Türkdilli əlyazmalar kataloqunun ikinci cildi çap edilib

Topluya bir neçə dildə poetik əsərlər daxil edilib

Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunda saxlanılan türkdilli əlyazmalar kataloqunun ikinci cildi çap olunub. Bu barədə institutdan məlumat verilib. "Nurlan" nəşriyyatında işıq üzü görən bu cildə Azərbaycan, türk, özbək, tatar, qumuq, türkmən və s. dillərdə yazılmış poetik əsərlər daxil edilib.

Xəbərdə bildirilir ki, kataloqda XIII-XIV əsrlərdə yaranmış müştərək Azərbaycan-Türkiyə abidələrindən başlayaraq XX əsrin əvvəllərinə aid olan 431 əlyazma haqqında məlumat toplanıb. Kataloqa Azərbaycan şairləri Nəsimi, Kişvəri, Xətai, Füzuli, türk şairləri Baqi, Nabi, Naili, özbək şairi Nəvai, türkmən şairi Məxdumqulu və başqalarının divanları haqqında məlumatlar daxil edilib.

Qeyd edək ki, yeni nəşrin redaktoru və tərtibçisi filologiya elmləri doktoru Məmməd Adilov, ön sözün müəllifi filologiya elmləri namizədi Paşa Kərimovdur.

Zəminə

Ayna.-2010.-13 fevral.-S.20.