Diasporla iş üzrə komitə hesabat verib

Məlum olub ki, artıq dünyada Azərbaycanın 370 diaspor təşkilatı var

Dünən Yeni Azərbaycan Partiyasının qərargahında Diasporla İş üzrə Dövlət Komitəsinin sədri Nazim İbrahimov ilin yekunları ilə bağlı mətbuat konfransı keçirib ("Turan"). O, 2010-cu ilin yekunlarını uğurlu adlandırıb.

"2010-cu ildə dünyanın bir neçə ölkəsində, o cümlədən Almaniya, İsveç, Polşa, Ukrayna, Rusiya, Türkiyə, Qazaxıstan, Cənubi Koreya və Gürcüstanda ümumilikdə 15 yeni diaspor təşkilatı təsis edilib. Ümumiyyətlə, dünyanın müxtəlif ölkələrində 370-dən çox diaspor təşkilatı fəaliyyət göstərir", - o qeyd edib.

N.İbrahimov Moskvada milli-etnik zəmində baş verən son hadisələrin Azərbaycanı narahat etdiyini deyib.

"Hələ azərbaycanlılarla bağlı narahatedici ciddi hadisələr qeydə alınmayıb. Diasporla İş üzrə Dövlət Komitəsinin əməkdaşları artıq Moskvaya ezam olunublar və Rusiyadakı diaspor təşkilatları ilə işləyirlər", - deyə o vurğulayıb.

Komitə sədri 2011-ci ilin martında Bakıda Dünya Azərbaycanlılarının 3-cü qurultayının keçiriləcəyini bildirib:

"Qurultayın təşkili ilə bağlı Azərbaycan prezidenti sərəncam imzalayacaq".

O, Amerikada Azərbaycan diasporunun işindən razıdır. "Hazırda Amerikada yeni təşkilatlar yaranıb. Bu ölkədəki diaspor təşkilatları müsbət töhfələr verir. Amerikadakı diaspor təşkilatlarının mərkəzi ofis məsələsi də yaxınlarda həllini tapacaq. Bu ofis Vaşinqtonda olacaq", - deyə qeyd edən N.İbrahimov başçılıq etdiyi komitənin İranda yaşayan azərbaycanlılarla bağlı hər hansı iş aparmadığını deyib.

"İrandan kənarda yaşayan azərbaycanlı qardaşlarımız bizim diaspor təşkilatlarında təmsil olunur. Ancaq İran ərazisində yaşayan azərbaycanlılarla bağlı hər hansı iş aparmırıq. İrandan da Azərbaycanda baş verənlərə münasibət bildirilməsini yaxşı qarşılamırıq", - deyə o vurğulayıb.

Komitə sədri diaspor təşkilatları arasında gənclər təşkilatlarının, xüsusilə Leyla Əliyeva və Taleh Heydərovun başçılıq etdiyi gənclər təşkilatlarının işini xüsusi vurğulayıb. "Rusiya-Azərbaycan Gənclər Təşkilatı və Avropa-Azərbaycan Gənclər Təşkilatı çox yüksək səviyyədə tədbirlər keçirir", - deyə o bildirib.

N.İbrahimov Gürcüstanda 124 azərbaycanlı məktəbinin 80-dən çoxunda gürcü dili kursları açıldığını bildirib. "Eyni zamanda, hər il Gürcüstandan olan 20 azərbaycanlı gəncin Şimali Kipr Yaxın Doğu Universitetində bonus hesabına təhsil alması barədə bu universitetlə razılıq əldə edilib", - deyə qeyd edən Nazim İbrahimov xaricdəki bazar günü məktəblərindən də danışıb.

İ.Telmanoğlu

Ayna.- 2010.- 18 dekabr.- S.16.