ÇOXDAN GÖZLƏNƏN "CAVAB"

Məlum olduğu kimi bir müddət öncə "Azadlıq" radiosunun erməni bürosu Türkiyə Ermənistanla münasibətlərini normallaşdırmaq, sərhədləri açmaq məsələsində daim irəli sürdüyü şərtlədən birindən - Azərbaycanın işğal olunduğu torpaqların azad edilməsi tələbindən geri çəkildiyi haqda məlumat vermişdi. Təbii ki, bundan sonra Azərbaycan ictimaiyyətində çox böyük narahatlıqlar, hətta narazılıqlar yaşanmağa başladı. Artıq ölkə mətbuatı neçə gündür sürəkli olaraq bu məsələ ilə bağlı tənqidi materiallar dərc etməkdədir.

Çox qəribədir ki, bu məsələ qardaş ölkə saydığımız Türkiyə mətbuatında və cəmiyyətində eyni cür qarşılanmadı. Azərbaycandan fərqli olaraq bəzi siyasiləri və müxalifət məbuatını istisna etməklə Türkiyədəki qardaşlarımız və türk mediası ortaya çıxmış bu məsələlərə çox susqunluqla reaksiya verdi və verir. Amma çox utandırıcı haldır ki, türk mediası Azərbaycanın narahatçılığından bir kəlmə danışmadığı halda, dünyanın türkə, Türkiyəyə dəxli olmayan istənilən yerindən məlumatlar yayınlayır. Əcaba, bizim qardaşlarımız sayılan Anadolu türkləri Azərbaycan türklərinin işğalda yaşadıqlarını, Moskva-İrəvan silahlı birləşmələrinin Qarabağda törətdikləri faciələri unutdularmı? Hanı biz qardaş idik, bir millət iki dövlət idik?

Düzdür, ürəyində Azərbaycan sevgisi olan insanlar bu haqda demək olar ki, fikir bildirirlər, amma təəssüf ki, Türkiyənin rəsmi mövqeyi hələ indiyədək də bildirilməmişdi. Və biz səbrlə həmin mövqenin bəyan ediləcəyini gözləməkdəydik. Dünən informasiya qaynaqlarının məlumatlarından aydın oldu ki, Türkiyənin baş naziri Rəcəb Tayyib Ərdoğan məsələ ilə bağlı Ankaranın rəsmi münasibətini açıqlayıb. Lakin AKP-çi baş nazir kifayət qədər açıq danışsa da niyəsə bizim media hələ də Türkiyə rəhbərliyindən daha konkret açıqlama gözləməkdədir. Amma, bəylər, boşuna gözləməyin, çünki Ərdoğan sözünü dedi.

"Qarabağ məsələsi ilə bağlı bizim mövqeyimizdə Azərbaycanın rəsmi mövqeyindən fərqli hər hansı dəyişiklik yoxdur. Biz mövqeyimizi bərabər müəyyənləşdirmişik və bu günədək eyni istiqamətdə davam etdirməkdəyik. Belə bir şey söhbət mövzusu deyil. Biz Azərbaycanın rəsmi mövqeyini bölüşən ölkəyik və indiyə qədər də bu mövqenin arxasında dayanmışıq. Qarabağ məsələsində Azərbaycanın haqlılığı bəllidir və bu, BMT-nin qərarlarında da öz əksini tapıb".

Doğrudanmı qosqoca Türkiyə dövlətinin baş naziri özü bu cür söz oynu ilə ondan konkret cavab gözləyən insanlara cavab verdiyini düşünə bilirmi? Bu ümumi sözləri, terminləri biz hər kəsdən, hətta baş nazir olmayanlardan da illərlədir eşidirik. Qardaş ölkənin baş nazirinin bəyan etdiyi kəlmələr Azərbaycana qardaş olmayan, hətta Azərbaycanın tərəqqi etməsini arzulamayan ölkələrin hər biri tərəfindən bir az fərqli də olsa dəfələrlə səsləndirilib. Yəni Azərbaycanla yanaşı Türkiyənin də ərazi bütövlüyünü tanımayan Ermənistandan başqa dünyanın bütün ölkələri Azərbaycanın ərazi bütövlüyünü dəstəkləyir. Ona görə də Ərdoğanın özünə bu qədər əziyyət verib "mövqeyimizdə dəyişiklik yoxdu", "mövqeyimizi bərabər müəyyənləşdirmişik", "mövqeyi bölüşən ölkəyik", "Azərbaycanın haqlılığı bəllidir (guya bunu kimsə bilmir), kimi dolayısı sözlər işlətmək əvəzinə, bircə kəlmə ilə baş nazir kimi Türkiyənin üçüncü şərtinin dəyişmədiyini bildirsəydi hər şey qaydasına düşərdi. O bunu dilə gətirməməklə əslində "Azadlıq" radiosunun erməni xidmətinin yaydığı xəbərlərin doğruluğunu təsdiqləyib. Çünki bir ölkənin uzun illər ortaya qoyduğu şərti təkrarlamaqdan vaz keçməyin başqa adı yoxdur. Bəlkə var?

Nə təhər olur, Ankara türkə həmişə həqarət edən Dinkin öldürüldüyü yerə göyərçin heykəli qoya bilir, Ermənistanla sərhəddə ermənilərlə dostluq rəmzi olan 30 metrlik heykəl yapdırır, ölkədə "ermənilərdən üzr istəmə" kampaniyası sürdürür, ötən əsrin əvvəllərində ermənilərin türkləri kütləvi şəkildə qırdıqlarını unudur, uzun illər Türkiyəyə qarşı düşmənçilik siyasətini, türk diplomatlarının erməni terrorçuları tərəfindən qətlini yaddan çıxarır... amma Türkiyənin Qarabağın işğaldan azad edilməsi şərtindən keçmədiyini təkrarlamaq istəmir. Məgər bu həmin üzdəniraq məlumatların təsdiqi deyilmi? Yeri gəlmişkən, AKP hakimiyyətinə çatdırım ki, 1990-cı ildən bir neçə hakimiyyət dəyişsə də Moskva heç vaxt nə sözdə, nə də əməldə ermənilərin ziyanına hərəkət etməyib, heç etməyə də hazırlaşmır. Bu onların dostluğu, bu da biz.

Biz cavabımızı aldıq və bundan sonra həmin cavaba rəğmən işlərimizi qurmalıyıq ki, bir daha gözləmədiyimiz addımın şahidi olanda mat vəziyyətinə düşməyək. Həm də heç kim düşünməsin ki, AKP və onların yürütdüyü siyasət əbədidir. Xeyr, onların hakimiyyəti də gəlib keçəcək. Bu dünyada Tanrıdan qeyri heç nə əbədi deyil, ola da bilməz.

Bəlkə Ərdoğan fərqinə varmır, amma mən xatırlatmaq istəyirəm ki, tarix bu cür yanlış addımları heç vaxt unutmur. Azərbaycan onsuz da öz torpaqlarını işğaldan ya elə, ya da belə azad edəcək. Əzəli və əbədi türk torpaqlarını erməni dığalarında qoymayacaq. Amma tarixin bu dönəmində qardaşlarının yanında olanların da adları da hər yerə yazılacaq, olmayanların da. Hər kəs də öz layiq olduğu cavabı alacaq.

BABƏK YUSİFOĞLU

Ədalət.- 2009.- 20 fevral.- S. 4.