"Harda Azərbaycan xalçası var, bu mahnı orada səslənəcək"

Yeni nəğmə üç xalq artistinin ifasında

Milli-maddi sərvətlərimizin ön sırasında yer tutan xalçalarımız haqqında nəğmə yaranıb. Mahnının söz müəllifi əməkdar incəsənət xadimi Baba Vəziroğludur, musiqisi isə Kamal müəllimə aiddir. Xəbəri təfərrüatı ilə açıqlayan B.Vəziroğlu onun 3 xalq artisti tərəfindən ifa edildiyini söylədi. Bu sənətçilər Nəzakət Teymurova, Aygün Bayramova və Mənsum İbrahimovdur. Şair ideyanın tarixçəsindən söz açdı:

"İdeya dünyada peşəkar xalça mütəxəssislərindən biri hesab edilən "Azərilmə" MMC-nin rəhbəri Vidadi Məmmədovla tanışlığımızdan sonra yarandı. Azərbaycanın maddi incilərini özündə tərənnüm edən musiqi və mətnlər çoxdur. Bu mövzuda nəğmə isə bizim tərəfimizdən yarandı. Mahnının musiqisi xalq mahnısı üslubunda Kamal müəllim tərəfindən yazılıb. İfaçılar da bu üslubu izləyirlər. Kiçik musiqili əsər bu dəyərli incinin tarixini, fəlsəfəsini, gözəlliyini, yarandığı bölgələri, dünya şöhrətini "Azərbaycan xalçası" adı ilə əks etdirəcək".

Əməkdar incəsənət xadiminin söylədiyinə görə, aranjiman işi Osmana məxsus olan mahnı artıq studiya həllini geridə buraxıb. Yaxın günlərin birində isə peşəkar heyətin iştirakı ilə mahnıya klip çəkiləcək. Qeyd edək ki, yaradıcı heyətin rəhbəri Elçin Əlibəyli, klipin rejissoru isə Günel Şakirdir. B.Vəziroğlu sonda xüsusi olaraq vurğuladı: "Harda Azərbaycan xalçası var, bu mahnı orada səslənəcək".

Z.Rəhimqızı

Ayna.- 2010.- 6 noyabr.- S.20.