Bayat

MƏNİ

Neylədin, ömür neylədin?

Adamlardan seçdin məni.

Nə vermişdin geri aldın,

Yedin məni, içdin məni.

Neylədin, tale neylədin?

Gedib hamıya söylədin.

Gah öz yolumdan əylədin,

Gah da gəlib keçdin məni.

Bəxtim, sevib yar olmadım,

Ömür sürüb yorulmadım.

Sünbül tək dənə dolmadım,

Zəmi kimi biçdin məni.

Gördüklərim yuxuydumu?

Neylədin, Tanrı neylədin?

Ayrı işin yoxuydumu?

Məni də şair eylədin.

Düyünümdən açdın məni.

DANIŞAQ

Söyləməyə nə qaldı ki?

Bu gecə qalım, danışaq.

Sən pıçılda, mən eşidim,

Qadanı alım danışaq.

Yenə də üzə-üz qalaq,

Gecəmiz yatsın, biz qalaq.

Eləcə ikimiz qalaq,

Şəkərim, balım danışaq.

Hərdən-hərdən küsdüyünü,

Ürəyimi üzdüyünü.

Axırda can istəyini,

Yadına salım danışaq.

BU GECƏDƏN

Gecələrin vüsalı tək,

Həsrəti də boldu yaman.

Yatdıqmı ki, yuxu görək?

Zəhmi ağır oldu yaman.

Nə istəyim bu gecədən?

Gözlədiyim köç gəlmədi.

Söz verənlər heç gəlmədi.

Nə ağ atlar atlandılar,

Nə gecədən qoç gəlmədi.

Nə istəyim bu gecədən?

Günaha çıxdı sevgimi,

El-aləmə yaydı məni.

Gözlərimi səhərlərin,

Yollarında qoydu mənim.

Nə istəyim bu gecədən?

Yuxuları çin olmadı,

Sevinci necə olaydı?

Gündüzümüz gün oldumu?

Gecəmiz gecə olaydı.

Nə istəyim bu gecədən?

FƏXRƏDDİN ƏZİZ

Ədalət.- 2009.- 20 iyun.- S. 20.