ORDU HAMIMIZIN ÜMİD YERİDİR

Silahlı Qüvvələrə qarşı qara piar kampaniyası dövlətə və xalqa qarşı cinayətdir

Azərbaycanda ordu quruculuğuna 1991-ci ilin sonlarından başlansa da, 1993-cü ilin ortalarına qədər hakimiyyətdə olan siyasi qüvvələrin səriştəsizliyi, ölkədə hökm sürən anarxiya, özbaşınalıq, hərc-mərclik bu sahədə görülən işlərin fiaskoya uğraması ilə başa çatdı. 1993-cü ildə ulu öndər Heydər Əliyevin xalqın tələbi ilə hakimiyyətə qayıdışından sonra ölkəmizin gələcəyi ilə bağlı ümidsizliyə birdəfəlik son qoyuldu. Heydər Əliyevin Azərbaycan Prezidenti seçilməsindən sonra bütün sahələrdə irəliyə doğru başlanan dönüş ordu quruculuğunda da hiss olunmağa başladı. Ölkəyə Heydər Əliyev kimi qətiyyətli bir liderin rəhbərliyi sonrakı illərdə müdafiə qabiliyyətinin artırılmasına, silahlı qüvvələrdə çoxşaxəli islahatların aparılmasına imkan yaratdı. Yeni formalaşdırılan ayrı-ayrı qoşun növlərinin hərbi nizamnamələrin tələblərinə uyğun idarə olunması, hərbi hissələrin təxribatçı ünsürlərdən təmizlənməsi Azərbaycan Ordusunu keyfiyyətcə yeniləşdirdi. Ordunun mərkəzləşdirilmiş maddi-texniki təminatı əhəmiyyətli dərəcədə yaxşılaşdırıldı, maliyyə-təsərrüfat fəaliyyəti nizama salındı. Silahlı qüvvələrə tələb olunan hərbi texnika, döyüş sursatı, arxa xidmət əmlakı və digər maddi vasitələrin istehsalı üçün sifarişlərin Azərbaycanın sənaye müəssisələrində icrası bu sahənin inkişafına da təkan verdi. Orduda şəxsi heyətin mənəvi-psixoloji hazırlığına, döyüş ruhunun yüksəldilməsinə diqqət artırıldı, hərbi vətənpərvərlik işi gücləndirildi. İldən-ilə ordunun döyüş hazırlığının yüksəldilməsi, peşəkar hərbçilərin hazırlanması, hərbi hissələrdə nizam-intizamın möhkəmləndirilməsi, təlimin düzgün qurulması istiqamətində aparılan işlər daha da gücləndi.

2003-cü ildən sonra isə Heydər Əliyev siyasi kursunun layiqli davamçısı Azərbaycan Prezidenti, Silahlı Qüvvələrin Ali Baş Komandanı İlham Əliyevin başçılığı ilə dövlət müstəqilliyimizin möhkəmləndirilməsi istiqamətində görülən işlərin miqyası daha da genişlənmiş, hüquqi dövlət, demokratik vətəndaş cəmiyyəti quruculuğu prosesi yeni mərhələyə qədəm qoymuş, ölkənin kompleks inkişaf dinamikasında ciddi keyfiyyət dəyişiklikləri baş vermişdir. Müqayisə üçün qeyd edək ki, 2003-cü ildə Azərbaycanda hərbi xərclərə 135 milyon dollar xərclənirdisə, 2007-ci ildə bu məbləğ 1 milyard ABŞ dollarına çatdırıldı. Hərbi quruculuq sahəsində tamamilə yeni mərhələ başlanmış, ordunun elmi əsasda qurulması, peşəkar kadr potensialının formalaşdırılması, nizam-intizamın gücləndirilməsi, maddi-texniki təchizatın yaxşılaşdırılması baxımından vacib tədbirlər həyata keçirilmişdir. NATO standartlarına uyğun ordu quruculuğu siyasətinin son beş ildə uğurla davam etdirilməsi nəticəsində Azərbaycan Silahlı Qüvvələri inkişafının yeni keyfiyyət mərhələsinə qədəm qoymuşdur. Təqdirəlayiq haldır ki, NATO ilə əməkdaşlığa böyük önəm verən, islahatlarda müasir standartları tətbiq edən Azərbaycanın hərbi təhsil müəssisələri də Şimali Atlantika Alyansının prioritetlərini əsas götürür. Son illər Azərbaycan hərbçilərinin beynəlxalq sülhməramlı əməliyyatlarda iştirakı ilə bağlı ən yüksək səviyyədə edilən razılıq və təşəkkürlər də ordumuzun peşəkarlığından və bacarığından xəbər verir. Ötən il iyunun 26-da "Azadlıq" meydanında keçirilmiş möhtəşəm hərbi parad Azərbaycan Silahlı Qüvvələrinin istər fiziki-mənəvi, psixoloji hazırlığı, istərsə də maddi-texniki təchizatı baxımından yüksək səviyyədə olduğunu bir daha təsdiqləmiş oldu.

