RAMİZİN TARI

Xalq artisti, muğam professoru

Ramiz Quliyevə ən doğma duyğularla

İşıqlar çiləndi tarın səsinə,

Xaliqin bu sirli möcüzəsinə.

Quş olub qonunca tar sinəsinə,

Yerləri, göyləri unutdu Ramiz.

"Segah"da bənövşə rayihəsi var,

"Heyratı" cəngində qalxan səsi var.

"Şur"da bulaqların zümzüməsi var.

Cilvə sədəflərdə "Rast" tutdu Ramiz.

Ayrılıq ağırdı,

hicran yamandı,

Bu tar tüfəng oldu,

Allah, amandı!

"Şuşanın dağları başı dumandı",

Orda köksü dolu buluddu Ramiz.

Alınmaz qaladı tarın şöhrəti,

Tar solmaz,

tar sönməz,

tar dönməz, qəti.

Səslədi qisasa bu mərd milləti,

Hər simdən bir qılınc yaratdı Ramiz.

Barmaqlar şam kimi alışıb yandı,

Quşlar yerə endi,

çaylar dayandı,

Tarın gur səsindən cahan oyandı

Tarı günəşlərə tanıtdı Ramiz.

Ramiz MƏMMƏDZADƏ

Ədalət.- 2009.- 16 aprel.- S. 8.