SİYƏZƏNLİLƏR QƏHRƏMAN OĞULLARINI UNUTMURLAR

Qarabağ şəhidi, Qarabağ əlili. Vətənin hər bir qarışı üçün canından-qanından keçən, müharibə alovunda əlini, qolunu, gözünü, ayağını itirən , bədənində mərmi qəlpələri gəzdirən qeyrətli oğullarımızg Talelərinə müharibə qisməti düşmüş bu adamlar ömürlərini onlara oğul demiş Vətənin ömrünə calamış, soyuq səngərlərdə bişib-bərkimiş, şərəfli həyat yolu keçmişlər.   
   Ölüm-dirim müharibəsinə qəhrəman oğullar göndərən rayonlardan biri də Siyəzən rayonu oldu.   
   Tərtər, Horadiz rayonları ətrafında gedən qanlı döyüşlərdə Siyəzən rayonunun qəhrəman oğulları əsil kişilik, vətənpərvərlik nümunəsi göstərdilər. Belə ki, əhalisi 35 min olan Siyəzən rayonu 75 şəhid verdi. Müharibənin qanlı-qadalı vaxtlarında 48 nəfər siyəzənli əlil oldu.   
   Siyəzənlilərin qəhrəmanlığı həm hökumətimiz, həm də xalqımız tərəfindən yüksək qiymətləndirildi.   
   Onların vətən qarşısında borclarını şərəflə yerinə yetirmələrini təbliğ edənlərdən biri - Siyəzən şəhərinin ağsaqqalı, şəhid atası Hacı Əzizbala Əsədovun söylədiklərindən:   
   - Sirr deyildir ki, torpaqlarımızın erməni tapdağından azad olunması üçün aparılan müharibədə yüzlərlə insan şəhid, minlərlə insan isə əlil olmuşdur. Yaşadığı bölgədən asılı olmayaraq, hamı Vətən torpağının azadlığı uğrunda mübarizə aparmışdır. Bu ölüm-dirim müharibəsində siyəzənlilər öz vətəndaşlıq borclarını şərəflə yerinə yetirmişlər. Rayonumuzda şəhidlərin xatirəsini əbədiləşdirmək məqsədilə Siyəzən şəhərinin mərkəzində "Şəhidlər xiyabanı" salınmışdır.   
   Qarabağ müharibəsində öz canlarını Vətən uğrunda şəhid etmiş 75 nəfər siyəzənlinin foto-şəkli "Şəhdilər xiyabanı"nda cərgə ilə düzülmüşdür. Bundan əlavə yüksək zövqlə tərtib edilmiş "Şəhidlər muzeyi" təşkil edilmişdir. Onu da qeyd edim ki, Siyəzən rayonunda açılmış "Şəhidlər muzeyi" respublikamızda açılmış ilk muzeylərdən biridir.   
   Hacı Əzizbala sözünə davam edərək dedi:   
   - Xalqımız Vətən uğrunda öz canlarını qurban vermiş şəhidlərin adını daim uca tutur. Şəhidlərimizin əziz xatirəsi əbədiləşdirilməklə yanaşı, onlardan 4 nəfəri ölkənin ən ali mükafatı olan "Aəzarbaycan bayrağı" ordeni ilə təltif edilmişdir. Mənim oğlum - Nazim Əzizbala oğlu Əsədov isə "İgidliyə görə" medalı ilə təltif edilmişdir.   
   Ölkə rəhbərliyi bu gün də Qarabağ müharibəsi əlillərinin qayğısını çəkir. Belə ki, 2008-ci ildə 6 nəfər şəhid ailəsi, 10 nəfər Qarabağ müharibəsi əlili mənzillə təmin olunmuşdur. Daha 2 nəfər Qarabağ əlili üçün fərdi ev tikilib istifadəyə verilmiş, 4 nəfər əlilə "OKA" markalı minik avtomobili hədiyyə edilmişdir.  

   SON SÖZ

   Şəhid atası Hacı Əzizbala ağsaqqallar adından danışaraq fikrini belə tamamladı:   
   - Bu gün biz siyəzənlilər rayonumuzun son illərdə əldə etdiyi sosial-iqtisadi göstəricilərə görə RİH-nin başçısı Əflatun Rufiyev cənablarına minnətdarıq. Çünki onun rəhbərlik etdiyi dövr ərzində rayonumuz nəzərəçarpacaq dərəcədə dəyişmiş və gözəlləşmişdir.   
   Mən fürsətdən istifadə edib əlaqədar təşkilatların qarşısına bir təklif qoymaq istəyirəm. Məlumdur ki, şəhidlərimizin adını əbədiləşdirmək üçün "Şəhidlər xiyabanı"nın ərazisində "Şəhidlər muzeyi"də yaratmışıq. Həmin muzeydə bütün şəhidlərimizin foto-şəkili verilməklə, onların həyatlarının şəhidlik dövrünə qədərki ən maraqlı anlarını da fotoşəkil vasitəsilə tərtib etmişik.   
   Mən təklif edirəm ki, "Şəhidlər muzeyi"nin yanında "Diyarşünaslıq muzeyi"də təşkil olunsun. Belə bir muzeyin də təşkil olunması gənclərimizin hərbi- vətənpərvərlik ruhunda tərbiyə olunmasında mühüm rol oynayardı.

Ədalət.- 2009.- 24 yanvar.- S.12.