Pəncəli Teymurova Milli Qəhrəman adı veriləcək?

Xəbər verdiyimiz kimi, sosial şəbəkələrdə 2016-cı il Şanlı aprel döyüşlərində qəhrəmancasına şəhid olan Xüsusi Təyinatlı hərbçi şəhid Pəncəli Teymurova Azərbaycanın Milli Qəhrəmanı adı veriləcəyi ilə bağlı xəbər yayılıb.

Adalet.az-ın əməkdaşı məsələylə bağlı Pəncəli Teymurovun qardaşı Famil Teymurovla əlaqə saxlayıb.

Şəhid qardaşı saytımıza açıqlamasında bildirib ki, bununla bağlı onlar da xəbəri sosial şəbəkədən öyrəniblər:

“Pəncəlinin iş yoldaşları “teleqram” kanalında xəbəri görüb bizə göndərmişdilər. Biz həmin xəbəri yayan adamın kim olduğunu bilmirik, amma mən də o xəbəri paylaşmışam. Bizə bildirilib ki, komandanlıq tərəfindən Pəncəliyə Milli Qəhrəman adı verilməsi ilə bağlı təqdimat verilib. Bunun nə vaxt olacağını isə bilmirik. Pəncəliyə Milli Qəhrəman adının verilməsi ilə bağlı bizə qonaq gələn general-polkovnik Hikmət Mirzəyevə və Xüsusi Təyinatlıların yeni təyin olunan komandiri, general-mayor Ələkbər Cahangirova da demişdik. O söz verdi ki, təqdimat verəcəm. Sonra öyrəndim ki, Ə.Cahangirov təqdimat verib. Düşünürəm ki, bu xəbər yalan olmaz”.

Qeyd edək ki, şəhid Pəncəli Teymurov aprelin 11-də doğulduğu Astara rayonunun Əzərüd kəndində torpağa tapşırılıb. 1981-ci il təvəllüdlü Pəncəli Teymurov hərbi xidmətini başa vurduqdan sonra könüllü olaraq, xidmətini davam etdirib. Yüksək bacarıq və peşəkarlığı, nümunəvi xidməti nəzərə alınaraq o, 24 iyun 2015-ci ildə Azərbaycan Respublikası Prezidentinin sərəncamı ilə “İgidliyə görə” medalı ilə təltif olunub. 2016-cı il Şanlı aprel döyüşləri zamanı isə qəhrəmancasına şəhid olub. Ölkə başçısının göstərişi ilə ölümündən sonra “Vətən uğrunda” medalıyla təltif edilib.

Allah cəmi şəhidlərimizə rəhmət eləsin!

Vasif ƏLİHÜSEYN

Ədalət .- 2025.- 7 noyabr (№42) .- S.7.