Ordumuzun yüksəlişi və uğurları hər zaman medianın da diqqətində saxlanılır. Mətbuat bu gün Azərbaycan ordusunun güclənməsini, qüdrətlənməsini tərənnüm etməli, real olanları yazmalıdır. Mətbuatımız eyni zamanda Ermənistan ordusunda baş verən özbaşınalıqları cəmiyyətimizin diqqətinə çatdırmalıdır. Çünki Azərbaycan Ordusu gücləndiyi halda Ermənistan ordusu yerində sayır. Bu ölkənin ordusunda fərarilik, hərbi nizamnamələrin tələblərinin pozulması adi haldır. Unutmaq lazım deyil ki, Azərbaycan Ordusunun uğurlarını tərənnüm etmək hər bir azərbaycanlının vətəndaşlıq borcudur. Amma təəssüf ki, bəzi mətbu orqanlar yalnız ordumuzun uğurlarına kölgə salmaq niyyəti güdürlər. Azərbaycan ordusu haqda həqiqətə söykənməyən informasiyalar dərc edən və sonra da bu informasiyaları heç bir məntiqə söykənməyən şərhlərlə təhlil edən belə mətbu orqanların əməllərini ancaq vətənə xəyanət, düşmən dəyirmanına su tökmək kimi dəyərləndirmək olar. Çünki Azərbaycan torpaqlarının azad olunmasına və ərazi bütövlüyümüzün bərpasına bəslənən bütün ümüdlər məhz Silahlı Qüvvələrə yönəlib. Bu gün Qarabağ münaqişəsinin həlli ilə bağlı aparılan danışıqlarda dövlətimizin də son istinad nöqtəsi məhz Azərbaycan ordusudur. Azərbaycan Respublikasının Prezidenti, Ali Baş Komandan İlham Əliyevin dəfələrlə "sülh danışıqları bir nəticə verməzsə, Azərbaycan öz torpaqlarını güc yolu ilə azad etməyə qadirdir" bəyanatını səsləndirməsi ordumuzun müdafiə qüdrətinə söykənir. Belə bir şəraitdə Azərbaycan Silahlı Qüvvələrinə və onun şəxsi heyətinə qarşı "qara piar", şər böhtan kompaniyası aparmaq ancaq dövlətçiliyimizə və müstəqilliyimizə xəyanət sayıla bilər.

Bu günlər bəzi mətbu orqanlarda və informasiya saytlarında Füzuli rayonunun Böyük Bəhmənli kəndinin sakinlərinin guya orduya əsgər verməkdən imtina etməsi haqda yalan məlumatların yer alması isə bir sıra xarici və daxili düşmənlərimizin sifarişinə bənzəyir. Düşmənlə təmas xəttində, Azərbaycan Respublikasının cənub sərhədində yerləşən bir kənd haqqında belə bir yalanın yayılması ancaq düşmən qüvvələrin maraqlarına xidmət edə bilər. Öncədən onu bildirək ki, bu kənddə olarkən kənd sakinləri bu məlumatdan qəzəbləndiklərini və bunun heç bir həqiqətə söykənmədiyini bildirdilər. Üç oğlunu şəhid vermiş, nəvəsini isə bu günlərdə ordu sıralarına yola salmağa hazırlaşan Əkbər kişi isə belə söz-söhbətin ancaq ermənilərə sərf etdiyini, damarında azərbaycanlı qanı axan kimsənin bu günaha qol qoymasının mümkünsüzlüyünü bildirdi.

Yayılan məlumata rəsmi cavab da özünü çox gözlətmədi. Füzuli rayonunun hərbi komissarı polkovnik-leytenant Namiq Əhmədov rəsmi açıqlama ilə çıxış etdi ki, qarşıdakı çağırışda Böyük Bəhmənli kəndindən 40 nəfər ordu sıralarına yola salınacaq. Onların 35-i artıq həkim komissiyasından keçib və çağırış vərəqi alıb. Qəzetlərdə və informasiya saytlarında yayılan məlumatların yalan olduğu üzə çıxır. Amma məsələ bu məlumatların təkzib olunması ilə bitmir. Hər bir Azərbaycan vətəndaşının Vətən torpaqlarının azadlığı uğrunda müqəddəs savaşa hazır olduğu bir zamanda belə yalanlarla düşmənə xidmət göstərənlərin cinayəti cəzasız qalmamalıdır. Ən azından ona görə ki, bu cinayətlər dövlətə və xalqa xəyanətə söykənib.

İbrahim RÜSTƏMOV

Ədalət.- 2009.- 9 iyun.- S. 4.