TQDK-ya 22 Avropa və dünya çempionu müraciət edib

Onlar İdman Akademiyasında test imtahanlarsız təhsil ala biləcəklər

Azərbaycanda bu il 115 min 852 abituriyent test imtahanlarında iştirak edəcək. Bu barədə Tələbə Qəbulu üzrə Dövlət Komissiyasının sədri Məleykə Abbaszadə dünən keçirdiyi mətbuat konfransında məlumat verib. Birinci ixtisas qrupu üzrə 37 157, ikinci qrup üzrə 28 883, üçüncü qrup üzrə 32 697, dördüncü qrup üzrə isə 16 116 abituriyent tələbə adı uğrunda mübarizə aparacaq.

TQDK sədri bildirib ki, ali məktəblərə ərizə verən abituriyentlərin 50 faizi sınaq imtahanlarında iştirak edənlərdir. Bütün regionları əhatə edən bu imtahanlarda 75 min abituriyent iştirak edib. TQDK sədri sonuncu sınaq imtahanlarının iyunun 6-da keçiriləcəyini söyləyib.

M.Abbaszadə bəyan edib ki, sınaq imtahanlarının nəticələrinə əsasən, rus bölməsinin abituriyentləri Azərbaycan bölməsi ilə müqayisədə daha zəif nəticə göstəriblər. Sınaq imtahanlarında rus bölməsi abituriyentlərinin topladığı orta bal Azərbaycan bölməsinə nisbətən aşağı olub. Sınaq imtahanlarında İİ ixtisas qrupu üzrə Azərbaycan bölməsinin orta balı 279 olduğu halda, rus bölməsinin 254, İİİ qrupda Azərbaycan bölməsinin orta balı 321, rus bölməsinin 259, İV qrupda Azərbaycan bölməsinin orta balı 333, rus bölməsinin isə 255 olub.

Maraqlı fakt odur ki, bu il rejissor olmaq istəyənlərin sayı artıb. Rejissor olmaq üçün 431, aktyor olmaq üçünsə 280 nəfər qeydiyyatdan keçib. Bu da yüksək müsabiqə vəziyyəti yaradacaq.

TQDK sədri onu da xatırladıb ki, artıq qəbul imtahanlarında iştirak üçün ərizələrin qəbul müddəti iyunun 2-də başa çatıb. İyulun 4-dən 23-nə qədər dörd ixtisas qrupu üzrə test imtahanları keçiriləcək. TQDK sədri deyib ki, sənəd verənlərin 2 731 nəfəri ərizələrini təsdiqləməyib: "Bu il 12 461 nəfər qabiliyyət imtahanlarında iştirak edəcək. Bunların da 50 faizdən çoxu Bədən Tərbiyəsi Akademiyasına sənəd verənlərdir. 22 Avropa və dünya çempionu müraciət edib və onların sənədləri təsdiq edilib. Həmin şəxslər Bədən Tərbiyəsi Akademiyasında test imtahanlarsız təhsil ala biləcəklər".

M.Abbaszadə onu da vurğulayıb ki, yeni "Təhsil haqqında" qanun dünya olimpiadalarının qaliblərinə ali məktəblərə imtahansız qəbul imkanı yaratsa da, indiyədək dünya fənn olimpiadası üzrə heç bir qalib bu quruma müraciət etməyib:

"Bu il dünya fənn olimpiadaları iyulda keçiriləcək. Ötənilki olimpiadaların iştirakçılarından isə heç bir qalib bizə müraciət etməyib".

M.Abbaszadə qeyd edib ki, TQDK-nın müraciəti əsasında Mədəniyyət və Turizm Nazirliyi də bu quruma beynəlxalq səviyyəli hesab etdiyi müsabiqə və festivalların siyahısını təqdim edib. Siyahıda 35 festival və müsabiqə öz əksini tapıb. Siyahıya əsasən Bakıda keçirilən Beynəlxalq Muğam Festivalı və Bülbül adına vokalçıların beynəlxalq müsabiqəsi, Tbilisidə keçirilən gənc pianoçuların beynəlxalq müsabiqəsi, Estoniyada Şopen yaradıcılığına həsr olunan Baltik ölkələri gənc pianoçularının beynəlxalq müsabiqəsi, Moskvada keçirilən "Zolotaya kistiçka" uşaq təsviri incəsənət və digər müsabiqələrin qalibləri ali məktəblərə imtahansız qəbul olunacaqlar. Məleykə Abbaszadə TQDK-nın internet saytında bu siyahının açıqlanacağını söyləmişdir.

Qeyd edək ki, TQDK-nın hazırladığı "Abituriyentin bələdçisi" kitabının yenilənmiş, təkmilləşdirilmiş yeni buraxılışı artıq nəşr olunub. Jurnalda tələbə qəbulu prosesinin bütün tərəfləri və mərhələləri sistemli şəkildə əks olunub.

Nəşrdə ötən il keçirilmiş qəbul imtahanlarında müəyyənləşmiş keçid balları, qəbul proqramları, test kitabları, elektron dərs vəsaitləri, çətin testlərin izahı və tövsiyələr, model testlər, açıq testlər, xüsusi qabiliyyət tələb edən ixtisaslara dair vəsaitlər haqqında məlumat verilib.

Jurnalın bölmələrində abituriyentlərin imtahan gününə hazırlığına dair tövsiyələr, psixoloq məsləhətləri verilib. Son bölmədə qabiliyyət imtahanlarının keçirilmə qaydaları, abituriyentlərin imtahan balları və ixtisas seçimi əsasında müsabiqə və yerləşdirmənin aparılması prosesi işıqlandırılıb. Apellyasiya aparılması qaydaları, ali təhsil müəssisələrində əlavə yerləşdirmə, tam orta təhsil müəssisələrinin boş qalan yerlərinə əlavə yerləşdirmə və tələbə qəbulu ilə bağlı abituriyentlər, valideynlər və ictimaiyyət tərəfindən TQDK-ya ən çox ünvanlanan suallar və onlara mütəxəssislərin cavabları təqdim olunur.

Ayna.- 2010.- 5 iyun.- S.18.