UNUDULMAYAN TARİX

Xocalı soyqırımının anımı tədbirində çıxış edən natiqlər ermənizmin faşizmdən də təhlükəli olduğunu vurğuladılar

Xocalı soyqırımının 17-ci ildönümü ilə bağlı həm Azərbaycanda, həm də dünyanın bir çox ölkələrində anım tədbirləri keçirilir. Dünən bu tədbirlərdən biri Azərbaycan Respublikası Gəncliyə Yardım Fondunun konfrans zalında baş tutub.

Tədbiri giriş sözü ilə açan və Xocalı, eləcə də bütün şəhidlərimizin ruhlarına rəhmət diləyən Türkiyənin "İstanbul Qardaşlıq və Yardımlaşma Dərnəyi" beynəlxalq humanitar təşkilatının Azərbaycandakı nümayəndəliyinin baş məsləhətçisi Ahmet Tecim bildirib ki, 17 il əvvəl erməni terrorçuları tarixdə görünməmiş qəddarlığa əl atıb. Natiq eyni zamanda bu qəddarlığa beynəlxalq birliyin də göz yummasını təəssüflə vurğulayıb: "Xocalı soyqırımı təkcə Azərbaycana deyil, bütün türk dünyasına qarşı törədilib. Bu soyqırımı törədənlər dünyanı aldadaraq bütün türk dünyasını çətin vəziyyətə salıb. 72 türk diplomatının qətlinə, Xocalı soyqırımına göz yuman dünya bir erməninin ölümünü daha çox şişirdir. Ümummilli lider Heydər Əliyevin hakimiyyətə gəlməsi ilə soyqırımın dünyada tanınması üçün mühüm addımlar atılıb. İndi bu siyasət İlham Əliyev tərəfindən davam etdirilir. İnanırıq ki, Dağlıq Qarabağın işğalına son qoymaqla şəhidlərimizin ruhunu şad edəcəyik. İnanın ki, həmin günlər elə də uzaqda deyil".

Torpaqlarımızın tezliklə işğaldan azad olunması ilə bağlı əminliyini ifadə edən Azərbaycan Respublikası baş nazirinin müavini, Qaçqınların və Məcburi Köçkünlərin işi üzrə Dövlət Komitəsinin sədri Əli Həsənov daha sonra vurğulayıb ki, ermənilərin məkrli niyyətlərini heç vaxt yaddan çıxarmamalıyıq: "Xocalı faciəsi ermənilərin son iki yüz ildə azərbaycanlılara qarşı törətdiyi ən ağır faciədir. Xocalı faciəsinə ayrıca bir faciə kimi baxmaq lazım deyil. Bir məqama diqqət yetirək. Ermənilər törətdikləri bütün hadisələrə haqq qazandırmaq üçün Sumqayıt hadisələrini törədib. Sumqayıt hadisələri 26 fevral 1991-ci il, Xocalı soyqırımı isə 1992-ci il 26 fevral tarixində baş verib. Burada heç bir təsadüf yoxdur. Sumqayıt hadisələri bəhanə gətirilərək bu olaydan 5-10 gün sonra 250 min azərbaycanlı Ermənistandan çıxarılıb. Bizim yaddaşımızda faşizm sözü qalıb. Ancaq ermənilərin Xocalıda törətdikləri daha qəddar olub. Bu, görünməmiş bir dəhşətdir. Vaxt gələcək bu qan yerdə qalmayacaq. Azərbaycan prezidenti İlham Əliyevin apardığı siyasət ona yönəlib ki, ermənilər öz səhfini başa düşsünlər. Onsuz da bu torpaqlar azad olunacaq. Yenə də ermənilərlə qonşu yaşamağa məcbur olacağıq. Ancaq ermənilərin qan, torpaq hərisliyini, qəddarlıq, faşizm xislətini yaddan çıxarmamalıyıq. Cənab prezident istəmir ki, müharibə olsun. Ancaq Azərbaycan oğlu lazım gələrsə torpağı üçün döyüşəcək, canından belə keçəcək. Gənc nəslin beyninə yeritməliyik ki, erməninin geni insan qanına hərisdir, bu millət çox qorxuludur. Təəssüf ki, belə bir mənfur millətlə qonşu yaşamağa məcburuq. Ayıq olmalıyıq".

Millət vəkili Elman Məmmədov çıxışında Azərbaycanın o vaxtki hakimiyyətini qətiyyətsizlikdə, Xocalı sakinlərini köməksiz qoymaqda günahlandırıb: "Biz Xocalını son damla qanımıza qədər müdafiə etdik. Bizə belə bir sual ünvanlayırlar ki, siz faciənin yaxınlaşdığını hiss edirdiniz, niyə Xocalını tərk etmədiniz? Onlara cavabım budur ki, əmin-amanlıq dövründə yaşayıb, dar vaxtda torpağı tərk etməliydikmi? Biz türk dünyasına, 8 milyonluq Azərbaycan xalqına, o zamanki başıpozuq hakimiyyətə ümid etdik. Lakin bizim ümidlərimiz boşa çıxdı və nəticədə bu faciə baş verdi".

Millət vəkili Novruz Aslanov, Xocalı rayon icra hakimiyyətinin başçısı Şahmar Usubov, prezidentin icra aparatının ictimai-siyasi məsələlər şöbəsinin baş məsləhətçisi Rasim Mirzəyev çıxışlarında şəhid ailələrinə başsağlığı verdi və onları mətin olmağa səslədi.

Tədbirin sonunda Azərbaycan Qızıl Aypara Cəmiyyətinin Xocalı rayon şöbəsi tərəfindən "İstanbul Beynəlxalq Qardaşlıq və Yardımlaşma Dərnəyi" Beynəlxalq Humanitar təşkilatının Azərbaycandakı nümayəndəliyinə təqdim olunmuş siyahıya əsasən 150 şəhid ailəsinə yardım paylanılıb.

Ömər

Ədalət.- 2009.- 26 fevral.- S.1,3.