YAZ GÜNÜNÜN "YAŞIL İZLƏRİ"

Suraxanı rayonunda abadlıq işləri günbəgün vüsət alır

İndi məmləkətimizdə elə şəhər, elə rayon və elə qəsəbə yoxdur ki, orda nəsə yeni tikinti işləri görülməsin, yollar çəkilməsin, binalar inşa edilməsin, bir sözlə, abadlıq işləri görülməsin. Əlbəttə, insan harda yeni tikintini görür və abadlaşmanı hiss edirsə, bax, onda böyük sevinc içində olur. Amma elə ki, görürsən, hansısa bina uçulub-tökülür, yollar pis gündədir, hər tərəfi məişət tullantıları basıb, bax, onda adamın qanı qaralır.

Nə yaxşı ki, son illərdə məmləkətimizdə bu cür quruculuq və abadlıq işləri geniş vüsət alıb. Belə abadlıq və quruculuq işləri həmişə olduğu kimi, Suraxanı rayonunda da günbəgün artmaqdadır. Özü də bu işlər elə səliqəli, elə ustalıqla həyata keçirilir ki, bundan insanlar zövq alırlar.

Hələ Hacıbala Abutalıbov Suraxanı rayonunda icra başçısı işləyəndə demək olar ki, bu rayon Bakının digər rayonlarından abadlığına və təmizliyinə görə seçilirdi. Hətta bir neçə dəfə keçirilən abadlıq yarışlarında Suraxanı rayonu Bakı şəhərində birinci yerə çıxmışdı. Bu ənənə bu gün də demək olar ki, rayonda geniş əksini tapıb. Yəni rayonun Suraxanı, Yeni Suraxanı, Əmircan, Bülbülə, Zığ, Hövsan, Yeni Günəşli qəsəbələrində çox böyük abadlıq, quruculuq işləri görülür. Bir çox yerdə isə insanların istirahəti üçün parklar və xiyabanlar salınıb. Salınmış parklar və xiyabanlar öz gözəlliyinə və orijinallığına görə digərlərindən fərqlənir. Ən azından ona görə ki, bu parklarda fontanlar quraşdırılıb, əhalinin istirahəti üçün çox rahat şərait yaradılıb. Bununla yanaşı, rayonun əksər qəsəbələrində yollar əsaslı təmir edilib, asfaltlanıb və bütün problemlər aradan qaldırılıb. Hətta bir vaxtlar nəqliyyat vasitələrinin hərəkət etməkdə çətinlik çəkdiyi küçələrə belə asfalt örtüyü döşənib. Ayrı-ayrı qəsəbələrə Bakı qəsəbələrinin sosial-iqtisadi inkişafına dair dövlət proqramına uyğun olaraq, yeni yollar çəkilib, qaz xətti istifadəyə verilib və əhalinin içməli su ilə təminatı yaxşılaşıb.

Eyni zamanda rayon ərazisində mövcud olan onlarla məktəb və xəstəxana az bir müddətdə əsaslı təmir edilərək əhalinin istifadəsinə verilib. Bu isə bu və ya digər dərəcədə insanlara xidmətin səviyyəsinin yüksəlməsinə hərtərəfli təsir edib. Onu da qeyd eləmək istəyirik ki, rayonda əksər şənbə günləri icra hakimiyyətinin təşəbbüsü ilə iməciliklər keçirilir. Bu iməciliklər zamanı rayon ərazisində abadlıq, təmizlik işləri aparılır, yeni ağaclar əkilir və eyni zamanda əvvəllər əkilmiş yaşıllıqlara qulluq edilir. Son vaxtlar rayon ərazisində minlərlə ağac və bəzək kolu əkilib. Təkcə ağac və bəzək kolları əkilməklə işlər öz həllini tapmayıb. Həm də sirr deyil ki, əkilən ağacları isti havalarda böyütmək, onlara vaxtında su vermək lazımdı. Bəzən görürsən ki, vaxtında su verilməyəndə əkilmiş ağaclar quruyur və məhv olur. Amma bu məsələlər Suraxanı rayonunda çox yüksək səviyyədə öz həllini tapıb. Çünki Mənzil Kommunal Təsərrüfatı Birliyinin işçiləri davamlı olaraq isti günlərdə həmin yaşıllıqlara su verir, onların böyüyüb inkişaf etməsi üçün əllərindən gələn köməkliyi əsirgəmirlər. Hər bir yeni əkilən ağac isə təbiətin "ağ ciyər"i deməkdir. Əgər biz təbiətimizi qoruyuruqsa və yeni ağaclar əkməklə bu yaşıllıqları artırırıqsa, çox böyük xeyirxah işlər görmüş oluruq.

