İQTİSADİYYAT VƏ SOSİAL HƏYAT

GƏNCƏ NƏHƏNG ADDIMLARINI ATIR

Bu gün gündən-günə çiçəklənən ölkəmizin ayrı-ayrı bölgələrində ötən ilə yekun vurulur, görülən işlər nəzərdən keçirilir, qarşıda duran vəzifələr müəyyənləşdirilir. Qədim Gəncə, tarixə şer-sənət yurdu, sənətkarlar məkanı, müstəqil Azərbaycanın ilk paytaxtı kimi düşən və bu gün, sözün əsl mənasında, gündən-günə çiçəklənən, nurlu sabaha doğru nəhəng addımlarını atan ulu diyarda da ötən ilə yekun vurulur, qarşıda duran vəzifələr ölçülüb biçilir. Son illər şəhərdə keçirilən tədbirlər yeni forması, demokratik ruhu ilə yadda qalır. Açıq mikrofonlar, şəhər rəhbərliyi ilə əhalinin qarşılıqlı təması öz bəhrəsini verir. Bu dəfə də yenilik diqqəti cəlb etdi. Fəallar yığıncağından bir neçə gün əvvəl şəhər icra hakimiyyətinin başçısı Eldar Əzizovun hesabatı şəhər qəzetlərində dərc olundu, ayrı-ayrı kollektivlərdə, fərdi söhbətlərdə müzakirə mövzusuna çevrildi.

Fəallar yığıncağına gələnlər ilk öncə şəhərin inkişafını əks etdirən sənədli filmə tamaşa etdilər. İcra hakimiyyəti başçısının mətbuatda əvvəlcədən dərc edilən hesabatı sənədli filmin görüntüləri ilə həmahəng səsləndi. Hiss olunurdu ki, iştirakçılar məruzəni diqqətlə oxuyub. Görülən işlərlə də monitorda əyani surətdə tanış olublar. Bu baxımdan birbaşa əyani, işgüzar söhbətə başlamaq, əməyə qiymət vermək olar. İclas zalında mikrofonlar quraşdırılmış, hər kəsin öz fikrini sərbəst söyləmək imkanı yaradılmışdır. Hər hansı məsələyə münasibətini bildirmək, suallar vermək, təkliflər irəli sürmək istəyirsən? Buyur! Yığıncaqda əsil demokratiya hökm sürür, tənqid və özünütənqid şəraitində açıq-aydın söhbət gedir.

Gəncə şəhər icra hakimiyyətinin başçısı cənab Eldar Əzizov əsasən regionların sosial-iqtisadi inkişafı Dövlət Proqramının yerinə yetirilməsi sahəsində görülən işlərdən, ötən ilin uğurlarından söhbət açdı. Göstərdi ki, ümummilli liderimiz, ulu öndər Heydər Əliyev tərəfindən əsası qoyulan iqtisadi-siyasi strategiyanı yeni dövrün tələblərinə uyğun surətdə davam etdirən və qətiyyətli addımlar atan ölkə başçısı cənab İlham Əliyevin diqqət və qayğısı nəticəsində Gəncə bu gün sürətlə inkişaf edir, gündən-günə böyüyür, çiçəklənmə dövrünü yaşayır.

Prezident İlham Əliyevin uzaqgörən siyasətinin bəhrəsi olaraq həyatımızın hər sahəsində, ilk əvvəl isə özəl bölmə, qeyri-neft sektoru həmişə dövlətin əsas diqqət mərkəzindədir.

Ölkə başçısı cənab İlham Əliyev prezidentliyi dövründə səkkiz dəfə Gəncəyə gəlişi ilə hər dəfə şəhərin həyatında, mədəni, iqtisadi həyatında yeni uğurların, dəyərli işlərin təməli qoyulmuşdur. Elə bu diqqət, qayğı və köməyin nəticəsidir ki, ötən il şəhər üzrə ümumdaxili məhsulun həcmi 339 milyon manat təşkil etmiş, əvvəlki ilə nisbətən artım 23,2 faiz olmuş, iqtisadiyyatın əsasını təşkil edən sənayedə davamlı inkişaf təmin olunmuşdur.

Fəalların toplantısında hamı ürəklə çıxış etmək, görülən çoxsaylı işlərə münasibət bildirmək arzusundadır. Budur, iqtisadi inkişaf nazirliyi Gəncə şəhər şöbəsinin müdiri Natiq İmamquliyev, Kəpəz rayon icra hakimiyyətinin başçısı Çingiz Muxtarov, Nizami bələdiyyəsinin sədri Faiq Əhmədov, təhsil idarəsinin müdiri Mahal Əliyev, AKTA-nın professoru Qurban Əliyev, texnologiya universitetinin dosenti Hüseyn Budaqov, xalq artisti Pərvanə Qurbanova və başqaları hesabat dövründə şəhər həyatının bütün sahəsində əldə olunan uğurlardan, sahibkarlığın inkişafından, aztəminatlı ailələrə göstərilən kömək və qayğıdan, əhalinin təbii qaz və elektrik enerjisi ilə fasiləsiz təchizatından, sistemli surətdə görülən abadlıq və quruculuq işlərindən söhbət açdılar. Belə bir cəhət xüsusilə vurğulandı ki, bədxahlarımızın əsassız iddialarına baxmayaraq ölkəmizdə qeyri-neft sektorunun inkişafına xüsusi diqqət yetirilir. Bunu Gəncənin timsalında daha aydın görmək olar. Şəhərdə müxtəlif və mürəkkəb sənaye sahələri sürətlə inkişaf edir. Son beş ildə 30-dan artıq müəssisə tikilib və ya yenidən qurularaq istifadəyə verilib. Avtomobil və maşınqayırma zavodları, "Gəncə Tekstil", "Gəncə pambıqəyrici" ASC-ləri, "NEON", "ELBA" firmaları, "Fatoğlu" birgə müəssisəsi, "Gəncə şərab-2", "Gəncə qənnadı", "Əlvan metal emalı" səhmdar cəmiyyətləri şəhərin iqtisadi həyatında aparıcı rol oynayır. Özəl bölməyə, eləcə də qeyri-neft sektoruna daimi dövlət qayğısı nəticəsində belə müəssisələrin adı gündən-günə çoxalır. "İlin dörd fəsli" MMC-də asfalt-beton, "Əlvan metal emalı"nda sement, "MFK"də blok kərpic hazırlanır. Mənzil və ofis mebelləri, plastik boru, mərmər hissələr hazırlayan müəssisələrdə öz yerində!

