Diplomlu müğənnilər

Səhnədə isə diplomu yox, sənətini nümayiş etdirməlisən

Sirr deyil ki, ölkənin indiki şou ulduzlarının çoxu məhz məşhurlaşandan sonra ali təhsil almaq barədə düşünürlər. Onların çoxu səs, səhnə standartlarına cavab vermə göstəricilərindən daha çox məhz sonradan əldə etdikləri bu diplomları əsas gətirib "özlərinə oxumaq haqqı" tanıyırlar. Amma həqiqət həm də odur ki, məşhurların çoxu bu diplomu məhz "peşəkarlıq manipulyasiyası" üçün əldə edir. Həqiqətdə isə onların çoxu universitet auditoriyalarında əyləşib peşəkarların mühazirələrini dinləməyi "vaxt itkisi" hesab edirlər.

Apardığımız kiçik araşdırmada öyrəndik ki, Faiq Ağayev Azərbaycan Dövlət Mədəniyyət və İncəsənət Universitetinin məzunları sırasındadır. Amma onun aktyorluq imkanları müğənni peşəsinin gölkəsi altında sürünür. Brilliant Dadaşova 1990-cı ildə Azərbaycan Dövlət Mədəniyyət və İncəsənət Universitetinin musiqili komediya ixtisasını, Nisə Qasımova Azərbaycan Dövlət Mədəniyyət və İncəsənət Universitetinin solooxuma ixtisasını, Ağadadaş Ağayev Azərbaycan Dövlət Mədəniyyət və İncəsənət Universitetinin musiqi və teatr kollektivlərinin rəhbəri ixtisasını bitirib. Bundan əvvəl isə ilk ali təhsilini Nəsrəddin Tusi adına Azərbaycan Dövlət Pedaqoji Universitetinin ümumtexniki fənlər və fizika fakültəsində alıb. Uzun müddət Cəlilabad rayonunda fizika müəllimi işləyib. Azərin Bakı Musiqi Akademiyasının solooxuma sinfini, Nəzakət Teymurova Bakı Musiqi Akademiyasında Arif Babayevin muğam sinfini bitirib.

İfaçıların bir qismi əsas peşələrindən bir qədər yayınaraq müğənnilik sənətini seçiblər. Digər qismi isə müğənni olandan sonra ayrı-ayrı ixtisaslara yiyələniblər. Növbəti sıralamada Ədalət Şükürovun adını çəkə bilərik. Adının yanında əməkdar artist fəxri adı duran müğənni Sankt-Peterburq İncəsənət Akademiyasını bitirib və hazırda bu universitetin elmlər namizədidir. İradə İbrahimova Azərbaycan Milli Konservatoriyasının solooxuma fakültəsini bitirib. İlk təhsilini isə Azərbaycan Dillər Universitetində alıb. Sevda Ələkbərzadə bir az əvvəl adını çəkdiyimiz həmkarı İ.İbrahimova ilə birlikdə Azərbaycan Milli Konservatoriyasının eyni kursunda təhsil alıb.

Nadir Qafarzadə Asəf Zeynallı adına Musiqi Kollecini bitirib, ali təhsili yoxdur. Eyyub Yaqubov Asəf Zeynallı adına Musiqi Kollecinin fortepiano sinfini bitirib. Bu müğənninin də ali təhsili yoxdur.

Azərbaycanın xalq artisti adını qazananlardan biri Nazpəri Dostəliyeva Mədəniyyət və İncəsənət Universitetinin solooxuma fakültəsinin məzunudur. İzzət Bağırov da eyni universitetdə eyni fakültənin tələbəsi olub. Elariz Məmmədoğlu Azərbaycan Dövlət Mədəniyyət və İncəsənət Universitetinin mədəni-maarif fakültəsinin kütləvi tamaşalar rejissoru ixtisası üzrə təhsil alıb. Vasif Məhərrəmli Bakı Musiqi Akademiyasının ifaçılıq fakültəsini bitirib. Tünzalə Ağayeva Qəmbər Hüseynli adına Gəncə Musiqi Texnikumunda oxuyub və onun da ali təhsili yoxdur. Elnarə Azərbaycan Milli Konservatoriyasının məzunudur. İlk təhsilini Azərbaycan Dillər Universitetində alıb. Məleykə Əsədova Azərbaycan Dövlət Mədəniyyət və İncəsənət Universitetində teatr aktyorluğu ixtisasına yiyələnib. Müğənni Kərim isə Mədəni-Maarif Texnikumunun xalq çalğı alətləri orkestrinin bədii rəhbəri bölməsini bitirib. Sabir Əhmədov Moskva Dövlət Konservatoriyasının solooxuma sinfinin, Nura isə Bakı Musiqi Akademiyasının məzunudur.

