

İnam toxumu səpin,

Bir yaşlı balanızın,

İtir, batır yaşılı,

Sizinlə qəlbə satsın,

Qoy rənglərin xaşılı.

Olum, ölüm nəğməsi

Nə müddətdi bir kürədə,

İnsanlıq bar gətirir.

Yazlı, qışlı bir kürədə,

Dünya bizi yetirir.

Dəmirçimiz varını,

Bu həyata ötürür.

Kimi biçinçi olur,

Kimi çəkic götürür.

Çəkic-oraq yürüşü,

Ömrü biçir, bitirir.

Mənzilıinin başına,

Əldən salıb yetirir.

Biz dünyanı itirik,

Dünya bizi itirir.

Toxum kimi səpilirik,

Bizdən məzar bitirir.

Astaraçay

Bu çay Astara çayı,

Şəhərə ara çayı.

Çay bəxti qara çayı,

Gündüzü də gecəsi.

Dəryada inci dəndi,

Suları incidəndi.

Elləri incidəndi,

Bu ayrılıq küçəsi.

Suyu göy, damar kimi,

Üstə göy damar kimi.

Hicran suda mav kimi,-

Nə vaxt ondan köçəsi.

Yaraşıqdı Astara,

Həm üzə, həm astara.

Sədəfindən as tara,

Çoxdu inci külçəsi.

Körpüsü,

Nəhri yarı.

Balaca şəhri yarı,

Olmadı Şəhriyarı,

Daha ondan keçəsi...

Lerikdən boylananda

Navalçalar

yağış havası çalar,

Çölündə

Güllərlə hər rəngdən çalar,

Lerik meşələri zümrüdə çalar,-

Lerik üzüyünün qaşı olarlar.

Qaratikanları kirpi kimidi,

Yaşıl fidanları körpə kimidi,

Dəmirağacları gerbi kimidi,

Dəmirdən torpağın yaşı olarlar.

Meyvəsi sulandı,

paylar paylanır.

Biçini başladı

taya taylanır.

Minbir bulağıyla çaylar çayıanır,

Qurumuş Ləpələr daşı olarlar.

Arısı bəxtəvər gülü şirəli,

Eli şir ürəkli

əllər şir əli,

Yetişər nə qədər Mahmud, Şirəli,-

Adamlar dağlarla yaşıd olarlar.

Yaş kağızlarımız

Doğum kağızları,

Yaş sənədimiz.

Dünyaya baş vurduq,-

Baş sənədimiz.

Onun təməli üstə,

Böyüyüb boy atırıq.

Arzu, əməli üstə,

Özümüzə çatırıq.

Ömrümüzün axarı,

Kağızdan yaş sənədi.

Ömrümüzün axırı,

Məzardan daş sənədi.

Zəka məşəlinə

(zəmanətiylə birliyə üzv olduğum Yaşar Qarayevə)

Çox zaman elə sandım,

Sönüb odum, atəşim.

Gora dönüb də yandım,

Tutulanda günəşim.

Təslimçiliyə uyub,

Varağı ağ istədim.

Gələmi yerə qoyub,

Əı qaldırmaq istədim.

Bir əlyazma,-yadigar,

Əmanətdən utandım.

Mənə inam, etibar,

Zəmanətdən utandım.

Bir insana başarı,

Yaşar əmanətidi.

Bir qələmə yaşarı,

Yaşar zəmanətidi.

Nəğmə

Bir gözələ çiçək verdim,

Dedim buta tik anına.

Əvəzində əzab gördüm,

Batdım bir gül tikanına.

Vurulanda gözaltına,

Yanmağı al göz altına

Ürək düşər köz altına,

Düşsə sevgi məkanına.

Dedim olma qəlbi qara,

Atdı yanar qəlbi qara.

İstəmədim qəlbi qıra,

Tab etmədi təkanına.

Bu gözəli kim qarıdı,

Ürəyi quzey qarıdı.

Göylə gedibdə qarıdı,

Yandım yerdə tək anına.

Bayatı üstə

Çiçəklərə arı bəzək,

Göyçəklərə arı bəzək.

Yara yarı

Sudan duru,

Bir də aydan arı bəzək.

Yaylaqda gül sarı-sarı,

Cığır çıxır ona sarı.

Tikanlasa yar kipriyi,

Sarı güllə sarı, sarı.

Bənnalara barı hörmək,

Bağbanlara barı görmək,

Eşqiylə can verənlərə,

Vüsalını barı görmək.

Qamışa ney can kimidi,

Qırmızı mey dan kimidi.

Fəraridi ondan qaçan,-

Məhəbbət meydan kimidi.

Ədalət.-2018.-15 sentyabr.-S.14.