Aşıqlar festivaldan qayıtdı

 

Proqramda zurna alətinin solo ifasına yer ayrılıb

 

Şirvan aşıqları Parisdə Dünya Mədəniyyətləri Evinin (Maison des cultures du Monde) təşəbbüsü ilə keçirilən "Təxəyyül" musiqi festivalında çıxış ediblər. Azərbaycan heyətinin və eyni zamanda proqramın rəhbəri, YUNESKO eksperti Sənubər Bağırovanın "Ayna" qəzetinə bildirdiyinə görə, martın son günlərindən start götürən və 1 ay davam etməsi nəzərdə tutulan festivalda azərbaycanlı aşıqların 2 günlük konserti olub:

"Onlara ayrılan konsert günlərində proqramı "Pişro" adlanan janrla açan şirvanlı aşıqlar tamaşaçılara "Mirzəyi" havası, rəqs nömrələri nümayiş etdiriblər. Səməd Vurğunun "Azərbaycan" şeiri də musiqinin dili ilə tamaşaçılara aşılanıb. Proqrama "Müxümməs"lə yekun vurulub".

Sənubər xanımın proqrama daxil etdiyi zurna və balaban alətində solo ifa da konsertdə həllini tapıb. Daha sonra iki zurna və iki nağaranın müşayiəti ilə "Koroğlu nağarası" adlı hava səsləndirilib. Ekspertin fikrincə, bu festivalda zurna aləti 10 il əvvəl ermənilərin ifasında səsləndirilmişdi. Uzun bir aradan sonra alətin kimə və hansı musiqi tarixinə məxsus olduğu proqram çərçivəsində göstərilmişdir.

Qeyd edək ki, şirvanlı aşıqlardan bu festivalda Vüqar Niftəliyev, Ağamurad İsrafilov və Əli Quliyev çıxış ediblər. Sonuncunun xüsusi olaraq göstərdiyi aşıq oyunları tamaşaçıların gurultulu alqışlarını qazanıb. Sənubər xanım iki günlük konserti yuxarıda adı çəkilən mədəniyyət evi rəhbərinin xüsusi zövqlə dinlədiyini bildirdi. Eyni zamanda Azərbaycandan Parisə yenicə təyin olunan səfirimiz də tamaşaçılar sırasında olub. Dünyanın dörd bir yanından çıxış edən iştirakçılar arasında azərbaycanlı musiqiçilərin proqramı maraqla qarşılanıb. Bu fikri məşhur musiqiçilərlə yanaşı, aşıqları alqışları ilə 3 dəfə səhnəyə qaytaran tamaşaçılar da göstərə biliblər.

Xatırladaq ki, Sənubər Bağırova ilə Parisdəki Mədəniyyət Evinin əməkdaşlığı 3 il əvvəldən başlanır. Həmin dövrdə "Aşıq antologiyası" adlı disk buraxılıb və bunun ardınca bir sıra əməkdaşlığa imza atılıb.

 

 

Z.Rəhimqızı

 

Ayna.-2010.-10 aprel.-S.20.