"ƏLLİ"

Vaqif İsaqoğlunun imzasını Azərbaycan oxucusu çoxdan tanıyır. O, həm hərbi jurnalist, həm yazıçı-publisist kimi xeyli sayda yazıları ilə ölkə mətbuatında öz imzasını oxuculara tanıda bilib. Çoxlu sayda cəbhə xəttindən hazırladıqları yazılar, oçerklər, məqalələr, həmçinin publisist qeydlərin və nəhayət, şair, yazıçı kimi ortaya qoyduğu bədii nümunələr Vaqif İsaqoğlunun öz üzərində yorulmaq bilmədən çalışmasının bəhrələridir.

Bu günlərdə 50 yaşı tamam olan Vaqif İsaqoğlunun özünün ad gününə bir növ hədiyyə etdiyi "Əlli" kitabı onun bu günə qədər çap olunmamış hekayələrindən, şeirlərindən və bir də ailə albomunu xatırladan şəkillərdən ibarətdir. Həmçinin kitabda "İpə-sapa düzülməmiş incilər, fikirlər və düşüncələr" bölümündə də Vaqifin özünəməxsus aforizmləri yer alıbdır. Şeirlərində son dərəcə səmimi olmağa çalışan və buna da müəyyən qədər nail olan Vaqif İsaqoğlu yazır ki:

Eh, daha tor görür, gözün can Vaqif,

Alışmır ocaqda közün, can Vaqif.

Əlləri qoynunda çox zaman Vaqif

Xəyala dalacaq əllidən sonra

Bu misralar müəllifin artıq 50-dən sonrakı illərinin də necə xəyalında qurduğundan da qayğılı, səmərəli keçəcəyindən xəbər verir. Çünki Vaqif İsaqoğlu özünün dediyi kimi, yalnız bir iş bacarır:

Tanrı mənə qələm verdi,

Tanrı mənə var-dövlət vermədi.

Tanrı mənə qələm verdi. Və mən bu dünyada var-dövlət yiyəsi olmadım, Söz yiyəsi oldum.

Zənnimcə, Söz sahibi olan Vaqif İsaqoğlu "Əlli"dən dediklərini 50-dən sonra da daha böyük ustalıqla, bir az da loru desəm, ağsaqqalyana demək gücünü qoruyub saxlaya biləcək. Ən azı ona görə ki, onun Tanrıdan payı olan qələmi və bir də söz xəzinəsi var.

Əbülfət Mədətoğlu

Ədalət.- 2009.- 6 iyun.- S. 17.