Ombudsman bəyanat yaydı

Ombudsman Elmira Süleymanova Xocalı soyqırımının 17-ci ildönümü ilə əlaqədar bəyanat yayıb. Bəyanat BMT-nin baş katibinə, baş katibin uşaqlar və silahlı münaqişələr üzrə xüsusi nümayəndəsinə, BMT-nin insan hüquqları üzrə ali komissarına, ATƏT-ə, Avropa Şurasına, Beynəlxalq və Avropa ombudsman institutlarına, Beynəlxalq Sülh Bürosuna, Universal Sülh Federasiyasına, Asiya Ombudsmanlar Assosiasiyasına, Azərbaycanın xarici ölkələrdəki səfirliklərinə və diaspora təşkilatlarına ünvanlanıb. E. Süleymanova bildirib ki, uzun illər Xocalı faciəsi lazımi səviyyədə təbliğ olunmayıb:

"Təəssüf ki, hələ də Xocalı hadisəsinin azərbaycanlılara qarşı soyqırımı olduğunu heç bir ölkə tanımayıb və siyasi qiymət verməyib. Halbuki Xocalı soyqırımı sülh və bəşəriyyət əleyhinə yönələn əməldir və ən ağır beynəlxalq cinayətlərdən biri hesab olunmalıdır. Xocalı soyqırımı zamanı 613 nəfərin, o cümlədən 106 qadının, 63 azyaşlı uşağın, 70 qocanın həyatına son qoyulub, 487 nəfər şikəst olub, 1275 nəfər sakin əsir götürülüb, 150 nəfər itkin düşüb".

E.Süleymanova qeyd edib ki, Xocalı soyqırımını törədən erməni terrorçuları cinayət məsuliyyətinə cəlb olunmalıdır: "Ermənistan münaqişə ilə bağlı qəbul edilmiş beynəlxalq sənədlərin müddəalarını yerinə yetirməli, Azərbaycanın ərazi bütövlüyü bərpa olunmalı, azərbaycanlı qaçqın və məcburi köçkünlərin pozulmuş hüquqları bərpa edilməli və onlar öz doğma yurdlarına dönməli, Ermənistana beynəlxalq qurumlar tərəfindən sanksiyalar tətbiq olunmalıdır".

ŞAMXAL

Ədalət.- 2009.- 24 fevral.- S.5.