Arzuların teatrı

Sənubər İsgəndərli ümidini itirmir

"Teatrın durumu bu günə qədər məni qane etmirdi. Amma indi o əyər-əskiklikdən danışmaq istəmirəm. Çünki inanıram ki, bundan sonra hər şey gözəl olmalıdır. Bu baxımdan teatrımızda islahatları səbirsizliklə gözləyirəm. Allahdan ömür diləyirəm ki, arzu etdiyim teatrda çalışa bilim". Bu sözləri Azərbaycan Dövlət Akademik Milli Dram Teatrının aktrisası, əməkdar artist Sənubər İsgəndərli deyir.

İştirak etdiyi son filmin "Hökmdarın taleyi" olduğunu xatırladan aktrisanın sözlərinə görə, tamaşalar, çəkilişlər olmayanda çox darıxır: "Xüsusən də yayda bağda qalanda ürəyim yaman sıxılır. Divarlar üstümə gəlir elə bil. Başımı kitabla, internetlə qatmağa çalışıram".

S.İsgəndərli teatrın yaradıcı heyətinin müsabiqə yolu ilə yenidən yığılmasını normal qəbul etdiyini deyib:

"Bəlkə onda düzgünlük olar. Elələri var ki, nə vaxtsa, nəyə görəsə xalq artisti adı alıb. Amma ondan sonra heç bir iş görməyib, işləməyib. Rahat oturub ki, "nəyimə lazımdır bu yolu gedim-gəlim?". Dəfələrlə görmüşəm, rol veriblər istəməyib. 7-8 ildir teatrda olmamısansa, səni nəyə görə saxlamalıdırlar? Həm də indi tamam başqa zəmanədir - işləməyən dişləməz. Mən də hamı kimi ərizəmi yazıb işdən çıxacam. Sonra işə götürsələr sağ olsunlar, götürməsələr, başqa sahədə işimi davam etdirəcəm".

XATUN

Ayna.- 2010.- 11 dekabr.- S.20.