Azərbaycan güləşçiləri erməniləri məğlub etdi

Güləşçilərimiz Avropa birinciliyinin mükafatçıları oldular

Serbiyanın Zrenyanin şəhərində yeniyetmələr arasında güləş üzrə Avropa birinciliyinə start verilib. Azərbaycan Güləş Federasiyasının mətbuat xidmətindən İlk yarış günündə sərbəst güləşçilərimiz 2 medal qazanıblar.

10 çəki dərəcəsi üzrə keçirilən Avropa birinciliyinin ilk günündə 5 idmançımız mübarizə aparıb. 85 kq çəki dərəcəsində çıxış edən Azərbaycan çempionu Elcan Usubzadə Türkiyə və Gürcüstan pəhləvanlarını yendikdən sonra ? finala çıxıb. Bu mərhələdə Usubzadənin rəqibi Ermənistan güləşçisi Vahe Tamrazyan olub. O da Elcanın qarşısında duruş gətirə bilməyib. Bundan sonra güləşçimiz Polşa təmsilçisini də yenərək, finala vəsiqə qazanıb. Avropa çempionu adı uğrunda isə Usubov rusiyalı Məhəmmədhacı Xatiyevə uduzub və qitə birinciliyinin gümüş medalını qazanıb.

69 kq çəki dərəcəsində yarışan Kazım Abbasov isə ilk qarşılaşmada Türkiyə güləşçisinə uduzsa da, rəqibin finaladək irəliləməsi idmançımızın təsəlliverici görüşlərdə iştirakına şərait yaradıb. Bu mərhələdə isə almaniyalı rəqibini yenən Abbasov bürünc medal uğrunda həlledici qarşılaşmada Ermənistan güləşçisi David Apoyanla üz-üzə gəlib. Qarışlaşmanın 1-ci hissəsində təmsilçimiz uduzsa da, sonrakı hissələrdə böyük hesabla qalib gəlməklə (0-2, 6-0, 6-1) qitə birinciliyini bürünc medalla başa vurub.

Digər idmançılarımıza gəlincə, 58 kq-da Nurlan Hacıyev 5-ci, 50 kq-da Fərrux Ələkbərov 7-ci, 42 kq-da Mircəlal Həsənzadə isə 10-cu yeri tutub. Bu gün daha 5 sərbəst güləşçimiz Avropa birinciliyinin medalları uğrunda mübarizəyə qoşulub.

VÜSAL

Ədalət.- 2009.- 23 iyul.- S. 4.