Dünyanın diqqətində olan parad!

10 dekabr 2020-ci il Azərbaycan tarixində yaddaqalan günlərdən biri oldu. Həmin gün müzəffər Ordumuz 44 günlük müharibədə göstərdiyi əfsanəvi qəhrəmanlığın hər bir anını özündə ifadə edən düşməndən götürülmüş hərbi qənimətləri də meydanda nümayiş etdirirdi. Bu təntənəli mərasimdə "Bir millət, iki dövlət!" olan Azərbaycan və Türk Ordusu dünyanın gözü qarşısında çiyin çiynə dayanmışdı. Bax bu idi Türkün böyüklüyü! Bax bu idi bizim bir millətin Ordusunun qüdrəti! Onu bütün dünya gördü, bir daha tanıdı və hələ zaman-zaman da bu möhtəşəm paradı tədqiq edəcək və düşmənlər yuxularını qarışdıracaqlar!..

Biz bir xalq olaraq həmin gün yaşadığımızın təəssüratlarını öyrənmək üçün oxucularımıza üz tutduq:

Professor Qulu Məhərrəmli: “Tarixi Zəfər paradının bu şəkildə möhtəşəm keçirilməsi çox vacib idi: Xalqın içində kök salmış ağrı-acılarla yanaşı, özünə yer eləmiş məğlubiyyət havası da sürətlə əriyib gedir, onun yerini şüurlarda möhkəmlənən “qalib xalq” və “qalib ordu” obrazı tutur. Belə psixoloji üstünlük şəraitində oyanmış milli ruhu milli qürur və milli heysiyyət qidalandırır. Qarşıdakı milli problemlərə bu prizmadan baxanda onların həllini də dəqiq görə bilirsən. Deməli, önəmli olan bu tarixi Zəfərin qazanılması idi.

44 günə bu Zəfəri qazanan Xalqa, Orduya, Ali Baş Komandana və bir də ürəyi daim bizimlə döyünən Türkiyəyə dərin ehtiramlar!”

Professor Vüqar Əhməd: “Zəfər paradı Azərbaycan tarixində qızıl hərflərlə yazılan tədbir, ən şanlı səhifəmiz idi. Paradı göz yaşları ilə izləyirdim. Sevincdən ağlamışam. Türkiyə Cümhuriyyətinin Prezidenti Rəcəb Tayyib Ərdoğanla Ölkə Başçımız Cənab İlham Əliyevin çıxışları o qədər məzmunlu, o qədər Vətənpərvər, Türkçülük ruhunda, siyasi tarixi idi ki, mən hər ikisi ilə fəxr elədim. Allah hər iki Prezidenti Türk dünyasına çox görməsin. Hər ikisinin gözəl natiqlik qabiliyyəti, siyasi-tarixi savadları çox qürurverici idi.

Bilirsiniz, Azərbaycan tarixində torpaqlarımızın birləşdirilməsinin nəticəsində keçirilən ilk qələbə paradı idi. Bu parad ermənilər üçün göz dağı idi. Bu parad bütün Türk dünyasının paradı idi.

Paradla bağlı bir məqamı qeyd etmək istəyirəm ki, bununla bağlı da bir şeyi deyim, o vaxt bizim məcburi köçkünləri ermənilər dədə-baba torpaqlarından qovanda maşınlarını da ələ keçirmişdilər. Bax ələ keçirilmiş o maşınların nömrələrindən hasar tikmişdilər. İndi biz onlara göstərdik ki, o maşınların əvəzində sizin hərbi qənimətlərin nömrələri üzərində biz “Qarabağ Azərbaycandır!” yaza bilərik və yazdıq. Cənab Prezidentimiz sağ olsun. O nömrələrdən hazırlanmış tablo ermənilər üçün tərs şillə idi.

Paradda çox yaddaqalan məqamlar var idi. Digər vacib bir məsələyə toxunum. Cənab Prezident paradda söylədi ki, İrəvan, Zəngəzur, Göyçə də bizim tarixi torpaqlarımız olub. Bu sözləri Ali Baş Komandanın dilindən eşitmək gözəl idi.

Mən yenə də deyirəm, Allah xalqımızı, Türk dünyasını, Cənab Rəcəb Tayyib Ərdoğanı və Cənab İlham Əliyevi qorusun. Qarabağ Azərbaycandır!”

