"Şou-biznes Lenini arzusuna çatdırıb"

Fərhad Xəlilov: "O arzu edirdi ki, incəsənət kütlə üçün olmalıdır ..."

"Bu gün rəssamlığa maraq güclənib. Çünki Azərbaycan xalqı sənətə meyilli xalqdır. Məndən soruşurlar ki, "Sizin əsərlərinizi bizim tamaşaçılar qavrayacaqmı?". Cavab verirəm ki, "Bəziləri qavrayacaq, çünki təbiətən qavrayırlar. Onlar da tək-tük adamlardır. O birilərinə nə isə deməyə nə mənim, nə sizin ixtiyarınız çatır. Çünki sənəti bilmir, amma bilməlidir, tanımalıdır. Heç olmazsa, 100 dəfə görməlidir ki, gözü bir az açılsın". Bu iş hər birimizin öhdəsinə düşür. Dövlətdən tutmuş hər bir vətəndaşa kimi bununla məşğul olmaq lazımdır". Bunu Rəssamlar İttifaqının sədri Fərhad Xəlilov söylədi.

Onun fikrincə, rəssamlara qanun çərçivəsində müəyyən imkanlar yaradılmalıdır. İttifaq sədri hesab edir ki, vergi siyasəti müəyyənləşdirilən zaman sərginin təşkili üçün müxtəlif cür imtiyazlar olmalıdır:

"Bir neçə il öncə Macarıstanda bir sərgimiz açıldı, rəssamın əsərlərinin yük departamentindən keçməsi üçün Azərbaycan Rəssamlar İttifaqı 2000 dollar xərclədi. Demirəm ki, hamıya imtiyaz lazımdır. Elə sahələr var ki, onlar üçün bu şəraiti yaratmaq lazımdır. Milli Məclis "Mədəniyyət haqqında" qanunu qəbul edəndə rəssam üçün müəyyən imkanlar yaradılmalıdır".

Qeyd edək ki, Azərbaycanda sırf mədəniyyət telekanalının açılması ilə bağlı sənət adamları müxtəlif təkliflərlə çıxış edirlər.

Belə təkliflərdən birini də Fərhad Xəlilov verib. O deyir ki, təkliflər edilsə də, nəticəsi yoxdur.

F.Xəlilovun dediyinə görə, Rusiyanın ən yaxşı kanalı mədəniyyət kanalıdır: "İstərdik ki, bizim də belə bir kanal olsun. Kanalın yaranması üçün bəzi obyektiv məsələlər var, mən tam əminəm ki, bizim buna imkanımız var".

Gənc rəssamların fəaliyyət planından söz salan F.Xəlilov istedadların sayının qənaətbəxş dərəcədə olduğunu etiraf etdi. "Ancaq elə istedadlar var ki, onlar çox zərifdir, belə istedadları qorumaq lazımdır", - deyə bildirdi.

"Biz dünya mədəniyyətinə qovuşmaq istəyirik, ancaq bunun çətinliyini bilmirik. O barədə ki, sən gərək öz rəssamlığını sübut edəsən, bunu sübut edənə kimi sənə kömək lazımdır. Sən öz sənətini sübut edənə kimi yaşamaq üçün ayrı sənətdən qazanırsan. Müxtəlif yerlərdə - kafedə, dükanda işləyirlər. Bəziləri isə dövlətdən yardım alır. Bizdə də belə olmalıdır. Keçmiş sistem zamanı bu yardımı lazım olan da alırdı, olmayan da. Elə adamlar yardım alırdılar ki, bəlkə heç bu sənətlə məşğul olmamalıdırlar. Mən bu mənada həmişə sərt olmuşam. Ancaq zəmanə dəyişdi, zamanın çətinlikləri əmələ gəldi və mən insan kimi yumşaldım. Bu yardımı ancaq tək-tük adamlar ala bilər. Əgər sən bu sənəti sevirsənsə, bunsuz yaşaya bilmirsənsə, bir yol tapacaqsan. İndi rəssamlar var ki, müəllimlik edir, binaların, ofislərin bərpası, dizayn ilə məşğul olur və pul qazanırlar. Hesab edirəm ki, get-gedə rəssamların imkanları çoxalacaq. Bakıda nə qədər bina tikilib, əgər hər evdə yaşayacaq insan bir əsər alsa, görün nə qədər əsər satılacaq".

"Sənətdə müəlliminiz kim olub?" sualını cavablandıran rəssam "sənət müəllimim təbiət olub. Van Qoqu isə ən böyük rəssam hesab edirəm. Azərbaycanda da çox böyük rəssamlar var. Amma rəssamlıqda yarışı heç cür anlaya bilmirəm. Məni düşündürən budur: çəkə bilmədiklərimi çəkim. Fikrim var ki, Abşeronun bəzi yerlərini yaradım. Abşeronun ekologiyası, ondakı dünya çox dəyişir. Abşeronu yaddaşlara həkk etməyi bir fakt kimi yaradıcılığıma daxil edəcəyəm. Abşeronun estetikası, mədəniyyəti, tarixi qalmalıdır. Portret janrını isə gəncliyimdə işləmişəm. İndi portret işləmirəm. Sərgimdə yalnız xanımımın portretini qoymuşdum. Mən təbiətlə işləyirəm. Bu gün portret işləyən rəssam o qədər də tanımıram" dedi.

Şou-biznesin rəssamlığa nə dərəcə yol açdığına gəlincə, ittifaq sədri deyir ki, şou-biznes kiməsə lazım ola bilər, ancaq ona lazım deyil. Onun fikrincə, sovetlərin dövründə də şou-biznes var idi:

"Amma elə fikirləşməyin ki, şou-biznes ancaq musiqidədir. Bu gün şou-biznes artıq rəssamlığa da yol tapır. Şou-biznes anlayışı yüngül yolla insanlara xoş gəlmək, onları cəlb etməkdir. Bu, kütləvi mədəniyyət və mədəniyyətə cəlb etməkdir. Kütləvi mədəniyyət hər zaman olub, ancaq indi daha güclənib. Bu, bütün dünyada böyük problemdir. Mən bir şeyi deyə bilərəm ki, şou-biznes Lenini arzusuna çatdırıb. O hər zaman arzu edirdi ki, incəsənət kütlə üçün olmalıdır. Amma sənətdə kütləvilik çox qorxuludur".

Xatun

Ayna.- 2010.- 7 avqust.- S.19.