Qədim şəhər bu gün əsil yüksəliş yolundadır. Hər sahədə görülən işlərin, həyata keçirilən tədbirlərin miqyası getdikcə artır. Hesabat dövründə Gəncə şəhəri üzrə iqtisadi və sosial sahənin inkişafına bütün maliyyə mənbələri hesabına 84,8 milyon manatlıq kapital qoyuluşu yönəldilmişdir. Bu da əvvəlki ildəkindən 3,1 dəfə çoxdur.

Çıxış edənlər ürəkdolusu razılıqla bildirdilər ki, cənab İlham Əliyevin ötən ilin martındakı səfəri zamanı "Daşkəsən filizsaflaşdırma" ASC-nin, polad kompleksinin, "DETAL" alüminium zavodunun təməlqoyma mərasimində iştirak etməsi hər birimizdə qürur hissi oyatdı. Sevindirici haldır ki, bu müəssisələrə kapital qoyuluşunun həcmi 1,2 milyard manatdan çox olacaqdır. Bu müəssisələr işə düşdükdən sonra Gəncədə 2 min nəfərdən çox adam işlə təmin ediləcəkdir. Ölkə başçısı həmin səfər zamanı "Gəncəsənayecihaz" ASC-də aparılan yenidənqurma işləri ilə də maraqlanmış, qaz və su sayğacları istehsal edən sexlərin günün tələblərinə uyğun qurulması üçün tövsiyyə və tapşırıqlar vermişdir. "Gəncəsənayecihaz" ASC-yə dörd milyon AVRO həcmində investiya yönəldilməsi də böyük hadisə kimi qiymətləndirilməlidir.

Gəncədə qeyri-neft sektorunun inkişafına qayğı və diqqətin nəticəsi belədir. Toplantı iştirakçıları avtomobil zavodunun uğurlarını da xüsusi vurğuladılar. Uzun illərin fasiləsindən sonra burada müxtəlif minik və yük avtomobilləri yığılır. Bir qədər əvvəl "OKA" markalı avtomobillər buraxan bu zavodda sonralar "MAZ" markalı yük maşınlarının və "Belarus" tipli traktorların yığımına başlandı. Bu gün Gəncənin bir sıra məhsulları respublikamızın hüdudlarını aşıb. Türkiyə, Ukrayna, Türkmənistan və digər ölkələrə ixrac olunur. Bütün bunların nəticəsidir ki, son illərdə Gəncənin iqtisadi strukturu əsaslı surətdə yeniləşir. Qədim diyar müasir sənaye obyektlərinin mərkəzinə çevrilir. Prezident İlham Əliyevin dediyi kimi: "Son beş il ərzində əksər rayonların iqtisadiyyatı iki dəfədən çox artıbdır. İlk növbədə bunun əsas səbəbi qeyri-neft sektorunun inkişafı olmuşdur. Yəni bu onu göstərir ki, qeyri-neft sektorunun inkişafına son beş il ərzində verilən dəstək və diqqət öz gözəl bəhrəsini verir".

Fəallar yığıncağının iştirakçıları tənqid və özünütənqid şəraitində bütün sahələri ətraflı təhlil etdi. Gündən-günə geniş miqyas alan abadlıq və yenidənqurma işlərindən, küçələrin, yolların, park və xiyabanların yeni görkəmindən, əhalinin artan rifah halından və göstərilən diqqət və qayğıdan söhbət açdılar.

Toplantıda Prezidentin icra aparatının məsul işçisi Canpolad Musayev iştirak edirdi. Sonda ölkə başçısı cənab İlham Əliyevə müraciət qəbul olundu.

***

...Fəallar yığıncağı sona yetir. Hamı qürur və iftixar hissi ilə şəhərin baş meydanı olan Heydər Əliyev meydanına çıxır. Göydələn binalar musiqili fontanın fonunda daha əzəmətli, daha möhtəşəm görünür.

Qarşıdan gedən iki ixtiyar qocanın söhbəti məni özünə cəlb edir.

- Müstəqillik ona görə qiymətlidir ki, qazandığın özünə, öz ölkənə qalır... Xeyli vaxt idi ki, Gəncəyə gəlmirdim. Gəldim və gördüyünüz işə heyran oldum. Əhsən!..

- Hələ bu harasıdır... Bir neçə ildən sonra bu qədim diyar daha abad, daha gözəl olacaqdır. Gəncə də, qədirbilən gəncəlilər də son illər ölkə başçısının qayğısı nəticəsində firavan günlərini yaşayır.

Yaşar NƏBİYEV

Ədalət.- 2009.- 6 mart.- S.5.