Suraxanı rayon icra hakimiyyətinin başçısı İlqar Abbasov rayonda qoyulmuş yaxşı ənənələri uğurla davam etdirərək özü də bir çox yeniliklərə imza atır, təkan verir. Birincisi, başçının göstərişi ilə hər həftə rayon ərazisində iməciliklər keçirilir və bu iməciliklər zamanı hər kəs öz üzərinə düşən işi yerinə yetirir. Yazın gəlişi isə rayonda qayğıları və təmizlik işlərini bir qədər də artırıb. Çünki yaz gələndə yenidən ağacların əkilməsinə və yaşıllıqların salınmasına böyük ehtiyac duyulur. Üstəlik də həmin yaşıllıqların qorunub inkişaf etdirilməsi də insanlardan böyük təpər istəyir. Hər səhər Mənzil Kommunal Təsərrüfatı Birliyinin işçilərini rayonun müxtəlif ərazilərində görmək olar. Gah onlar məişət tullantılarını daşıyır, gah hardasa səliqə-sahman yaradır, gah da yaşıllıqlara su verirlər. Onlar yaxşı bilirlər ki, bu yaşıllıqları əkənə və onu böyüdən adama kölgəsində əyləşəndə çoxları alqış deyir. Əlbəttə, bu dünyada alqış eşitməkdən savab iş yoxdur. Həmişə belə olub. Kimlərsə bir ağacın kölgəsində oturanda və bir bulağın gözündən su içəndə deyiblər ki, Allah bu savab işi görənin ölənlərinə rəhmət eləsin. İndi rəhmət qazanmaq və alqış eşitmək hər adama nəsib olmur. Amma xeyirxah iş görən adamlar zamanından və məkanından asılı olmayaraq həmişə bu alqışı eşidiblər.

Rayon icra hakimiyyətinin şöbə müdiri Barxudar Barxudarov deyir ki, bu cür xeyirxah işlərin görülməsi ilk növbədə insanların rahatlığına və yaxşı yaşamasına xidmət eləyir. Əgər kimsə öz övladı, yaxud da nəvəsi ilə gəzintiyə çıxanda gözəl bir parka gəlirsə və orda istirahət edə bilirsə, övladları dincəlirsə, məncə, bundan gözəl nə ola bilər. Bu mənada əhalinin istirahəti və asudə vaxtlarının maraqlı keçməsi üçün rayonumuzda hər cür şərait yaradılıb. Təbii ki, kimin ürəyi haranı istəyirsə, oranı da seçir və həmin yerdə istirahət eləyir. Gələcəkdə isə rayonumuzun ərazisində daha geniş abadlıq və quruculuq işləri görülməsi nəzərdə tutulub. Zaman-zaman biz bunları həyata keçirəcəyik.

İndi biz yaşıllıqlar və yeni əkilən ağaclar görəndə sevinirik. Ən azından ona görə sevinirik ki, bu otuz-qırx ilin ağacını nə yaxşı kəsməyiblər. Bu mənada Suraxanı rayonunda vəziyyət çox yaxşıdır. Bircə qalır insanların öz istirahətlərini necə qurmağına. Deməli, abad və gözəl yerdə insanlar da özlərini çox normal hiss edir və vaxtlarını mənalı keçirirlər.

Faiq QİSMƏTOĞLU

Ədalət.- 2009.- 10 aprel.- S. 4.