DAĞLAR, GÖZLƏYİN MƏNİ

Fələk bağlayıb yolumu,

Kələfçələyib qolumu.

Kim deyir qaranlıqda

İşıq tək sönəcəyəm.

Dağlar, gözləyin məni

Bir gün geri dönəcəyəm.

Ya bir bahar axşamı,

Ya bir yağışlı gündə.

Ya qalxanla dönəcəyəm,

Ya da qalxan üstündə.

ANA, BİR DUA ELƏ

Ana, laylan ovutmaz,

Ovutmaz qərib könlümü.

Fələk göydən boylanıb,

Baxıb görüb könlümü.

Ana, burda qürbətdəyəm,

Dərdlərimi oyatma

Durnalarla göndərdiyim

Məktubu cırıb atma.

Ana, qara sevdalıyam,

Qara misralar yazdım.

Qara yuxular gördüm

Qara yuxular yozdum...

Ana, bir dua elə,

Haqdan küləklər əsir

Fələk göylərdən enib

Mənim yolumu kəsir...

AY PƏRDƏSİ

Sənlə mənim aramda

Dənizlər bir içim su,

Sənlə mənim aramda

Ömür bir yaz yuxusu,

Sənlə mənim aramda

Şəbi-hicran qorxusu,

Sənlə mənim aramda

Ay işığı - ağ pərdə,

Çarə yoxmu ilahi

Bu sevdaya, bu dərdə -

Bilmirəm nədən

Keçə bilmirəm

Ay pərdəsindən...

MƏN VƏ KÖNLÜM

İki yabançıyıq bir röyada -

Mən və könlüm.

İki yabançıyıq bir dünyada -

Mən və könlüm.

İki yabançıyıq hər yerdə,

İki yabançıyıq bir şerdə

Mən və könlüm.

İki yabançıyıq bu şəhərdə,

Mən və könlüm.

İki yabançıyıq,

Mən və ölüm.

QÜRBƏT YUVASI

Çiçəklər açılar, çiçəklər solar,

O sevda qoxulu çələnglər solar,

Arzular, ümidlər, diləklər solar

Mən sənin ömründən çıxıb gedərəm.

Geriyə dönmərəm gözləmə məni,

Yanaram, sönmərəm, gözləmə məni.

Sevda yollarında izləmə məni -

Mənim qərib könlüm qürbət yuvası.

Mənim qərib könlüm qürbət yuvası,

Bu alın yazımda qürbət səfası.

Sənə qalsın bu dünyanın səfası,

Mən sənin ömründən çıxıb gedərəm.

Mən sənin ömründən çıxıb gedərəm,

Ömrümü yollardan yığıb gedərəm,

Hər şeyi yandırıb, yaxıb gedərəm -

Gedərəm, gedərəm qeyb olaram mən.

YENİDƏN DOĞULSAYDIM

Ay işığı

Qaranlığın pərdəsini

Aralayır səssizcə.

Burdan çıxıb getsəydim,

Qarşı yatan qara dağa bir də qalxsaydım.

Son nəğməmi oxuyub,

Son duamı etsəydim.

Və başımı qaldırıb, göydə Aya baxsaydım,

Yenidən doğulardım

Və yenə sənə aşiq olardım.

ƏLLƏRİNİ MƏNƏ VER

Baxışlarım üşüyür

İçim alışıb yanır -

Bu da ayrılıq anı

Əllərini mənə ver,

Sən dayandır zamanı.

Gecə yağan yağışlarda

Bənövşə qoxusu var.

Saatların əqrəbində

Ayrılıq qorxusu var.

Həsrət dolu baxışlarda

Üşüyür bahar.

Sən içimin atəşi

Sən başımın dumanı...

Bu gün ayrılıq günü,

Bu da ayrılıq anı.

Gülümsə bir baxışla

Sən dayandır zamanı.

Naxışların içində

Ayrılıq butası var.

Bilirdim bu sevdanın

Bir gözəl xətası var.

Həsrət dolu baxışlarda

Üşüyür bahar.

MƏNİ BU SEVDAMDAN ASIN

Qışdan sonra yaz gəlməsin,

Sular axıb durulmasın.

Fələyin üzü gülməsin,

Məni ümidimdən asın.

Ay batsın gecə yarı,

Boz qurdlar ulamasın.

Ərisin dağların qarı,

Məni bu sevdamdan asın.

Torpağa qara daş əkin,

Üstünə adımı yazın.

Sonra Salavat çəkin,

Məni ruhumdan asın...

YAĞIŞ SƏSİ

Bu gün mənim içimdə

Evdən qaçıb

Dünyanı dolaşmaq istəyən

Bir uşaq həvəsi var

Bir də indi

Laçın dağlarında yağan

Yay yağışının səsi var...

İŞGƏNCƏ

Yaşamaq

Bir işgəncə oldu artıq,

Hardasan, uç gəl, ölüm mələyim.

Bir qələbəlik içində

Ovcumdan düşüb sındı ürəyim.

Bu bahar

İçimdə qovğalar var,

Quşlar salam gətirmədi kəndimizdən...

Adil ŞİRİN

Ədalət.- 2009.- 14 mart.- S. 20.