O, BÜTÜN ZAMANLARDA XALQI İLƏ BİRLİKDƏDİR

Hər bir tarixi şəxsiyyət özünün həyat fəaliyyəti ilə xalqını tanıtmaqla yanaşı, həm də yaşadığı dövrü də bəşəriyyətin diqqət mərkəzinə çatdırıb. Yəni həmin tarixi şəxsiyyətin həyat yolu və fəaliyyəti araşdırılır, öyrənilir və hər kəs də bu yoldan, fəaliyyətdən özü üçün nəsə götürür, nəsə qazanır. Bu mənada xalqımızın tarixində əbədi bir iz salmış Ümummilli liderimiz Heydər Əliyev cənablarının xidmətləri danılmazdır. Heç kəs inkar edə bilməz ki, bu dahi şəxsiyyət, dünya şöhrətli siyasətçi məhz Azərbaycan üçün yaşayıb.

Elə ona görə də o müdrik insanın "Mən həyatımın mənasını xalqıma xidmətdə görürəm!" deməsi hər kəsin qəlbində xoş bir duyğu və inam yaratmışdı. Özü də zaman bu fikirlərin necə böyük bir həqiqət olduğunu bizlərə sübut etdi. Ulu Öndərimiz Azərbaycana ikinci dəfə xalq dəstəyi ilə rəhbər seçiləndən sonra yeni Azərbaycanı, müstəqil Azərbaycanı dövrün tələblərinə uyğun qurmağa, yayrtmağa başladı. Onun qəbul etdiyi qərarlar, imzaladığı sərəncamlar, verdiyi gbstərişlər elə bir zərgər dəqiqliyi ilə işəlnib hazırlanırdı ki, ilk andaca onun vacibliyi, həyati əhəmiyyəti hər kəsə aydın olurdu. Birmənalı olaraq başa düşülürdü ki, Ulu Öndərimizin bu qərar və tapşırıqları dövrün tələblərindən irəli gəlir və yeni Azərbaycanın böyük dünyanın sıralarına qatmağa xidmət edir. elə bu səbəbdəndir ki, imzalanmış "Əsrin müqaviləsi" və digər kontraktlar sərhədlərimizdən kənarlarda da, hətta dünyanın super dövlətlərində də böyük diqqət və maraqla qarşılanmış, dəstək qazanmışdır. Təsadüfi deyil ki, "Əsrin müqaviləsi"nin iştirakçısı olan dövlətlərin rəhbərləri də həmin müqavilələrin imzalanmasında yaxından iştirak etmiş və bu müqavilələrə xeyri-dua vermişdilər. İndi həmin müqavilələrin bəhrələri özünü göstərməkdədir. Digər tərəfdən də bu müqavilələr Azərbaycan iqtisadiyyatının yenidən qurulmasına, xarici iş adamlarının böyük məbləğlərdə Azərbaycana sərmayələr qoymasına imkan verdi, inam yaratdı. Hamı birmənalı olaraq Azərbayandakı iqtisadi mühitin sabitliyinə fəaliyyət üçün geniş meydanın və şəraitin olmasına əminlik hiss etdikdən sonra ölkəmizdə iqtisadi dirçəlişin sürəti get-gedə artmağa başladı. Bu gün həmin söhbət yeni iş yerlərinin açılması, əmək haqqlarının yüksəlməsi, pensiya və müavinətlərin artımı ilə müşahidə olunur. Bax, bütün bunlar göstərir ki, məhz Ulu Öndərimizin iqtisadi strategiyası ölkəmizin hər bir vətəndaşının həyat fəaliyyətinin yüksəlməsinə xidmət edirdi və bu gün də edir.

Yeni Azərbaycanda iqtisadi uğurların əldə olunmasında ən başlıca şərtlərdən biri də xalqın öz rəhbərinə və onun yeritdiyi siyasətə inamı idi. Məhz ümumxalq məhəbbəti qazanmış və həmişə xalqı ilə bir yerdə olan Heydər Əlirza oğlu Əliyev cənabları öz təcrübəsi ilə özünün dediyi müdrik bir fikrə həyat vəsiqəsi də verdi. Belə ki, onun "Mən ömrümün bundan sonrakı hissəsini xalqıma bağışlayıram!" kəlamı bizdə ona olan sevgini, inamı daha da artırdı və hər birimiz Ulu Öndərimizin bizim üçün, yəni bu xalq üçün gördüyü böyük işlərin mahiyyətini, məramını birmənalı olaraq dərk etdik. Tarixin bütün sınaqlarına, həyatın bütün çətinliklərinə sinə gərmiş və bütün mübarizələrdən qalib çıxmış Ulu Öndərimizin keçdiyi yol elə bir məktəb, elə bir təcrübədir ki, onu göz önünə gətirəndə bu böyüklüyün, bu müdrikliyin qarşısında baş əyir və şəksiz əmin oluruq ki, Allah bizi bir xalq olaraq məhz Ulu Öndərimizin simasında dünyaşöhrətli bir siyasətçi ilə, böyük bir öndərlə mükafatlandırmışdır. O, bu xalqın ən böyük tarixi siması, ən böyük siyasi lideridir və özü də təkcə bizim üçün yox, həm də bəşəriyyət üçün dünya üçün dəyərli olan böyük şəxsiyyətdir.

Böyük tarixi şəxsiyyətlərin anılması, onların dünyaya gəlişinin xatırlanması heç də təsadüfi deyil. Məhz bu an, bu xatırlanma ona olan sevgini, diqqəti və məhəbbəti büruzə verir. Bütün hallarda Heydər Əlirza oğlu Əliyev cənabları xalqına diqqətinin və sevgisinin mərkəzində olublar. Elə doğum günü ərəfəsində də həmin sevgi və diqqət onu ziyarət edənlərin, xatırlayanların dairəsi ilə bir daha təsdiqini tapır. Buraya Ulu Öndərimizin hər bir Azərbaycan vətəndaşının, hər bir soydaşımızın qəlbində onun yerini də əlavə etsək, onda bu sonsuz məhəbbətin qarşısında yalnız baş əymək və Ümummilli liderimizin əbədiyaşarlığına inamımızı büruzə verə bilərik. Bu sevgini, bu əbədiyaşarlığı öz həyatı və müdrikliyi bahasına qazanmış, öz məktəbini yaratmış, öz siyasi və iqtisadi kursunun bugünkü davamçıları üçün, ilk öncə isə Azərbaycan prezidenti İlham Əliyev cənabları üçün, Azərbaycan hakimiyyəti üçün hədiyyə etmiş Heydər Əliyev cənabları bütün zamanlarda, bütün dövrlərdə bizimlə, öz xalqı ilə birlikdə olacaqdır.

Mehman Mehdiyev

Sumqayıt Elektrikşəbəkə

ASC-nin İdarə Heyətinin sədri

Ədalət.- 2009.- 9 may.- S. 5.