KOREYA İLƏ AZƏRBAYCAN ARASINDA QRANT RAZILAŞMASI

Dünən Azərbaycan Respublikasının Dövlət Torpaq və Xəritəçəkmə Komitəsi ilə (DTXK) Koreya Respublikasının xarici işlər və ticarət nazirliyi arasında "Azərbaycanda Torpaq Kadastr Sisteminin təkmilləşdiriliməsi layihəsi"nə dair qrant razılaşmasına həsr olunmuş tədbir keçirilib. Komitədə reallaşan tədbirdə DTXK-nin sədri Qərib Məmmədov 2006-cı ilin may ayında Koreya Respublikasının prezidenti cənab Ro Mu Hyun Azərbaycana və Azərbaycan Respublikasının prezidenti cənab İlham Əliyevin 2007-ci ilin aprel ayında bu ölkəyə etdiyi rəsmi səfərləri zamanı iki ölkə arasında geniş sahələri əhatə edən bir sıra sənədlərin imzalanmasının əhəmiyyətindən söhbət açıb və Koreya Respublikasını dünyada iqtisadi sahədə möcüzələr qazanmış bir ölkə kimi dəyərləndirib. Bu cür iqtisadi göstəricilər əldə etmiş ölkənin Azərbaycana etibarlı tərəfdaş kimi baxmasının səbəbini isə Q.Məmmədov tarixə Heydər Əliyev Torpaq islahatı kimi düşən islahatın beynəlxalq aləmdə, o cümlədən Koreya Respublikası kimi bir ölkə tərəfindən də yüksək qiymətləndirilməsində görüb, DTXK və Koreya Respublikasının Kadastr Xidməti Korparasiyası arasında imzalanmış anlaşma memarandumunu ölkələrimiz arasında iqtisadi əlaqələrin bundan sonra da inkişaf etdirilməsi üçün möhkəm hüquqi baza olduğunu qeyd edib.

Komitə sədri daha sonra DTXK ilə Koreyanın Kadastr planalma Korporasiyası arasında yaranan əlaqələrdən danışıb: "Dövlət Torpaq və Xəritəçəkmə Komitəsinin əməkdaşları Koreyaya səfəri zamanı bu sahədə görülən işlər barədə yaxından tanış olub, komitədə səfərlə bağlı Heydər Əliyev "Torpaq İslahatı Məktəbi"ndə geniş təqdimat keçirilib və qərara alınıb ki, bu sahədə əməkdaşlığın genişləndirilməsi istiqamətində işlər davam etidirilsin. Bunun nəticəsi kimi Koreya tərəfinə müraciət olunub və Azərbaycanda torpaq kadastrının aparılması ilə daha yaxından tanış olmaq üçün bu ölkənin mütəxəssisləri Azərbaycana dəvət olunub və onlarla 3 ay müddətində komitədə Azərbaycan mütəxəssisləri ilə birgə fikir mübadilələri aparılaraq "Azərbaycanda Torpaq Kadastr Sisteminin təkmilləşdirilməsi layihəsi"nin zəruriliyi barədə birgə razılıq əldə olunub. İlkin razılaşmalar barədə hər iki tərəf öz hökumətlərinə müraciət edib. Bunun nəticəsi olaraq 2008-ci ildə Koreya Respublikasından böyük nümayəndə heyətinin Azərbaycana işgüzar səfəri zamanı iki ölkə arasında bir neçə mühüm sənəd imzalanıb. Bunlardan biri də Dövlət Torpaq və Xəritəçəkmə Komitəsi ilə Koreyanın Kadastr planalma Korporasiyası arasında bağlanmış "Azərbaycanda Torpaq Kadastr sisteminin təkmilləşdirilməsi layihəsi" üzrə anlaşma memarandumudır".

Layihə Koreyanın Beynəlxalq Əməkdaşlıq Təşkilatı (KOİCA) tərəfindən həyata keçirilir. Bu təşkilat inkişaf etməkdə olan ölkələrdə dövlət qrant yardımını və texniki əməkdaşlıq proqramlarını həyata keçirmək məqsədi ilə 1991-ci il aprelin 1-də dövlət təşkilatı olaraq yaradılıb. Azərbaycanda kadastr üzrə pilot layihənin həyata keçirilməsi və müasir kadastr sisteminin yaradılması, habelə torpaq kadastrı üçün müasir metodologiyanın öyrənilməsi və tətbiqi, əməkdaşlıq potensialının gücləndirilməsinin dəstəklənməsi, həmçinin 1,5 milyon ABŞ dolları məbləğində qrant hesabına 18 ay müddətinə həyata keçirilməsi nəzərdə tutulur. Layihə çərçivəsində pilot ərazidə kadastr informasiya sisteminin yaradılması, kadastr xidməti üçün lazım olan avadanlığın təchizatı, kadastr informasiya sistemi üçün kompüterlərin alınması, sistem üçün proqram təminatının alınması və Azərbaycan qanunvericiliyinə uyğunlaşdarılması, çöl işlərini yerinə yetirmək üçün avadanlıqların alınması və mütəxəssislərə təlimin keçirilməsi planlaşdırılıb.

Layihənin reallaşdırılması nəticəsində pilot ərazidə əldə edilmiş torpaq ehtiyatlarının tərkibi, hərəkəti haqqında ətraflı kadastr məlumatının dövlət torpaq kadastrının müasir texniki və texnoloji səviyyədə aparılmasını təmin edəcəyini deyən Q.Məmmədov bildirib ki, torpaq ehtiyatları haqqında dolğun məlumatların olması torpağa görə ödəmələrin edilməsinə, torpaq və mülkiyyətin mədəni alqı-satqısına, vətəndaşların və hüquqi şəxslərin torpaq üzərində hüquqların qorunmasına səbəb olacaq.

ÖMƏR

Ədalət.- 2009.- 24 iyun.- S. 3.