"BULAQ ÜSTƏ BİTƏN SUSUZ LALƏYƏM"

Aprelin 7-də Azərbaycan Yazıçılar Birliyinin Natəvan klubunda dövri mətbuatda lirik-romantik şerləri ilə çıxış edən Xədicə Muradın "Bulaq üstə bitən susuz laləyəm" kitabının təqdimat mərasimi keçirildi.

Məclisi giriş sözü ilə YB-nin mətbuat xidmətinin rəhbəri şair Ədalət Əsgəroğlu açaraq Xədicə xanımın sayca 5-ci kitabının işıq üzü görməsi, həmçinin, ad günü münasibəti ilə təbrik etdi, şairənin yaradıcılığından, gördüyü xeyirxah işlərdən danışdı, sonra tədbiri aparmaq üçün sözü filologiya elmləri doktoru Asif Rüstəmliyə verdi.

Tədbirdə iştirak edən filologiya elmləri doktoru Teymur Kərimli isə öz çıxışı zamanı Xədicə Muradın yazdığı "Nizami və türklük" dissertasiyasının dünya ədəbiyyatşünaslığında lazımlı bir mövzu olduğunu söylədi: "Hal-hazırda onun əsəri ingilis dilinə tərcümə olunur. Xədicə Muradın ictimai fəaliyyəti vətənimizin inkişafı naminə yönəlmişdi".

Tədbirdə iştirak edən şairə Fəridə Ləman X.Muradın yaradıcılığından, şəxsi keyfiyyətlərindən söz açdı: "Ədəbiyyat zaman və məkanın qovuşduğu yerdir. Əgər müəllif o zamanda öz sözünü deyə bilirsə, o, ədəbiyyatda qalacaq". Sonra F.Ləman şairəyə həsr etdiyi şeiri oxudu və "Məhsəti Gəncəvi" adına fəxri diplomu müəllifə təqdim etdi.

"Kitab evi" İctimai Birliyinin sədri Salatın Əhmədli isə öz növbəsində X.Muradı "Vətən naminə" diplomu ilə təltif etdi.

Təqdimat mərasimində Uşaq və Tələbə Gənclər Dünyası Birliyinin sədri Bəxtimşah Tağıyeva, şairlərdən Oqtay Rza, İsmayıl Həkimli, Zərəngiz Dəmirçi, Aidə Şükürlü, Azərbaycan MEA-nın əməkdaşı Abuzər Bayramov və başqaları çıxış edərək X.Muradın söz dünyasından, poetik düşüncələrindən, gördüyü xeyirxah işlərdən, elm sahəsindəki fəaliyyətindən və digər uğurlarından danışdılar.

Sonda X.Murad çıxış edərək tədbirin keçirilməsinə görə Yazıçılar Birliyinin rəhbərliyinə və iştirakçılara öz təşəkkürünü bildirdi.

VÜSAL MƏMMƏDLİ

Ədalət.- 2009.- 10 aprel.- S. 8.