"Berlin: Sənətkarların və alimlərin Məkkəsi"

Burada "Tarix Günü Konfransı" başa çatdı

Berlində Avropanın ən nüfuzlu və geniş əhatəli Tarix Günü Konfransı dünən başa çatdı. Sayca 48-ci olan bu üçgünlük konfrans Almaniya Tarixçilər Birliyi tərəfindən Almaniyanın tarix müəllimləri və Humboldt Universiteti ilə birgə keçirilirdi.

3 mindən çox avropalı tarixçi alimin iştirak etdiyi konfrans "Sərhədlərin Ötəsində" (Uber Grenzen) adı altında idi. Berlin Konqres Mərkəzindəki möhtəşəm açılışında kansler Angela Merkel də iştirak edirdi. Kansler "Təhsil ölkəsi Almaniya"nın elminin və təhsilinin inkişafına çox böyük töhfələr verən proyektlərin gerçəkləşdirilməsini vacib saydı.

Mədəniyyət üzrə dövlət katibi Andre Smitz Berlini "Sənətkarların və alimlərin Məkkəsi" adlandırdı. Açılışdan sonrakı ziyafət mərasimində konfransın iştirakçısı, soydaşımız Nuridə Atəşi Humboldt Universitetinin prezidenti professor Kristof Marksis ilə görüşmüş, konfrans münasibəti ilə təbrik etmiş və ona Humboldt Universitetində Azərbaycan tarixinin tədrisinə dəstək göstərdiyi üçün təşəkkürünü bildirmişdir. Qeyd edək ki, növbəti 5 il ərzində Humboldt Universitetində Azərbaycan tarixi tədris ediləcəkdir. Bu məqsədlə Azərbaycan tarixi üzrə "xüsusi qonaq professor" vəzifəsi təyin edilib.

Nuridə Atəşi universitetin prezidentinə bu beş il ərzində Azərbaycanın gerçək tarixinə, mədəniyyətinə layiqli töhfələr veriləcəyinə ümid etdiyini bildirmişdir.

Ayna.- 2010.- 2 oktyabr.- S.20.