Bayat

ANAM

Məzarın var qərib eldə

Obadan aralı anam.

Səməndər, Səyyafdır dərdi

Ürəkdən yaralı anam.

Açmır bahar, solub güllər,

Susub nəğmə deyən dillər.

Tərpətmən dərdimi ellər,

Siz sorman haralı anam.

Ağuşuna alıb torpaq,

Saralacaq yarpaq-yarpaq.

Getməyəcək bu dərd ancaq,

Ay taleyi qaralı anam...

BABA

Bağlayıblar yolunu,

Yolun yoxdur, ay baba.

Sındırıblar qolunu,

Qolun yoxdur, ay baba.

Əzəlindən beləyik,

Gələmmirik yolunu.

O cür elə tay qalıb,

Qol olmuruq qoluna.

Özgə yoldan yol olmaz

Yolun yoxsa dünyada.

Ha getsək də çatmarıq

Biz arzuya, murada.

Yolçu yolunda gərək,

Yolunda yolçu yoxdur.

Ovçu ovunda gərək,

Ovunda ovçu yoxdur.

Yol getməyə yolum yox,

Yolunu göstər, baba.

Əl atmağa qolum yox,

Qolunu göstər, baba.

Susma, danış, söylə sən,

Həqiqəti, ay baba?

Nədən aşdın başına

Müsibəti, ay baba.

Olsa vallah bir istək,

Ürəkdə təpər, baba!

O salxax, sınıq qol da,

Haraya yetər, baba!

ELƏ BİLDİM

Gözlərim qamaşırdı,

Ürəyim alışırdı,

Güllələr dəlib keçirdi.

Elə bildim kipriklərindir

Tətiyi çəkən...

YENİ İL

Gəldi yeni il,

yağdı qar.

Bu qarın altından başladı

təzədən bahar...

Qələndər XAÇINÇAYLI

Ədalət.- 2009.- 18 iyul.- S. 20.