Dövlət Gömrük Komitəsi Mətbuat Xidmətinin məlumatı

Aprelin 29-da Dövlət Gömrük Komitəsinin sədri, gömrük xidməti general-leytenantı Aydın Əliyev Estoniya Respublikasının Vergi və Gömrük Şurasının baş direktoru Enriko Aavı və müavini Dmitriy Yeqorovu qəbul etmişdir.

Qonaqları səmimiyyətlə salamlayan Dövlət Gömrük Komitəsinin sədri Aydın Əliyev Azərbayjan ilə Estoniya arasında mövcud iqtisadi, siyasi, mədəni əlaqələrdən razılıqla söhbət açmış, Estoniya Prezidenti Toomas Hendrik İlvesin Azərbaycana rəsmi səfərinin ölkələrimiz arasında əməkdaşlığın yeni mərhələsinə təkan verdiyini vurğulamış, səfər zamanı azərbaycanlı həmkarı Prezident İlham Əliyevlə keçirdiyi görüşlərin, gerçəkləşən biznes forumun münasibətlərin daha da möhkəmləndirilməsi üçün yaxşı zəmin yaratdığını bildirmiş, əməkdaşlıq sferasının bundan sonra daha da genişlənəcəyinə əminliyini ifadə etmişdir.

Müstəqil Azərbaycanın Gömrük Xidmətinin keçdiyi inkişaf yoluna qısaca nəzər salan Komitə sədri istər büdcə gəlirlərinin formalaşmasında, istərsə də iqtisadi təhlükəsizliyin təmin edilməsində gömrük orqanlarının rolundan danışmış, informasiya texnologiyalarının tətbiqi, qanunvericilik bazasının möhkəmləndirilməsi istiqamətində həyata keçirilən tədbirlərdən bəhs etmiş, xüsusilə cari ilin yanvar ayından etibarən Azərbaycanın dövlət sərhəd-buraxılış məntəqələrində "bir pəncərə" prinsipinin tətbiqi barədə qonaqlara ətraflı məlumat vermişdir.

Qarşılıqlı səfərlərin mövcud əlaqələrə yeni impuls verdiyini xatırladan DGK sədri Aydın Əliyev iqtisadi-ticari əlaqələrin daha da inkişaf etdirilməsinin vacibliyini önə çəkmişdir.

İki ölkənin gömrük qurumları arasında əlaqələrə gəlincə, Komitə sədri mövcud əməkdaşlıgın gələcək perspektivlərindən danışmış, Estoniya Gömrük Xidmətinin informasiya texnologiyalarının tətbiqi sahəsində təcrübəsindən yararlanmağın ümumi işə faydasından bəhs etmiş, ümumiyyətlə, Estoniya nümayəndə heyətinin Azərbaycana səfərinin ölkələrimizin uyğun qurumları arasında əlaqələrin gələcək inkişafı istiqamətində mühüm addım olacağına ümidvar olduğunu bildirmişdir.

Səmimi qəbula və göstərilən yüksək qonaqpərvərliyə görə Dövlət Gömrük Komitəsinin sədri Aydın Əliyevə təşəkkür edən Estoniya Respublikasının Vergi və Gömrük Şurasının baş direktoru Enriko Aav respublikamızda olmaqdan məmnunluğunu ifadə etmiş, həqiqətən Azərbaycanda uğurlu inkişaf yolu keçən iqtisadi tərəqqinin şahidi olduğunu bildirmişdir.

Estoniya Respublikası hökumətinin Azərbaycanla əməkdaşlığa çox böyük önəm verdiyini vurğulayan Enriko Aav iki dost ölkə arasındakı münasibətlərin hazırkı durumundan razılıqla söhbət açmışdır.

Estoniya ilə Azərbaycanın gömrük orqanlarının birgə gələcək əməkdaşlığını müsbət qiymətləndirən qonaq iki ölkənin uyğun qurumları arasında münasibətlərin daha da dərinləşməsi üçün heç bir problemin olmadığını vurğulamış, əlaqələrin dinamik inkişafı istiqamətində mövcud potensialdan maksimum yararlanmağın vacibliyinə toxunmuşdur.

Qısa zaman kəsiyində Azərbaycan gömrüyünün inkişafını müsbət dəyərləndirən estoniyalı qonaq, öz növbəsində qarşılıqlı təcrübə mübadiləsinin mövcud əməkdaşlıq əlaqələrinə yeni impuls verəcəyinə əminliyini ifadə etmişdir.

Görüşdə, eyni zamanda qarşılıqlı maraq doğuran bəzi məsələlər ətrafında geniş fikir mübadiləsi aparılmışdır.

Sonra estoniyalı qonaqlar Dövlət Gömrük Komitəsinin Mərkəzi Hospitalı ilə tanış olmuşlar. Gömrük orqanlarına xidmətə qəbul olunan əməkdaşların sağlamlıq vəziyyətinin müəyyən edilməsi, gömrük əməkdaşlarının tibbi xidmətə ehtiyaclarının ödənilməsi və tibbi təminatının yaxşılaşdırılması məqsədi ilə inşa edilən ən müasir sağlamlıq ocağı ilə tanışlıq qonaqlarda xoş təəssürat yaratmışdır.

Daha sonra estoniya nümayəndə heyəti Bakı Baş Gömrük İdarəsində, Ümumdünya Gömrük Təşkilatının Bakıda yerləşən Regional Tədris Mərkəzində, Dövlət Gömrük Komitəsinin Kinoloci Mərkəzində və "Azərterminalkompleks" Təsərrüfat Hesablı Xarici İqtisadi Birliyin inzibati binasında olmuşlar.

Bakı Baş Gömrük İdarəsinə də baş çəkən nümayəndə heyəti buradakı iş prosesi ilə yaxından tanış olmuş, gömrük əməkdaşlarına yaradılan şəraitdən razılıqlarını ifadə etmişlər.

ÜGT Regional Tədris Mərkəzində olan qonaqlara məlumat verilmişdir ki, mərkəzdə artıq bir sıra beynəlxalq və regional tədris kursları keçirilmiş, seminarlar, treninqlər təşkil olunmuşdur. Müasir tipli tədris otaqlarına, müdavimlərin təlim və hazırlığı üçün elektron kitabxanaya baş çəkən qonaqlara həmçinin bildirilmişdir ki, burada müxtəlif ölkələrdən və Azərbaycanın bölgələrindən gələn müdavimlərin rahatlığının təmin edilməsi üçün otel tipli yataqxana, idman zalı, iaşə obyektləri, tibb otağı da fəaliyyət göstərir.

Sonra Kinoloci Mərkəzdə olan qonaqlara məlumat verilmişdir ki, xidməti itlərin təlimi və onların baytarlıq müayinəsi üçün zəruri olan ən müasir avadanlıqlarla və digər texniki vasitələrlə təchiz olunan mərkəzdə narkotik vasitələrdən əlavə silah və partlayıcı maddələrin axtarışı, həmçinin mühafizə və zəlzələ zamanı dağıntılar altında qalan insanların aşkar edilməsi üçün itlərin hazırlanması və təkmilləşdirilməsi işi də həyata keçirilir. Mərkəzlə tanışlıqdan sonra qonaqlar xidməti itlərin təlim prosesini izləmişlər.

Hər iki mərkəzlə tanışlıq qonaqlarda xoş təəssürat yaratmışdır.

Şamxal

Ədalət.- 2009.- 30 aprel.- S.4.