"ƏLİ İSAYEV ERMƏNİ GÜLƏŞÇİSİNİN KÜRƏYİNİ YERƏ VURDU"

Bu sözləri bizimlə söhbətində Güləş Federasiyasının vitse-prezidenti Elçin Cəfərov dedi

- Elçin müəllim, bu gün idmançılarımızın və eləcə də pərəstişkarların sevincinin həddi-hüdudu yoxdur. Axı asan deyil, Azərbaycan güləşçiləri Vilnüsdə möhtəşəm qələbə qazanıb.

- Bu qələbəni biz asanlıqla əldə eləməmişik. Çünki qələbəyə gedən yolun çox enişli-yoxuşlu anları olub.

- İrandan Dünya kubokunu Azərbaycana gətirən güləşçilərimiz Vilnüsdə xarüqələr yaratdılar. 5 qızıl, 2 gümüş, 2 bürünc medal. Bundan böyük sevinc ola bilməzdi.

- Sərbəst güləşçilərimiz komanda hesabı ilə Vilnüsdə keçirilən Avropa çempionatında birinci yerə çıxdı. 5 qızıl medal qazandıq. Bunun özü bilirsiniz nə deməkdir? Yəni biz sübut elədik ki, Dünya kubokunun təsadüfən sahibi olmamışıq.

- Avropa çempionatının canlı yayımla verilməsi döşək üzərinə çıxan hər bir güləşçimizin tamaşaçılar tərəfindən maraqla izlənməsinə şərait yaradırdı. Hər bir güləşçimiz qələbə uğrunda son saniyəyə qədər mübarizə aparırdı. Bizcə, bunların arasında Əli İsayevin erməni güləşçisinin kürəyini yerə vurmağı çox möhtəşəm bir qələbə oldu.

- Əli İsayev İranda da son saniyələrdə qazandığı qələbə ilə Dünya kubokunun ölkəmizə gətirilməsinə əsas təkan vedi. Burda da iki dəfə püşk erməni güləşçisinin xeyrinə çıxsa da, son saniyələrdə Əli İsayev gözəl fənd işlədərək möhtəşəm bir qələbə qazandı. Bu qələbənin sevinci bizim hər birimizin ürəyində qürur yaratdı ki, ermənilərdən qat-qat güclüyük və istənilən vaxt da onların kürəyini yerə vurmağı bacarırıq. Allah qoysa, Qarabağı da belə bir güclə geri qaytaracağıq.

- Qızıl medal qazanan digər sərbəst güləş üzrə idmançılarımız da əsl kişilik göstərərək rəqiblərinə üstün gəldilər.

- Əlbəttə, Zəlimxan Hüseynov, Camsulvara Camsulvarayev, Xetak Qazyumov qızıl medal qazanıblar. Onların son ana qədər döşək üzərində inamlı mübarizə aparması hər şeyi həll edib.

- Qadın güləşçilərimiz də Vilnüsdə keçirilən Avropa çempionatında yaxşı güləşiblər. Bizcə, onların da əməyi qiymətləndirilməlidir.

- Qadın güləşçimiz Mariya Stadnik rəqibini məğlub edərək qızıl medal qazandı. Onun inamlı mübarizəsi bizim hər birimizi sevindirirdi. Çünki Mariya görüşün ilk anından rəqibindən qat-qat güclü olduğunu göstərə bilirdi. Ondan sonra Zümrüd Qurbanhacıyeva da finala çıxdı. Düzdü, o, finalda rəqibini məğlub edə bilmədi, amma Zümrüd də yaxşı güləşdi. O, gümüş medalı əldə elədi.

- Elçin müəllim, Azərbaycan güləşçiləri Vilnüsdə keçirilən Avropa çempionatında görünməyən bir qələbə qazandı. Amma yunan-roma güləşi üzrə mübarizədə idmançılarımız bir o qədər də yaxşı nəticə əldə etmədi.

- Əvvəllər Dünya, Avropa və Olimpiya yarışlarında yunan-roma güləşçilərimiz qızıl, gümüş medal qazanıblar. Ancaq son vaxtlar bu sahədə bir balaca problemlərimiz var. Vilnüsdə keçirilən Avropa çempionatında yunan-roma güləşi üzrə yarışda Şalva Qadavidze bürünc medal qazandı. Təbii ki, bizim imkanlarımız daha böyük idi. Yəni sərbəst güləşçilərimiz kimi, yunan-roma üzrə güləşçilərimiz də yaxşı nəticələr əldə etməli idi. Elə oldu ki, buna nail ola bilmədik.

- Avropa çempionatında yüksək yer tutmağımız güləşçilərimizdə arxayınçılıq yaratmayacaq ki?

- Xeyr. Əksinə hər bir qələbə güləşçilərimizdə yüksək ovqat hissi yaradır. Çünki Azərbaycan Güləş Federasiyası və onun rəhbərliyi idmançılarımızın yüksək nəticə qazanması üçün hər cür şərait yaradıb. Elə bu şəraitin nəticəsidir ki, güləşçilərimiz həm Avropa, həm Dünya, həm də Olimpiya yarışlarında yüksək yerə sahib çıxırlar. Qarşıda güləşçilərimizi daha mötəbər sınaqlar gözləyir. Çalışacağıq ki, həmin yarışlarda da idmançılarımız öz uğurlarını təkrar eləsin, qələbələrinin sayını artırsın.

Söhbəti yazdı: Faiq QİSMƏTOĞLU

Ədalət.- 2009.- 7 aprel.- S. 8.