"Sintezatoru orkestrə Eldar Mansurovla mən gətirmişəm"

Tahir Əkbər hesab edir ki, onun imkanlarından düzgün istifadə olunmur

Milli musiqinin inkişafında xidmətləri olan bəstəkar Tahir Əkbər bir çox musiqiçilərin tənqid hədəfinə çevrilən sintezator aləti barədə maraqlı açıqlama verərək bildirib ki, bu aləti orkestrə həmkarı Eldar Mansurovla birlikdə gətirib:

"Bu hadisənin 10 ildən çox yaşı var. Biz yoxlayıb gördük ki, bu alət ansambl şəklində pis səslənmir. Ona görə də orkestrə gətirib imkanlarından istifadə etdik. Amma sonradan bunu yüngül musiqi aləti kimi istifadə etməyə başladılar".

Tahir Əkbərin fikrincə, sintezatorun ünvanına yaxşı fikirlərin səslənmədiyinin başlıca səbəbkarı bəzi ifaçılardır:

"Hər alətin özünəməxsusluğu var. Əgər ifaçı mükəmməl deyilsə, onun xoş avazını eşitmək mümkün olmayacaq. Bu səbəbdən də çoxları bu aləti peşəkar səviyyədə qəbul edə bilmədilər".

Sintezator alətindən daha çox toy şənliklərində və şou-proqramlarda istifadə olunur. Yüzlərlə ritmi özündə birləşdirən alət barədə danışan peşəkarlar onun musiqimizi süniləşdirdiyini iddia edirlər.

Sözünün davamında bəstəkar musiqidə yad elementlərin olmasından da narahatlıq keçirdiyini dilə gətirdi. Söylədi ki, əksər musiqiçilər, özəlliklə də həvəskar bəstəkarlar Azərbaycan mahnısı adı altında yad melodiyalarla yüklənən nəğmələr yazırlar. Onun fikrincə, onlar peşəkar musiqidən başı çıxmayanlardır. "Belələri yüngül ritmlər üzərində mahnı qurmaqla, özlərinə ad qazandırmaq istəyirlər. Bu isə Azərbaycan musiqisinə kölgə salır", - deyə T.Əkbər bildirdi.

Z.Rüstəm

Ayna.- 2010.- 13 noyabr.- S.21.