"Azercell" jurnalistlər üçün ingilis dili kurslarına başladı

Ali Ağan: "Jurnalistlərin Azərbaycanı dünyaya tanıtması üçün dil bilməsi vacibdir"

Qloballaşan dünyada KİV nümayəndələrinin daha çox xarici dil bilmələri onların daha etibarlı mənbələrə çıxışını təmin edir. Məhz bu səbəbdən inkişafı paylaşmaq prinsipini əsas tutan "Azercell Telekom" MMC ABŞ səfirliyi ilə birlikdə jurnalistlər üçün ingilis dili kursları təşkil edir. Bu kurslara jurnalistlərin hədsiz marağını nəzərə alaraq "Azercell" ikinci dəfə təlimlərə start verib.

"Park İnn" otelində ingilis dili kurslarının ikinci mərhələsinin başlanmasına həsr olunmuş mərasimdə çıxış edən "Azercell"in prezidenti Ali Ağan jurnalistlər üçün təşkil olunan ilk dil kurslarını xatırlatdı. Dedi ki, həmin kursun bitməsinə həsr olunmuş tədbirdə o, həmçinin, ABŞ-ın ölkəmizdəki səfiri Enn Dersi bu təlimlərin davam etdiriləcəyinə söz vermişdilər: "Azercell olaraq biz sözümüzün üstündə dayandıq. Bundan sonra da dayanacağıq. Mən həm də söz vermişdim ki, növbəti təlimlərdə Azərbaycanın ən yaxşı ingilis dili müəllimləri ilə yanaşı, öz yoldaşımı da bu kurslara gətirəcəyəm. Bu sözümüzə də əməl edəcəyik".

Xarici dil bilməyin üstünlüklərini vurğulayan Ali Ağan bunun jurnalistlər üçün daha çox önəm daşıdığını da bildirdi: "Çünki hər kəsin bütün dünyanı gəzib-görmək imkanı yoxdur. Çox zaman digər ölkələr barədə mediadan məlumat ala bilirik. Xarici dil bilmək həm də ölkəmizi tanıtmaq üçün gözəl vasitədir. Biz "Azercell" olaraq bir çox ölkələrdə - İspaniya, İngiltərə, Rusiya və Türkiyədə əlimizdən gələn qədər Azərbaycanı tanıdırıq. Ölkəmizdə gedən inkişafdan danışırıq. Amma yalnız özümüz xaricdə olanda deyil, ölkəmizə xaricdən nümayəndələr çağırıb, onlara da Azərbayanı tanıdırıq".

Cənab Ağan bildirdi ki, bu missiyada jurnalistlərin də üzərinə Azərbaycanı tanıtmaq kimi yük düşür: "Sizlər də ölkəmizin inkişafını xaricdəki həmkarlarınıza anlatmalısınız. Eyni zamanda, xaricdə olan gəlişmələri də Azərbaycan xalqına çatdırmağınız lazımdır. Bu halda dünyada qlobal dilə çevrilmiş ingilis dilini hamımızın çox yaxşı bilməsi lazımdır".

Ali Ağan bildirdi ki, bu kursları müvəffəqiyyətlə bitirənlərə diplom təqdimatı mərasimində həm o, həm də xanım səfir ingilis dilində çıxış edəcəklər. "Azercell"in prezidenti həmçinin dil kurslarının üçüncü mərhələsinin olacağına da söz verdi.

ABŞ səfirliyinin təmsilçisi Terri Devidson isə tədbir iştirakçılarını azərbaycan dilində salamladı. O, Azərbaycanda jurnalistika peşəsinin çox ağır olduğunu söylədi. Cənab Devidsonun dediyin görə, ölkəmizdə dürüst KİV nümayəndəsi kimi çalışmaq böyük cəsarət tələb edir: "Demokratik cəmiyyətdə insanlara düzgün informasiyanın çatdırılması, debatların təşkilində, şəffaflığın təmin olunmasında jurnalistlərin böyük rolu var. Sizin əlinizdəki qələm qılınc kimi silahdır. Bu qılıncdan səmərəli istifadə etməkdə isə xarici dil biliyi daha da köməyinizə çata bilər".

Diplomat bildirdi ki, hazırda qlobal şəbəkədə olan materialların 70-80 faizi ingilis dilindədir: "Buna görə də ingilis dilini mükəmməl bilməyiniz sizə daha çox informasiya mənbəyindən istifadə etməyə, daha bol məlumat toplamağınıza yardım edəcək". Terri Dedison kursa qəbul olunan KİV işçilərinə uğurlar arzuladı.

Qeyd edək ki, "Azercell" və ABŞ səfirliyinin təşkil etdiyi ingilis dili kurslarında 40-dan çox media nümayəndəsi iştirak edəcək. Ölkənin peçəkar dil müəllimləri onlara iki qrupda yüksək səviyyəli təlimlər keçəcəklər. Ötən il keçirilən anoloji kurslarda da 30-a yaxın jurnalist işitrak etmişdi.

VÜSAL

Ədalət.- 2009.- 6 mart.- S. 6.