Sumqayıtda Üzeyir Hacıbəyli abidə kompleksi

 

Sumqayıtda dahi bəstəkar Üzeyir Hacıbəylinin şəhərdə adını daşıyan küçədəki abidə kompleksində işlər yekunlaşıb. Bu barədə Sumqayıt şəhər icra nümayəndəliyindən xəbər verilib. Deyilir ki, abidə kompleksinin inşa edildiyi xiyabanın eni 23 metr, ərazinin uzunluğu 61 metr təşkil edir. Ümumilikdə, 1 340 kvadratmetrlik sahənin təxminən 740 kv.m hissəsində tamet döşəmə salınıb, yaşıllaşdırılan sahələrdə, əsasən çəmən, dekorativ ağac kollar əkilib, oturacaqlar quraşdırılıb. Hazırda ərazidə müasir işıqlandırma sistemi quraşdırılır.

Abidənin müəllifi Sumqayıt şəhərinin baş rəssamı Vaqif Nəzirovdur. Ü.Hacıbəylinin abidəsinin ümumi hündürlüyü 12 metrdir. Qeyd edək ki, postament royal formasında olub, qara qranitlə üzlənib, yüksələn hissəsi orqan borularının simvolik təsviri kimi verilib. Üzərində 5 metr yüksəklikdə yerləşən bürüncdən hazırlanan barelyefin fonu isə ağ mərmərdən üzük qaşı formasında işlənib. Əks tərəfdən isə eyni fon üzərində milli musiqi alətlərimizin, tar, kaman və qavalın tökmə bürüncdən təsviri yerləşib.

 

 

Ayna.- 2010.- 5 iyun.- S.20.