"Humay" Qızlar Ansamblı İstanbulda

Onlar bəyənildiklərini deyirlər

Meqa-star Tarkanı, Rafet El Romanı, Sərdar Ortac və Alişanı müxtəlif konsertlərdə müşayiət edən, gənc olmasına baxmayaraq tarda ifası ilə ürəkləri oxşayan tarzən Humay Qədimova yeni bir uğura imza atdı. İfaçı bu yaxınlarda rəhbərlik etdiyi "Humay" Qızlar Ansamblı ilə birgə İstanbulda yaddaqalan konsert verib. Xoş təəssüratlarla qayıdan tarzən Humay Qədimova uğurlu konsertlə bağlı fikirlərini "Ayna" qəzeti ilə bölüşüb:

"Bu konsert layihəsinə öncə öz Vətənimiz - Azərbaycandan başladıq. Akademik Opera və Balet Teatrında konsert verdik. Zənnimcə, həmin çıxışımız yaddaqalan oldu. Sonra biz düşündük ki, belə bir konsert layihəsi ilə artıq Avropaya çıxmaq vaxtıdır və bu turumuzu Türkiyədən başladıq. Konsertimiz İstanbulun çox məşhur "Tim Moslak Show Center"in də baş tutdu. Həmin məkanda bir vaxt bizim xalq artisti Zeynəb Xanlarova konsert vermişdi, eyni zamanda həmin səhnədə Türkiyənin çoxsaylı səntçiləri konsertlər təşkil edir".

H.Qədimova bildirib ki, bu konsert üçün Bakıdan 22 nəfərlik heyət yollanmışdı: "Musiqi prodüserimiz Asif Kərimov da bizimlə birgə idi. Milli musiqiləri, xalq mahnıları və rəqslərini, muğamları Türkiyədə ifa etdik və yüksək səviyyədə qarşılandıq. Konsertdə azərbaycanlı xanəndə Elnarə Abdullayeva və türkiyəli müğənni Kibariyə də səhnəyə çıxdı. Bizim müşayiətimiz altında onların ifaları səsləndi. Bu konsertlə bağlı Türkiyənin "Tatlısəs" televiziyasına qonaq oldum. Maraqlısı o idi ki, mən Bakıdakı konsertimdə çox həyəcanlı idim, yəqin ki, bu öz Vətənimdə konsert verdiyimdən irəli gələn bir həyəcan idi. İstanbulda isə heç bir həyəcanım yox idi, elə bilirdim ki, məşqə çıxıram".

İfaçı konsert zamanı qarşılaşdığı xoşagəlməz bir texniki problemi də peşəkarcasına yola verməyi bacarıb. Elə konsertin ikinci nömrəsində Humay Qədimovanın tarının sarı siminin qırılması bütün ansamblı şoka salıb, amma gənc musiqiçi özünü itirməyib: "Sim qırılanda ansambl şokda oldu ki, indi nə olacaq? Bakı konsertindən fərqli olaraq, İstanbul konsertimizdə nə aparıcı qoyulmuşdu, nə də çoxsaylı müğənnilər vardı. Fasilə söhbəti də olmadı. Orada konsertdə aparıcının olmasına maraq göstərilmir. Təbii ki, onların qayda-qanunlarına riayət etdik. Saat yarımlıq konsert oldu, ancaq konsert boyu bir dəqiqə belə vaxtım olmadı ki, tarımın qırılan simini dəyişim. Bütün konsert boyu həmin qırılan simlə çaldım. Efir görüntülərində də görəcəksiniz ki, bütün konsertdə sim sallana-sallana qalıb. Çox şükür ki, başqa bir problemlə qarşılaşmadıq və bu çıxışı uğurla başa vurduq. Bu konsert bütün maqazin verilişlərinin marağına səbəb oldu və yetərincə işıqlandırıldı. Konsertin anonsları "Kral" televiziyasında getdi, eyni zamanda mərkəzi küçələrdə konsertin afişaları vurulmuşdu. Mən çox şadam ki, Azərbaycan musiqisi bu qədər sevilir".

H.Qədimova onu da əlavə edib ki, Azərbaycan muğamı, tarından heç bir yerdə yoxdur. O, bu səfər əsnasında çoxsaylı təkliflər alıb.

Z.RƏHİMQIZI

Ayna.- 2010.- 18 dekabr.- S.20.