Canəli Əkbərov - 70

 

Teatr Xadimləri İttifaqında tanınmış muğam ustadı, xalq artisti Canəli Əkbərovun 70 illik yubileyi münasibəti ilə mərasim keçirilib. Tanınmış sənət adamlarının, muğam ifaçılarının iştirakı ilə keçirilən tədbirdə yubilyarın ömür yolundan bəhs olunub. Bildirilib ki, 70 il əvvəl Lənkəranda musiqiçi ailəsində anadan olan, xanəndə babası və atasının yolunu davam etdirən Canəli Əkbərov illər sonra Bakıda Filarmoniya nəzdində fəaliyyət göstərən Xan Şuşinski muğam studiyasında ustad dərsi alıb. Bu məktəbin təsiri onun bütün yaradıcılıq yolunu müşayiət edib.

Bakı Musiqi Məktəbini və Azərbaycan Dövlət Universitetini bitirən sənətkar, 1976-cı ildən Opera və Balet Teatrının solistidir. Doğma teatrın səhnəsində yaratdığı Məcnun, Kərəm, Qərib, Camal, Şah İsmayıl, Azançı, Axund kimi obrazlar hər zaman sənətkara geniş auditoriya rəğbəti qazandırıb. Azərbaycan ictimaiyyəti Canəli Əkbərovu həm də görkəmli pedaqoq kimi tanıyır. 1992-ci ildən bu günə kimi muğam sənətinin incəliklərini gənc nəslə öyrədir.

Mərasim konsert proqramı ilə davam edib. Tanınmış xanəndələr və yubilyarın istedadlı tələbələri çıxış ediblər.

 

 

Ayna.-2010.-17 aprel.-S.20.