MİN İLDİ

Bu dünya əzəldən belə, beləcə,

Verdik ömrü-günü yelə beləcə.

Ağılsız köpəklər elə beləcə,

Hürür ulduzlara, hürür min ildi.

İlkində, sonunda axtarış gedir,

Sübhündə, danında axtarış gedir,

Gedir, hər yanında axtarış gedir,

Açılmır göylərin sirri min ildi.

Dünən sönüb gedən od qançəkəndi,

Çapılıb, talanan yurd qan çəkəndi,

Sürü nə çəkibsə qurddan çəkəndi,

Qurdla bir otlayır sürü min ildi.

Əl həmin, həmindi Tanrı yaxası

Keçirir başlara Bəhlul çuxası.

Şeytan içimizdən deyil çıxası,

Düşmür çiynimizdən huri min ildi.

Qırıldıq, üz tutduq yenə qapına,

Vurulduq, üz tutduq yenə qapına,

Sənə sığınılan, sənə tapınan,

İlahi, hər günün biri min ildi.

Alırıq, satırıq dünya bazardı,

İlkini beşikdi, sonu məzardı.

Ölüdən şeytan da elə bezardı,

Elə əzabdadı diri min ildi.

AŞAĞI

Yüz ildi, min ildi... Tələsmə, vaxt var...

Yüz ildi, min ildi tale var, baxt var.

Yüz ildi, min ildi Tanrı var, haqq var,

Bəs nə var bu mindən, yüzdən aşağı?

Əlimdən çıxanlar qələmdən çıxır,

Qəzəbim sıyrılıb sitəmdən çıxır.

Dərdimin tüstüsü təpəmdən çıxır,

Göz yaşım süzülür gözdən aşağı.

Sönüb öləziyən közə nə var ki,

Daha üfürməli gözə nə var ki...

Yüz ildi, min ildi təzə nə var ki,

Nə var ki, "gözlə"dən, "döz"dən aşağı.

Na vaxt ki, dərgahdan qovuldu şeytan,

Qurtara bilmirik suçdan, günahdan.

Beş kəlmə söz qalıb Xətai şahdan,

Qalan nə qalıbsa sözdən aşağı.

Beləmi buyurmuş Yaradan, quran,

Bayquş xislətliyik yıxan, uçuran.

Bizdən yuxarıda bir sirdir duran,

Bir sirr də gözləyir bizdən aşağı.

GÖZDƏN

Bu zaval deyəsən təzə gələndi,

Bilirmi nə gəlsə düzə gələndi?

Sən demə bu söz də gözə gələndi,

Qoruya bilmədim sözümü gözdən.

Mən könül verəndən qəmə, bilmişəm,

Kimə üz tutular, kimə, bilmişəm.

Düzümü içimdə gömə bilmişəm,

Heç vaxt asmamışam düzümü gözdən.

Neynim, çəkən məni gözələ çəkdi,

Aldı taleyimi göz ələ, çəkdi.

Sevdiyim bir qara göz elə çəkdi,

Ayıra bilmədim gözümü gözdən.

Bu Vətən deyilən yer ömür boyu,

Oldu mənim üçün pir ömür boyu.

Nə gözə təpildim bir ömür boyu,

Nə də ki, düşürdüm özümü gözdən.

Başıma nə gəldi dözdüm səbrnən,

Dolaşdım səbrnən, gəzdim səbrnən.

Bir qəfil ölümnən, bir də qəbirnən,

Bir gün salacağam dözümü gözdən...

QARIŞMA

Ürək nə istəyir çıxar başından,

Ürəyin işinə qarışma, bala...

Get də çörəyini çıxar daşından,

Çörəyin işinə qarışma, bala...

Bu qoşun dərdlərə gər də sinə döz,

Başdan çıxardığı tüstüsünə döz.

Fəslin soyuğuna, istisinə döz,

Küləyin işinə qarışma, bala...

Gecələr baş qatar, gün kələk gələr,

kələk dinə dönər, din kələk gələr.

Başına min oyun, min kələk gələr,

Kələyin işinə qarışma, bala...

Ətək bir zamandı, əl bir zamandı,

Yekdil zaman deyil, əlbir zamandı.

Bu zaman əvvəldən xəlbir zamandı,

Ələyin işinə qarışma, bala...

Sənin bu dünyayala nə hesabın var,

Bu haqqa-hesaba necə tabın var?

Əldə öz qələmin, öz kitabın var,

Mələyin işinə qarışma, bala...

Bu can nə çəkirsə elə can bilər,

Bu cana çəkdirən haradan bilər?

Deyirlər hər şeyi Yaradan bilər,

Fələyin işinə qarışma, bala...

Kəmaləddin Qədim

Ədalət.- 2009.- 23 may.- S. 20.