Çinarə Şirinova opera sənəti festivalında

TÜRKSOY xətti ilə Türkiyədə hər il Beynəlxalq opera sənəti festivalı keçirilir. Builki festival Mersində və Kiprin Girne şəhərlərində iyunun ikinci ongünlüyündən başlayaraq keçirilib. Festivalda Azərbaycan opera sənətini Akademik Opera və Balet Teatrının gənc və istedadlı solisti Çinarə Şirinova təmsil edib. Teatrın mətbuat xidmətindən verilən bilgiyə görə, Azərbaycan təmsilçisi ilə yanaşı, bu festivala Türkiyə, Qazaxıstan, Özbəkistan, Qırğızıstan, Tatarıstan, Başqırdıstan, Xakasiya, Qaqauz və Şimali Kipr opera teatrlarının aparıcı solistləri də qatılıblar.

Festivalın açılışı günü Çinarə Şirinova Mersin Simfonik Orkestrinin rəhbərliyi altında P.Maskaninin "Kənd namusu" operasından Santutsanın ariyasını ifa edib. Onun çıxışı tamaşaçıların alqış sədaları ilə müşayiət olunub.

Girnedəki konsertdə isə Şirinova klassik operalardan parçalarla yanaşı, Üzeyir Hacıbəylinin "Arşın mal alan" operettasından Gülçöhrənin ariyasını səsləndirib. Onun festivaldakı çıxışı çox böyük uğurla keçib və konsertdə iştirak edən İstanbul, Mersin, İzmir və Ankara opera teatrlarının işçiləri Çinarəni öz teatrlarına qastrola dəvət ediblər.

Çinarə Şirinovanın çıxışı TÜRKSOY-un baş katibi Düşen Kaseyinov tərəfindən də yüksək qiymətləndirilib.

Ayna.- 2010.- 19 iyun.- S.19.