ƏBƏDİLƏŞƏN VƏ ƏBƏDİYAŞAR BİR ÖMÜR

Xalqımızın minilliklərdən keçib gələn tarixində böyük hərflərlə yazılan bir imza var. Bu imzanın sahibi Ümummilli Liderimiz, Ulu Öndər Heydər Əliyevdir. O, bütün həyatını mənsub olduğu, sevdiyi Azərbaycana həsr etdi və bu gün də həsr etməkdədi.

Zaman nə qədər sürətli olur-olsun onun başlanğıc anı mütləq tarixə nəşr olunur. Bu mənada Ulu Öndərimizin 40 il bundan öncə Azərbaycanda hakimiyyət kürsüsünə qalxması ən böyük gerçəkliklərdən, danılmaz faktlardan biridir. Məhz həmin tarixdən başlayaraq Azərbaycan istər Sovet dönəmində, istərsə də müstəqilliyini əldə etdikdən sonra uğurlu bir yolun sahibinə çevrildi. Bu elə bir yoldur ki, onun həm memarı, həm müəllifi, həm də sarvanı məhz Ulu Öndərimiz olubdu.

Bu gün xalqımız böyük fəxrlə 40 il öncəki tarixi yada salır. Az-çox Vətən sevgisi olan hər kəs bu 40 ildə keçilən yolu gözdən keçirir, böyüyüb çiçəklənən iqtisadi uğurların ünvanı olan sosial obyektləri, tikinti meydanlarını xatırlayır. O cümlədən biz dəmiryolçular da ölkənin qan damarı olan dəmir yolu nəqliyyatının Heydər Əliyev dönəmində az qala sıfırdan yaradılmağa başladığını və onun qayğısı ilə qısa bir zamanda genişlənib təkcə regionun deyil, eləcə də dünyanın böyük dəmir yolları şəbəkəsinə qoşulduğunu yaxşı xatırlayır və onun şahidiyik.

40 il öncə başlayan Heydər Əliyev erası Azərbaycan üçün yeni həyatın başlanğıcı oldu. İstər kənd təsərrüfatında, istər sənayedə, istərsə də həyatın digər sahələrində qazanılan uğurların hər birində onun dəsti-xətti göründü, onun imzası, onun düşüncələri öz əksini tapdı. Həmin illərdə Azərbaycan mədəniyyətinin, elminin, ədəbiyyatının uğurları da təkcə ölkə daxilində yox, həm də dünyada qəbul olundu, alqışlarla qarşılandı. Aparılan uğurlu siyasət yeni dünyaya inteqrasiyaya təkan verdi. Müstəqil dövlətin, müstəqil millətin rəhbəri olan Azərbaycan xalqının böyük oğlu, Ulu Öndərimiz imzaladığı sənədlərlə, müqavilələrlə xoşbəxt gələcəyə gedən yola öz ziyasını səpdi. Biz bu yolun uğurlarını Azərbaycan prezidenti İlham Əliyev cənablarının rəhbərliyi altında hər gün yaşamqda və duymaqdayıq. Çünki siyasi kurs və iradə davamlı olaraq həyata keçirilməkdə, yaşadılmaqdadı. Elə təkcə son günlərdə ölkə həyatında baş verənlər, ölkəmizə xarici dövlət başçılarının ardıcıl səfərləri dediklərimizi bir daha sübut edir. Həyat göstərir ki, qurucusu Heydər Əliyev olan bir dövlətin sükanı etibarlı əllərdədi. Və bu dövlət öz ənənəsinə, öz yaradıcısının prinsiplərinə sadiqdir.

Bəli, 40 il öncə xalqımızın tarixində yeni bir zaman start götürdü. O zamanın sahibi, o zamanın müəllifi və o zamanı tarixə çevirən şəxs bu gün böyük qürur hissi ilə əməllərini davam etdirir, xatirələrini ürəyimizdə yaşatdığımız Ümummilli Liderimiz Heydər Əliyev cənablarıdı. İllər ötüb keçsə də qaragüruhçular nələr yazmağa, deməyə cəhd etsələr də günəş öz günəşliyində qalır. O, ləkə götürmür. Tarixin böyük siması, bəşəriyyətin qəbul etdiyi Ümummilli Liderimiz də öz şərəfli və Günəş qədər işıqlı həyatını öz xalqına həsr etmişdi. Və bu gün də Xalq-Heydər, Heydər-Xalq inamı yaşamaqdadır. Bu, işıqlı, İlhamlı, inamlı bir yaşamdı. Biz də onun daşıyıcıları, yaşadanlarıq.

Arif Əsgərov

Azərbaycan Dövlət Dəmir Yolu rəisi

Ədalət.- 2009.- 14 iyul.- S. 3.