Xanəndə Çita müsabiqəsinin laureatı oldu

Babək Niftəliyev musiqi sənətimizi uğurla təmsil edib

Bu günlərdə Rusiyada professor Nikolay Budaşkin adına xalq çalğı alətləri orketstrləri və ansambllarının dördüncü beynəlxalq müsabiqəsi keçirilib. 1976-cı ildən başlayaraq keçirilən bu sənət bayramı orkestr və milli musiqi alətləri yarışması şəklindədir. Bu il Çita vilayətində təşkil olunan müsabiqədə dünyanın bir çox ölkələrindən - Çin, Belarus, Monqolustan, Yaponiya, Azərbaycan, eləcə də Rusiyanın bəzi əyalətlərindən musiqiçilər - 900-dən çox iştirakçı vardı. Münsiflər heyətinə Rusiyanın xalq artisti, Novosibirsk Filarmoniyasının baş dirijoru Vladimir Qusev başçılıq edib. Ölkəmizi bu müsabiqədə gənc xanəndə, Birinci Respublika Muğam müsabiqəsinin qalibi Babək Niftəliyev təmsil edib. Babək Niftəliyevin bildirdiyinə görə, Azərbaycan müsabiqədə uğurlu çıxış edib. Tarzən Ədalət Behbudov və kamança ifaçısı Pərviz Fərəhovun müşayiəti ilə çıxış edən Babək Niftəliyev muğam, təsnif və xalq mahnılarımızı ifa edib. Müsabiqənin laureatı olan Babək Niftəliyev orada iştirak edən bir çox millətlərin, əsasən də, yaponların Azərbaycan muğamına böyük maraq göstərdiyini bildirib. Yaponiyalı musiqiçilər Azərbaycan muğamının, xüsusən də dünya şöhrətli Alim Qasımovun sənətinin vurğunu olduqlarını söyləmişlər.

Ayna.- 2010.- 19 noyabr.- S.19.