Ölkənin yeni paytaxtları elan edildi

 

Bunlar - Gəncə, Qazax Şəki

 

Azərbaycanın qeyri-maddi mədəni irsinin qorunması, dəstəklənməsi, xalq yaradıcılığının təbliği təşviqi istiqamətində aparılan islahatların davamı olaraq Azərbaycan Respublikasının Mədəniyyət Turizm Nazirliyi "2010-2014-cü illər üçün Xalq Yaradıcılığı Paytaxtları" Proqramını təsdiq etmişdir. Proqram çərçivəsində "Gəncə - Azərbaycanın əfsanələr paytaxtı", "Qazax - Azərbaycanın folklor paytaxtı", "Şəki - Azərbaycanın sənətkarlıq paytaxtı" elan olunmuşdur.

Bütün bunlar barədə fevralın 24-də Mədəniyyət və Turizm Nazirliyində Azərbaycan Respublikasının mədəniyyət və turizm naziri Əbülfəs Qarayevin mətbuat konfransında söhbət getmişdir.

Nazir bildirdi ki, Mədəniyyət və Turizm Nazirliyi tərəfindən Azərbaycanın qeyri-maddi mədəni irsinin (diyarşünaslıq, folklor, sənətkarlıq) qorunması və dəstəklənməsi istiqamətində aparılan islahatlara start verilmişdir.

Məsələ ilə əlaqədar təsdiq edilmiş illik tədbirlər planına əsasən, Gəncə, Şəki və Qazax şəhərlərində keçiriləcək tədbirlərin yüksək səviyyədə təşkili üçün Təşkilat Komitəsi yaradılmış və müvafiq şəhərlərin gerbləri əsasında loqotiplər hazırlanmışdır. Hazırda loqotiplərin əks olunduğu lövhələrin, bannerlərin, çap məhsullarının hazırlanması və yerləşdirilməsi istiqamətində işlər aparılır.

Mətbuat konfransında Gəncə, Şəki və Qazax rayonları İcra Hakimiyyətləri nümayəndələri də iştirak edirdilər. Onlar nazirə bu qədər qiymətli və dəyərli proqramlara start verildiyinə görə minnətdarlıq bildirdilər.

Mədəniyyət və turizm naziri cənab Əbülfəs Qarayev öz çıxışında mədəniyyət və turizm sahələrini əhatə edən bir çox məsələlərə və islahatlara toxundu:

"Son illərdə Azərbaycanda mədəniyyət sahəsi sürətlə inkişaf edir. Bunu müxtəlif ölkələrin mütəxəssisləri müşahidə edib. Ölkəmizdə aparılan layihələr bütün dünyada çox böyük maraq doğurur. Bakıda "İslam Mədəniyyətinin paytaxtı" layihəsi çərçivəsində İslam ölkələri nazirlərinin, BMT ölkələrinin mədəniyyət nazirlərinin iclası keçirildi. Onu da qeyd edim ki, bu proqram 2024-cü ilə qədər hazırlanıb və proqram çərçivəsində 2018-ci ildə Naxçıvan Muxtar Respublikası İslam Mədəniyyətinin Paytaxtı seçilməlidir.

Nazir bunları çox böyük nailiyyət adlandırdı. Yeni layihələrin, proqramların məqsədi bu nailiyyətləri davam və inkişaf etdirməkdir. Nazir dedi: "Əgər bu sadalanan rayonlarda bir yaşlı insan öz evində yun əyirməklə və yaxud xalq yaradıcılığının hansısa bir növü ilə məşğuldursa, bu da mədəniyyətimizin bir hissəsidir və bizim məqsədimiz də bunları üzə çıxarmaqdır. Bu gün bədxah qonşularımız əllərinə xırda bir fürsət düşən kimi hər şeyi mənimsəyirlər, amma biz ermənilər kimi deyilik ki, hər şeyi uyduraq. Ümidvaram ki, biz olan sərvətlərimizi üzə çıxarda biləcəyik".

 

 

Sevinc İsmayıl 

 

Ayna.-2010.-27 fevral.-S.19.