Onların gənc həmkarı Ayaz Qasımov Azərbaycan Milli Konservatoriyasının solooxuma, Fidan Hacıyeva Bakı Musiqi Akademiyasının vokal sənəti, Şahin Növrəsli Bakı Musiqi Akademiyasının fortepiano fakültəsində ali təhsilə yiyələniblər.

Növbəti sıralamada adları hallandırılan Nurlan Növrəsli Bakı Musiqi Akademiyasının vokal, Rüfət Axundov Azərbaycan Dövlət Mədəniyyət və İncəsənət Universitetinin dram rejissorluğu, Lalə Məmmədova Azərbaycan Milli Konservatoriyasınvn solooxuma fakültəsində təhsil alıblar. Qeyd edək ki, Lalə xanım ilk təhsilini Azərbaycan Dillər Universitetində alıb.

Səhnəmizin "ağır" ulduzlarından olan Zülfiyyə Xanbabayeva Azərbaycan Dövlət Mədəniyyət və İncəsənət Universitetinin rejissorluq, Elnur Azərbaycan Dövlət İqtisad Universitetinin iqtisadiyyatın hüquqi tənzimlənməsi fakültələrində, Elza Seyidcahan Bakı Musiqi Akademiyasının bəstəkarlıq fakültəsində Arif Məlikovun sinfində təhsil alıblar. Cavanşir Məmmədov Asəf Zeynallı adına Musiqi Kollecinin ifaçılıq, daha sonra Azərbaycan Dövlət Texniki Universitetinin avtonəqliyyat fakültəsində təhsil alıb. Gülüstan Əliyeva Bakı Musiqi Akademiyasının solooxuma, Xuraman Şuşalı Azərbaycan Milli Konservatoriyasının solooxuma sinfində, Rahidə Baxışova Asəf Zeynallı adına Musiqi Kollecində təhsil alıblar. Rəqsanə Azərbaycan Dövlət Mədəniyyət və İncəsənət Universitetinin məzunudur. İlk təhsilini isə Gəncə texnikumunda alıb. Röya Bakı Dövlət Universitetinin hüquq fakültəsini bitirib və bundan öncə 7 illik musiqi məktəbində fortepiano sinfində oxuyub.

Öyrəndik ki, Aygün Kazımova, Abbas Bağırov, Natəvan Həbibi kimi tanınanların isə ali təhsili yoxdur.

Mövzunu maraqlı etmək üçün Bakı Musiqi Akademiyasının rektoru, xalq artisti Fərhad Bədəlbəylinin mövqeyini öyrəndik, O, diplomla bağlı məsələyə fərqli mövqedən yanaşdı. Diplomun əldə bayraq edilərək sənətkar adlanmağın düzgün olmadığını bildirib:

"Rəşid Behbudov, Maestro Niyazi, Xan Şuşinskinin də diplomu olmayıb. Kimsə "diplomum var" deyib çıxış etmək haqqı olduğunu deyirsə, bu, yanlışdır. Sənətdə sənət nümayiş etdirmək lazımdır, diplom yox. Mən diplomun alət edilməsinə çox pis baxıram".

F.Bədəlbəylinin sözlərinə görə, müasir efir sənətkarlığı olmayanları daha çox reklam edir: "İncəsənət tək estrada ilə bitmir. Hamı elə bilir ki, incəsənət estradadan başlayıb, şouda qurtarır. Sənətdə senzura, ekrana çıxmaq üçün bədii şura olmalıdır. Kim istəsə ekrana çıxır, zövqlər korlanır. Kimin kiminlə davası varsa, ondan bir saatlıq veriliş hazırlanır. Onda Üzeyir Hacıbəyov, Qara Qarayev, Hüseyn Cavid, Səttar Bəhlulzadə lazım deyildir. "Ölülər" Şekspir səviyyəsində yazılmış bir əsərdir. Bizim cavanlarımız bu gün "Ölülər"ə, "Dəli yığıncağı"na baxır? Xeyr. Eyni problem musiqidə də yaşanır. Azərbaycanda mənəvi sərvətin sayı bitib-tükənməzdir, ancaq bizim gənclər bundan xəbərsizdir".

Ədəbi və musiqi efiri üçün senzura tətbiq olunmasının problemi müəyyən qədər həll edəcəyini söyləyən rektor musiqidən başqa, söz, mətn probleminin də olduğunu vurğulayıb.

Xatun

Ayna.- 2010.- 2 oktyabr.- S.21.