Azərin repçi ilə oxudu

Onun seçimi Uran oldu

Əməkdar artist Azərin repin dünya çatında daha çox dinləndiyini nəzərə alaraq, bu janrın ifaçılarından biri ilə duet oxuyub. Bu barədə danışarkən bildirdi ki, onun tərəf-müqabili Urandır:

"Bu gün sivil ölkələrdə rep daha çox dinlənən bir janrdır. Məşhurların çoxu ifalarında repə yer ayırırlar. Mən də çərçivədən kənara çıxmadan vətənpərvər mahnılarımdan birini repin qarışı ilə oxumaq istədim və Uranı seçdim".

Azərin bildirdi ki, vətənpərvər ruhlu mahnını gənclərə və eyni zamanda ölkədən kənara bu səpkidə çıxarmaq və onu dinləyiciyə sevdirmək daha asan olar.

"Əsas niyyətim vətəni tərənnüm edən mahnıların sayını artırmaqdır. İstənilən əsəri ifa edərkən, əvvəlcə onun sözlərinə fikir verirəm. Amma bəzən gənclərin də zövqünü nəzərə almaq lazımdır. Ona görə də, yenilik etmək qərarına gəldim" - deyə əməkdar artist bildirdi. Azərin sonda qeyd etdi ki, Türkiyədəki çıxışlarında həmin mahnını mütləq repertuarına daxil edəcək.

Şəms

Ayna.- 2010.- 15 may.- S.24.