Qanun layihəsi ilə bağlı "dəyirmi masa" keçirildi

Milli Məclisin yaz sessiyasında müzakirəsi gözlənilən "Məişət zorakılığının qarşısının alınması haqqında" qanun layihəsinin müzakirəsinə həsr olunmuş dəyirmi masa keçirilib. Azərbaycan Hüquqşünaslar Birliyi və "Təmiz Dünya" Qadınlara Yardım İctimai birliyinin təşkilatçılığı ilə keçirilən tədbirdə "Təmiz dünya" Qadınlara Yardım İctimai Birliyinin sədri Mehriban Zeynalova hər il dünyada 4 milyon qadının zorakılığın qurbanı olduğunu söylədi: "Hər il dünyada 4 milyondan çox qadın zorakılığın qurbanına çevrilir. Onlardan 17 mini hamiləlik dövründə bu cür neqativ situasiyalarla qarşılaşırlar".

Birlik sədrinin sözlərinə görə, bu problem Azərbaycandan da yan keçməyib. Buna görə də "Məişət zorakılığının qarşısının alınması haqqında" qanun layihəsinin hazırlanması və müzakirəsi irəliyə doğru atılan mühüm addımdır. M. Zeynalova qeyd edib ki, zorakılıqla bağlı qanun pozuntuları Cinayət Məcəlləsinin bir neçə maddəsi ilə tənzimlənir. Bu isə zorakılığın yalnız bir növünü - fiziki zorakılığı əhatə edir: "Zorakılığın digər növləri isə kənarda qalır. Məhz bu səbəbdən qanunun qəbulu Azərbaycan üçün çox vacibdir".

Qanun layihəsində müəyyən çatışmazlıqların da odluğunu bildirən birlik sədri qeyd edib ki, adı "Məişət zorakılığının qarşısının alınması haqqında" qanun kimi təqdim edilsə də, əslində qanun sırf ailədaxili zorakılıqla mübarizə haqqındadır: "Biz təklif edirik ki, qanun layihəsinin adı dəyişdirilsin və "Ailədaxili zorakılıq haqqında" qanun adlandırılsın. Qanuna əsasən ailədaxili zorakılıqdan zərər çəkmiş şəxslərin kompensasiya almaq hüququ müəyyən olunmalıdır".

İctimai Birliyin sədri qadınlarla işləyən qeyri hökumət təşkilatlarını qanun layihəsinin müzakirəsində aktiv iştirak etməyə çağırıb.

V.Məmmədli

Ədalət.- 2009.- 18 fevral.- S. 2.