FİRUDİN RÜSTƏMLİNİN ŞEİRLƏRİNDƏN

NƏ VAXT

Gör nə çətin

zəmanədə yaşayırıq

Gör nələri-

təhqirləri,

kinli-kinli baxışları

dərələri, yoxuşları

çiynimizdə daşıyırıq.

Torpağımı ayaqlayan

çörəyimdən süfrə açan

Şovinistlər-

qəlbi qara neçə pislər

bəyənməyir xalqı, dili

Gör kimlərə əlaltıdır-

Nizaminin,

Nəsiminin,

Fizulinin

qadir eli.

Bəs nə zaman

Oyanacaq milyonlarla yuxulular

Nə vaxt, nə vaxt

qeyrət atın minəcəkdir axı onlar?

4.02.1980

***

Bu yalanlar hardan doğur, ay Allah

Qıpqırmızı söyləyirlər üzümə.

Qəlbim, ağlım xəcalətdən çəkir ah

Utanmadan onlar baxır gözümə.

Dünya olur gözlərimdə baş-ayaq

Yaşamaq da beş qəpiyə dəyməyir.

Bil əmr etmək mümkün deyil bu sayaq

Bir qurd kimi yalan qəlbi çeynəyir.

Qəbir qazma nə özünə, nə mənə

Qeyrətli ol, kişi kimi de sözü.

Qulluq etmə yalan adlı bir dinə

Səni dartır qeyrətsizlik lap özü.

Ədalət.- 2009.- 31 yanvar.- S. 15