Xalq artisti Mənsum İbrahimov: “Paradla bağlı o qədər gözəl hisslərim var ki. Ölkəmlə, Dövlətimlə, Ordumuzla, Xalqımızla qürur duydum. Dünən bir daha Xalq Ordusu ilə birləşdi. Məni ən çox qürurlandıran Türk Ordusunun Azərbaycan Ordusu ilə paradda birgə iştirakı idi. İnsanların əlində, şəhərin hər tərəfində Türkiyə və Azərbaycan bayraqları dalğalanırdı. Bu dünyaya bir mesaj idi ki, bu millət birdir və kimsə ayıra bilməz. Bununla yanaşı erməni maşınlarının nömrələrinin lövhədə həkk olunması başqa qürur idi. Xatırlayırsınızsa, ermənilər demişdi ki, bizim texnika Bakıya yeriyəcək. Onların texnikası Bakıya gəldi, amma hərbi qənimət kimi. Ermənistan hər tərəfli məğlub olmuş ölkədir. Orada artıq matəmdir. Artıq bizim ölkəmizə kimsə təcavüz edə bilməz. 44 gün ərzində dastan yazmış bir dövlətik. İnşaAllah ki, Qarabağda quruculuq işləri görəcəyik, orada festivallar, tədbirlər keçirəcəyik.

Bir mədəniyyət xadimi, vətəndaş kimi paradı görüb qürurlandım, gözlərim doldu. Bütün bunları Şəhidlərimizin ruhuna borcluyuq. Biz Şəhidlərimizə görə torpaqlarımızı qaytardıq. Allah Şəhidlərimizə rəhmət eləsin”.

Publisist, filologiya üzrə fəlsəfə doktoru Natəvan Dəmirçioğlu: “Zəfər Paradı böyük bir hərbi quruculuq siyasətinin məntiqi nəticəsi idi. Eyni zamanda, iqtisadi cəhətdən güclənmə, siyasi cəhətdən formalaşma, beynəlxalq arenada təşkilatlanma, daxili sturukturda möhkəmlənmə və mənəvi-psixoloji cəhətdən yetkinləşmə prosesinin kulminasiyası idi. Biz qalib ölkənin Lideri olan Prezident İlham Əliyevin rəhbərliyi ilə dövlət və xalq olaraq bu gün üçün hazırlaşdıq, səfərbər olduq, döyüşdük və qələbə qazandıq.

Azərbaycanın yüz illik müstəqil dövlətçilik tarixində cəmi 7 hərbi paradı keçirilib. Bunun 5-ni Cənab İlham Əliyev keçirdib. 2008-ci ildə ilk paradı, 2011-ci ildə II paradı, 2013-cü ildə Silahlı Qüvvələrin 95 illik yubiley paradını, 2018-ci ildə Ordumuzun 100 illik möhtəşəm paradını keçirtdi. Nəhayət, 2020-ci ildə “Dəmir yumruq” əməliyyatının sonunda müzəffər Ordusundan Qalibiyyət Paradını-Zəfər Paradını qəbul etdi!

Bir məsələni də qeyd etmək istəyirəm ki, hələ Ermənistan hökuməti qondarma Dağlıq Qarabağ respublikasının qanunsuz prezident seçkilərini dəstəkləyərək, Arayik Harutyunyanın inaqurasiya mərasimində iştirak etmək üçün böyük heyətlə Şuşaya gəlməyini planlaşdıranda, bizim cəmiyyətdə Şuşanı və ya Xankəndi aeraportunu vurmaq üçün çağırışlar səslənirdi. Hətta kifayət qədər ziyalı, siyasi baxımdan savadlı insanlarımız da Ali Baş Komandandan bu addımı gözləyirdilər. Artıq trendə çevrilmiş “Vur komandir, vur!” sözlərini sosial mediada gündəmə çıxartmışdılar. Cənab Prezident neylədi? Siyasi yetkinlik göstərdi. Ali Baş Komandan beynəlxalq hüququn yol verdiyi imkanları götür-qoy etdi, dövlətin hərbi strategiyasını və taktikasını nəzərdən keçirdi. Tam zamanında əks-hücum əməliyyatına dair əmr verdi və hərbi arsenalı səfərbər etdi. Müharibəni həm hərbi, həm siyasi, həm də informasiya cəbhəsində paralel apararaq, demək olar ki, hər gün daxili və xarici auditoriyaya açıqlama verdi. Beynəlxalq hüquqdan bir zərrə belə kənara çıxmadan xalqı, ordusu ilə birlikdə mütəşəkkil Vətən müharibəsi apardı. Nəticə təbii olaraq Zəfər Günü ilə sonlandı. Uzaqgörən siyasətin nəticəsində, Şəhidlərimizin Vətən torpağını suvaran müqəddəs qanı bahasına və qazilərimizin igidliyi sayəsində biz bu gün qalib xalqıq. Qalib xalqın Zəfər Paradını yüksək coşqu ilə keçirdik. Qələbəmiz mübarək və baqi olsun! Azərbaycanın Zəfər Paradı siyasi mahiyyəti, coşqusu ilə bərabər, mühüm mesajları ilə tarixin yaddaşında qalacaq!”

Rövşən Tahir

Ədalət.- 2020.- 12 dekabr.- S.3.