BU GÜN QAZANDIĞIMIZ QƏLƏBƏLƏR ONUN AD GÜNÜNƏ TÖHFƏDİR

Hər bir xalq, hər bir dövlət təkcə öz ərazisi, öz tarixi ilə deyil, həm də bu böyük şəxsiyyətlərin dühaları ilə də tanınır. Bu mənada Azərbaycanın dünya arenasında sözün böyük mənasında tanınıb, qəbul edilməsində əvəzsiz və şəriksiz xidməti olan böyük oğlu Ümummilli Lideri Heydər Əlirza oğlu Əliyevin xidmətləri danılmazdır. O, Azəbaycanın səsinin keçmiş SSRİ-nin hüdudlarından çox-çox uzaqlarda eşidilməsinə şərait yaradıb, rəvac vermişdi. Məhz onun fəaliyyəti nəticəsində Azərbaycan istər iqtisadi, istər mədəni cəhətdən sovetlər birliyində öncül olmuş və bu öncüllüklə də böyük dünyaya nüfuz etməyə başlamışdı.

Dövlətimizin idarəçilik sükanı arxasındakı o böyük illər ərzində Ulu Öndərimiz digər sahələr kimi nəqliyyat-dəmir yolu sektorunun da genişlənib şaxələnməsinə, sərhədlər keçməsinə xüsusi diqqət yetirmişdir. Artıq Azərbaycan dəmiryolçuları bir çox ölkələrlə birbaşa əlaqələr yaratmağa, müqavilələr imzalamağa imkan qazanmışdılar. Məhz ikinci dəfə hakimiyyətə qayıdışından sonra Azərbaycan prezidenti Heydər Əliyev cənablarının qayğısı və göstərişləri ilə dəmiryolçularımız bu sahəni yenidən qurmağa və müasir elmi-texniki nailiyyətlərdən yararlanmağa imkan əldə etdilər. Bunun nəticəsində də Azərbaycan dəmiryolçuları yeni-yeni uğurlara imza atdı, ölkənin "qan damarı" sayılan bu sahənin nüfuzunu yüksəltməyə, Avropanın və bütövlükdə dünyanın qabaqcıl təcrübəsinə yiyələnməyə nail oldular.

Həyat fəaliyyəti dövründə Ulu Öndərimizin Azərbaycanın iqtisadi, siyasi kursunu qəti müəyyənləşdirməsi bu gün də öz davamlığı və çevikliyi ilə nə qədər real və uzuqgörən bir siyasət olduğunu təsdiq edir. İndi ümummilli liderimizin siyasətini uğurla davam etdirən Azərbaycan prezidenti İlham Əliyev cənablarının qarşımıza qoyduğu məqsədlərə çatmaq nisbətən asandır. Ona görə ki, bu məqsədlərə doğru gedən yolun memarı Ümummilli Liderimiz Heydər Əliyev olub. Yəni biz elə bir özül üzərində dayanmışıq ki, o, bizləri yalnız uğurlara aparır.

Artıq hər il olduğu kimi, bu günlərdə də xalqımız, o cümlədən də dəmiryolçularımız Ulu Öndərimizin doğum gününü bayram əhval-ruhiyyəsi ilə qeyd edirlər. Bizlərin hər iş növbəsində qazandığımız uğur bu bayrama bir dəmiryolçu hədiyyəsidir. Düşünürük ki, biz öz uğurlarımızla hər birimizin qəlbində əbədi yaşayan və yaşayacaq Azərbaycanın dünəninin, bu gününün və sabahının işıqlı siması olan Ulu Öndərimiz Heydər Əliyevə ehtiramımızı təsdiq edirik. Çünki biz bir vətəndaş olaraq bu gunumuz üçün, çiçəklənən Azərbaycanımız üçün ona borcluyuq.

Birmənalı olaraq etiraf etmək lazımdır ki, ikinci dəfə müstəqilliyinə qovuşmuş Azərbaycanın yeni həyat səlnaməsi Ulu Öndərimizin adı ilə başlayır və bu səlnamə hər gün yeni-yeni uğurlarla Azərbaycan prezidenti İlham Əliyevin dünya siyasətində qazandığı naliyyətlərlə daha da cilalanır. Zaman keçdikcə bu uğurlar daha da artacaq, bu səlnamə daha da böyük qələbələrin saxlancına çevriləcəkdir. Biz buna əminik.

Arif Əsgərov

Azərbaycan Dövlət Dəmir Yolunun rəisi

Ədalət.- 2009.- 8 may.- S. 3.